Enzuko 42:1-38
42 Yakobo mwabya abiminya ngoko e Misri yine akalyo,* mwabwira abaghala biwe ati: “Busanaki mukabera eritungererana?”
2 Kandi mwabugha ati: “Nabiryowa ngoko e Misri yine akalyo.* Mundaghalireyo, muyatughulire kuko, tukasyahola.”
3 Neryo abaghala 10 babo Yozefu mubandaghalira e Misri eriyaghula akalyo.*
4 Aliwe Yakobo mwabugha ati Benyamini, mughala wabo Yozefu, isyaghenda kundi mwabugha ati: “Omwatsi mubi anganamuhikira, neryo iniahola.”
5 Abaghala ba Israeli mubahika e Misri haghuma n’abandi abayaghulayo akalyo,* kundi enzala yabya iyabirihika omo kihugho kyosi kye Kanana.
6 Yozefu yo wabya imanire ekihugho kye Misri, kandi yo wabya akaghulya akalyo* oko bosi ababya bakalua omo bihugho byosi. Neryo abaghala babo Yozefu mubahika, bamakukama n’erihira obusu bwabo b’oko kitaka embere sya Yozefu.
7 Omughulu Yozefu alangira abaghala babo, mwalw’iniaminyabo, aliwe mwatayiminyisya kubo. Kandi mwabugha nabo omo bukali-kali. Mwababulya ati: “Mukalua hayi?” Mubamusubirya bati: “Tukalua e Kanana, tulyasyaghula akalyo.”
8 Yozefu mwaminya abaghala babo, aliwe ibo mubatamuminya.
9 Yozefu mwalw’inibuka esyonzoli esyo abalotera, neryo mwababwira ati: “Muli bapelelezi. Mulyasyalebaya aho mwangalw’imwabambira omo kihugho kyetu!”
10 Mubamusubirya bati: “Mukama, ko bite bitya. Itwe baghombe baghu tulyasyaghula akalyo.
11 Tuli bana ba baba mughuma. Tuli bandu abatunganene. Itwe baghombe baghu situli bapelelezi.”
12 Aliwe Yozefu mwababwira ati: “Mukateba. Mulyasyalebaya aho mwangingirira bweghu-bweghu omo kihugho kyetu!”
13 Mubamusubirya bati: “Itwe baghombe baghu tuli bana 12. Tuwite baba mughuma. Ikere omo kihugho kye Kanana. Akatungo k’okw’itwe mukakasighala na baba, n’oghundi mughala wetu syakiriho.”
14 Aliwe Yozefu mwababwira ati: “Kyo niryabugha, ‘Muli bapelelezi!’
15 Kino kyo kikendileka inaminya nga munemubugha ekwenene: Ngoko kwenene-kwenene Farao aneho, simwendilua hano akatungo kenyu katekahika hano.
16 Mutume mughala wenyu mughuma ayakende. Abandi bakendisighala hano omo muliki, neryo ngendiminya ebyo mulyabugha nga nina kwenene, kutse iyehe. Bite bitya, ngoko oko kwenene-kwenene Farao aneho, imuli bapelelezi.”
17 Neryo mwahira abosi b’omo ngomo omo biro bisatu.
18 Ekiro ky’akasatu, Yozefu mwabwirabo ati: “Ngasagha oMungu. Neryo mwamabya imunanzire eribyaho, mukole kino:
19 Mwamabya imuli bandu abatunganene, mughala wenyu mughuma asighale inianabohire omo ngomo, aliwe abandi baheke akalyo,* baghende, neryo ebihanda byenyu sibyendyaghalwa busana n’enzala.
20 Muniletere akatungo kenyu. Ekyo kyo kikendileka inaminya ngoko mukabugha ekwenene, neryo simwendihola.” Neryo mubaligha.
21 Mubabwirana bati: “Oko kwenene, ano ni malipizi agho tukahabawa busana n’ekyo twakolera mughala wetu, kundi mutwalangira ngoko anemwaghalwa omughulu abya akatulemba-lemba ati tumughanyire, aliwe mutwaghana. Ekyo kyo kyamaleka bino ibyatuhikira.”
