Enzuko 40:1-23
40 Enyuma sy’aho, omukulu w’abakatengera omwami we Misri y’obwabu n’omukulu w’abakahuka emikati mubakosera omukama wabo, omwami we Misri.
2 Farao mwahitana kutsibu oko bakulu babiri abo, ni bugha ambu, omukulu w’abakamutengera obwabu, n’omukulu w’abakahuka emikati.
3 Mwabahira omo ngomo y’omukulu w’abasuda abakatsunga omwami, omo Yozefu abya abohirwe.
4 Neryo omukulu w’abasuda abakatsunga omwami mwabwira Yozefu ati abye haghuma nabo n’eribatsunga, neryo mubasighala omo ngomo oko mughulu* mulebe.
5 Ibane omo ngomo, omukulu w’abakatengera omwami y’obwabu n’omukulu w’abakahuka emikati, abosi mubalota enzoli omo kiro kighumerera, n’obuli nzoli yabya n’amaana wayo.
6 Neryo omo asubui y’ekiro ekikwamire, omughulu Yozefu ayabalebaya, mwabeya ibabirihuhirira.
7 Neryo mwababulya ati: “Busanaki mwabiribya omo bulinga bulighe?”
8 Neryo mubamusubirya bati: “Itwe bosi mutukalota, aliwe sihali oyo wangatubwira amaana w’esyonzoli syetu.” Neryo Yozefu mwababwira ati: “Simwasi ngoko oMungu yukakumbula esyonzoli? Muterimbwirasyo.”
9 Neryo omukulu w’abakatengera omwami y’obwabu mwabwira Yozefu y’enzoli yiwe, ati: “Mungalota omuti w’emizabibu iniane embere syaghe.
10 Omuti oyo alueko emitahi isatu. Mwakasako ameso, n’enyuma sy’aho amasako omusanga, n’amatunda wagho w’emizabibu amera.
11 Nilue ininawite oko kikombe* kya Farao omo byala byaghe, neryo mungimaya emizabibu, namakamulirayo omo kikombe kya Farao. Mungabya nabibugha erikamulayo, namaha ekikombe ekyo kyo Farao.”
12 Neryo Yozefu mwamubwira ati: “Amaana w’enzoli yaghu w’ano: Emitahi isatu ni biro bisatu.
13 Hakendibya habilaba biro bisatu, Farao iniakulusya omo ngomo,* n’erikusubya omo mubiiri waghu. Ukendibya ukatengera Farao y’obwabu, ngoko wanabya ukakola kera omughulu wabya ukamutengera obwabu.
14 Aliwe emyatsi ikendibya yabikughendera ndeke, isiwasyanibirirawa. Kisi, unikanganaye olwanzo oluteleghula n’erinibughira na Farao, atoke erinilusya omo mwanya ono.
15 Mubanihamba inine omo kihugho ky’Abaebrania, bamanileta eno yo kinyanganga. Sindinatakola ekindu kyo-kyosi ekyangaleka ibanihira omo ngomo.”*
16 Omukulu w’abakahuka emikati mwabya abilangira ngoko Yozefu amabibugha ati emyatsi ikendighendera ndeke omukulu w’abakatengera omwami y’obwabu, naye mwabwira Yozefu ati: “Naghe mungalota ebibo bisatu ibine oko mutwe waghe. Biluemo emikati eyuwene.
17 Omo kibo ky’endata mulwe imune ebindu ebiryahukirawa Farao omo furu. Ehinyunyu hilwe hikalya ebyalya ebyo nilue nihekire oko mutwe omo kibo.”
18 Neryo Yozefu mwamubwira ati: “Amaana w’enzoli yaghu w’ano: Ebibo bisatu ebyo ni biro bisatu.
19 Hakendibya habilaba biro bisatu, Farao iniatwa omutwe waghu* n’erikuhanika oko muti, n’ehinyunyu hikendirya omubiri waghu.”
20 Habere habilaba ebiro bisatu, Farao mwibuka ekiro abutawa. Mwakolera baghombe biwe bosi b’efete. Mwabohola* omukulu w’abakatengera omwami y’obwabu, n’omukulu w’abakahuka emikati embere sy’abaghombe biwe bosi.
21 Mwasubya omukulu w’abakatengera omwami y’obwabu omo mubiiri wiwe, neryo mwaendelea eribya akatengera omwami y’obwabu.
22 Aliwe mwahanika omukulu w’abakahuka emikati ngoko Yozefu anababwira.
23 Aliwe omukulu w’abakatengera omwami y’obwabu mwibirirwa Yozefu.
Amaelezo awehikwa
^ Kinywa kwa kinywa, “biro.”
^ Kutse “lutehi.”
^ Kinywa kwa kinywa, “iniahangania omutwe waghu.”
^ Kinywa kwa kinywa, “kyuna; buhya.”
^ Kinywa kwa kinywa, “iniakulusyako omutwe waghu.”
^ Kinywa kwa kinywa, “Mwahangania omutwe.”
