Enzuko 4:1-26
4 Adamu mwaghotsera n’omukali wiwe ye Eva, neryo Eva mwabya mukule. Mwabya abibuta Kaini, mwabugha ati: “Yehova yulyaniwatikaya eributa omwana w’obulume.”
2 Enyuma sy’aho, mwabuta Abeli, mughala wabo Kaini.
Abeli mwabya mulisya, na Kaini mwabya mukulima.
3 Kiro kighuma, Kaini mwaleta ebyalya ebyo alyeraya kusudi ahererebyo Yehova.
4 Abeli naye mwaleta ehimbere hilebe hy’esyonyama ehyo abya akalisya. Mwahererahyo haghuma n’ebisabu byahyo. Yehova mwatsemera Abeli n’obuhere bwiwe.
5 Aliwe mwatatsemera Kaini n’obuhere bwiwe. Ekyo mukyaleka Kaini iniahitana kutsibu n’eriyowa muhanda.*
6 Neryo Yehova mwabwira Kaini ati: “Busanaki wabirihitana kutsibu n’eriyowa muhanda?
7 Wamabikola ebyuwene, ukalengekanaya uti isinenditasyakutsemera?* Aliwe utitakola ebyuwene, erilolo rinemukulimbya oko mulango, kandi ryanzire erikutabala. Unemwendikindaryo?”
8 Enyuma sy’aho, Kaini mwabwira mughala wabo ye Abeli ati: “Tuye emoli.” Ibane emoli, Kaini mwaghulukira oko mughala wabo ye Abeli n’erimwita.
9 Habere habilaba akatambi kalebe, Yehova mwabulya Kaini ati: “Mughala wenyu Abeli ali hayi?” Kaini mwamusubirya ati: “Sinasi. Ingye ngamutsunga kwe?”
10 Aliwe oMungu mwamubwira ati: “Mughukayira uti? Hulikirira, omusasi w’omughala wenyu oghutikira ahisi anemunilirira.
11 Neryo aho wamabitakirwa. Ukendihiwa oko kitaka ekiryakingula obuno bwakyo n’erinywa omusasi w’omughala wenyu ogho ulyuta.
12 Omughulu ukendibya ukalima ekitaka, siwendibya ukerya ebyalya binene.* Ukendibya ukaghanga-ghanga n’eribya musayi oko kihugho.”
13 Neryo Kaini mwabwira Yehova ati: “Amalipizi agho wamamba busana n’ekosa yaghe amakala kutsibu.
14 Munabwire wamanihigha omo kihugho, kandi ngendibya hali naghu, ngendibya ngaghanga-ghanga n’eribya musayi oko kihugho n’omundu wosi-wosi amabinisunga, iniakendiniita.”
15 Neryo Yehova mwabwira Kaini ati: “Byamabya iko biri bitya, omundu wosi-wosi oyukendita Kaini akendihabwa amalipizi ngendo 7.”
Neryo Yehova mwahiraho ekindu ekikendileka omundu isyita Kaini amamubandana.
16 Kaini mwayikala omo kihugho ky’Obusayi,* eluhande lw’eyikasira eryuba lwe Edeni, hali oko Yehova.
17 Enyuma sy’aho, Kaini mwaghotsera n’omukali wiwe, amabya mukule, neryo mwabuta Enoka. Enyuma sy’aho, Kaini mwahimba omuyi, amaha omuyi oyo erina rya mughala wiwe, ye Enoka.
18 Enyuma sy’aho, Enoka mwabuta Iradi, na Iradi mwabuta Mehuyaeli, na Mehuyaeli mwabuta Metusaeli, na Metusaeli mwabuta Lameki.
19 Lameki mwabya n’abakali babiri. Ow’erimbere iniakahulawa mo Ada, n’ow’akabiri iniakahulawa mo Zila.
20 Ada mwabuta Yabali. Yabali yo wabya tata-kulu w’ababya bakikala omo mahema n’abalisya.
21 Mughala wabo abya iniakahulawa mo Yubali. Yubali yo wabya tata-kulu w’abosi ababya bakawata enanga n’enyabulere.
22 Zila naye mwabuta Tubali-kaini, oyo wabya akahesa obuli muhanda w’ebindu omo kwivre* n’omo kyuma. Mwali wabo Tubali-kaini abya akahulwa mo Naama.
23 Lameki mwabwira abakali biwe ye Ada na Zila b’ebinywa bino:
“Inywe bakali ba Lameki, muhulikirire omulenge waghe;Mwowe ebyo ngabugha:
Mungita omundu kundi mwakanihutalaya,Omulwana kundi mwakanihunza.
24 Kaini amabya inianatolere amalipizi ngendo 7,Kwesi Lameki iniatolere erihabwagho ngendo 77.”
25 Kandi Adamu mwaghotsera n’omukali wiwe. Neryo omukali wiwe mwabuta omwana w’obulume. Omukali wiwe mwahula omwana oyo mo Seti,* kundi mwabugha ati, “OMungu abirimba oghundi mwana omo mwanya wa Abeli, kundi Kaini mwamwita.”
26 Seti naye mwabuta omwana w’obulume, mwamuha erina rya Enoshi. Oko mughulu oyo, abandu mubatsuka eribirikira erina rya Yehova.
Amaelezo awehikwa
^ Kinywa kwa kinywa, “n’obusu bwiwe mubwatogha.”
^ Kutse “siwendihirwa omo mwanya w’endata?”
^ Kinywa kwa kinywa, “sikyendikuha akaghala kakyo.”
^ Kutse “kye Nodi.”
^ Kutse “mulinga.”
^ Ni bugha ambu “oyo wabirisombolwa; oyo wabirihirwaho.”