22 Neryo Rubeni mwababwira ati: “Simunanababwira niti, ‘Isimwakolera omwana oyo yo muhanda,’ aliwe mumutowa. Si mwamalangira! Omusasi wiwe anemutukwama.”
23 Aliwe mubataminya ngoko Yozefu anowire, kundi Yozefu abya n’oyukamubindulira ebinywa byabo omo mubughe wiwe.
24 Neryo Yozefu mwalua aho bali, amayalira. Mwabya abisuba oho bali, amatasyabugha nabo. Mwimya Simeoni, amamuboha ibanalangire.
25 Neryo Yozefu mwabwira abaghombe biwe ati busulaye akalyo* omo mifuko y’abaghala babo, kandi ati basubaye esyofranga sy’obuli mundu omo saki yiwe. Kandi mwababwira ati babahe endanda eyo bakendilira omo nzira. Neryo abaghombe abo mubakola batya.
26 Neryo abaghala babo Yozefu mubasambirya akalyo* k’oko syopunda syabo n’erighenda.
27 Babere bahika aho bakendighotsera, omughuma wa kubo mwakingula omufuko wiwe akasonda erilusyamo akalyo k’eriha epunda yiwe. Mwalw’inialangira esyofranga siwe omo mufuko wiwe.
28 Neryo mwabwira abaghala babo ati: “Si yono mubakasubayamo esyofranga syaghe. Sine omo mufuko!” Emitima yabo muyatsuka eripuka-puka. Mubatungererana ibanemutitimana n’eribugha bati: “Kwe lero, oMungu naye amatukoleraki?”
29 Mubabya babihika e Kanana eyiri baba wabo, ye Yakobo, mubamubwira ebyosi ebiryabahikira. Mubamubwira bati:
30 “Omulume oyo wimanire ekihugho kye Misri mwakabugha netu omo bukali-kali, kandi mwakabugha ati tuli bapelelezi.
31 Aliwe mutukamubwira tuti, ‘Tuli bandu abatunganene, situli bapelelezi.
32 Tuli bana 12, kandi tuwite baba mughuma. Mughala wetu mughuma syakiriho, n’akatungo ketu mukakasighala haghuma na baba wetu omo kihugho kye Kanana.’
33 Aliwe omulume oyo, oyo wimanire ekihugho kye Misri, mwakatubwira ati, ‘Ekikendileka inaminya ngoko muli bandu abatunganene kya kino: Munisighire mughala wenyu mughuma, neryo inywe mwimaye akalyo, mughende, ebihanda byenyu bikasyaghalwa busana n’enzala.
34 Kandi muniletere akatungo kenyu, neryo ngendiminya ngoko simuli bapelelezi, aliwe muli bandu abatunganene. Mwamabikola mutya, ingendibasubulirya mughala wenyu, kandi imwanganakola ekomerse omo kihugho kino.’”
35 Omughulu babya bakalusya akalyo omo mifuko yabo, esyofranga sy’obuli mundu syabya isine omo mufuko wiwe. Ibo na baba wabo babere babilangirasyo, mubakwa obuba.
36 Neryo Yakobo, baba wabo, mwababwira ati: “N’ingye mukalusayako abana. Yozefu syakiriho, na Simeoni naye syakiriho. Kandi yoyo muti mukaheka na Benyamini. Ebyosi ebyo oko mutwe waghe! Ko naghe niri mungahi?”
37 Aliwe Rubeni mwabwira baba wiwe ati: “Namatendikusubulirya ye, iwita baghala baghe babiri. Abye omo mutwe waghe, ngendikusubulirya ye.”
38 Aliwe Yakobo mwamubwira ati: “Mughala waghe syendindaghala nenyu, kundi mughala wabo abirihola. Iye musa yukisigha. Omwatsi owatuwene amamuhikira omo lughendo neryo iniahola, aho imukendibya imwamabindaghalirya esyombwi syaghe sy’omo Yisinda* inine omo bulighe.”
Amaelezo awehikwa
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Alinga engano kutse kisusu.
^ Kutse “Sheoli,” ni bugha ambu, eyisinda y’abandu bosi.” Ulebaye Amaana w’ebinywa.
