Enzuko 43:1-34
43 Enzala muyakala omo kihugho.
2 Mubabya babibugha akalyo* ako balusaya e Misri, baba wabo mwababwira ati: “Musube e Misri mutasyayatughulira akalyo kake.”
3 Yuda mwabwira baba wiwe ati: “Omulume oyo mwatubwira ndeke-ndeke ati, ‘Isimwanasyatapima erihika embere syaghe mute na mughala wenyu.’
4 Wamabibugha uti tughende na mughala wetu, itukendindaghala n’eriyakughulira akalyo.
5 Aliwe wamabibugha uti sitwendighenda naye, isitwendindaghala, kundi omulume oyo mwatubwira ati, ‘Isimwanasyatapima erihika embere syaghe mute na mughala wenyu.’”
6 Neryo Israeli mwabugha ati: “Mulyatahikakoki erinikolera ekingaha n’ekyo omw’imubwira muti munawite oko ghundi mughala wenyu?”
7 Mubamusubirya bati: “Omulume oyo mwakasonda eriminya ebingyi okw’itwe n’oko batunga betu. Mwakatubulaya ati, ‘Baba wenyu akineho? Mukinawite oghundi mughala wenyu?’ Ko tulyamubwira emyatsi eyo yo tutya. Tulyendiminya tuti ngoko akendibugha ati, ‘Muniletere mughala wenyu’?”
8 Neryo Yuda mwahatikana baba wiwe ati: “Leka nighende n’omulwana. Leka tughende, tukasyahola, itwe, iwe, n’abana betu.
9 Namayisinga erimuteya. Amabya omo mutwe waghe. Nitetakusubulirya ye, ingendibya inamakuhalyako olosi.
10 Ngatutalyalinda-linda, ngambe lino twabiriyayo ngendo kabiri n’erisubula.”
11 Neryo Israeli, baba wabo, mwababwira ati: “Byamabya iko biri bitya, kwesi muyire mutya: Muhire omo mifuko yenyu mw’ebindu ebyuwene-wene by’omo kihugho kino, ni bugha ambu, akaluma kake, obuki buke, amatsitsi w’elabdanumu, ebikuku by’omuti ebirimo amatsitsi, esyopistashe, n’esyolozi.* Mumutwalirebyo mo kihembo.
12 Mwimaye ngendo ibiri esyofranga esingaha n’esyo mwaheka, mwimaye n’esyofranga esyo basubaya omo mifuko yenyu. Alinga mubayiteba.
13 Mughende na mughala wenyu, musube eyiri omulume oyo.
14 OMungu, Omutoki w’Ebyosi, akimire omo mulume oyo, abakwire obulighe kusudi abasubuliraye mughala wenyu na Benyamini. Aliwe namabya isinendisyabya n’abana, ibyabya bitya!”
15 Neryo abaghala ba Israeli mubimya ekihembo ekyo, bamimya n’esyofranga singaha n’esyo baghenda nasyo ngendo ibiri. Neryo mubaghenda e Misri haghuma na Benyamini, bamatasyayahika embere sya Yozefu.
16 Yozefu mwabya abilangira ngoko bamabyasa na Benyamini, mwalw’iniabwira omughombe wiwe oyo wabya akimanira enyumba yiwe, ati: “Twala abalume aba b’eka. Ukere esyonyama n’erihuka akalyo, kundi ngendirya nabo oko medi.”
17 Omulume oyo mwalw’iniakola ngoko Yozefu alyabugha, amatwalabo omwa Yozefu.
18 Aliwe mubabya babibatwala omo nyumba ya Yozefu, mubasagha. Mubatsuka eribugha bati: “Bamatuleta hano busana n’esyofranga esyo basubaya omo mifuko yetu omughulu twabya eno engendo y’erimbere. Bakendituhamba n’erituyira mo bakobe n’erimya esyopunda syetu!”
19 Neryo mubaya eyiri omulume oyo wabya akimanira enyumba ya Yozefu, bamakania naye oko mulango w’enyumba.
20 Mubamubwira bati: “Mukama, utughanyire. Mutwasa engendo y’erimbere tukasyaghula akalyo.
21 Aliwe tukasubula, mutwahika aho tukendighotsera, neryo mutwakingula emifuko yetu. Twabere twabikingulayo, esyofranga sy’obuli mundu, esyosi syabya isine omo saki yiwe mwendata-ndata. Twanzire erisubulyasyo.
22 Kandi twabiryasa n’esindi franga sy’erighulako akalyo. Sitwasi oyo wasubaya esyofranga esyo omo mifuko yetu nga nindi.”
23 Neryo mwababwira ati: “Sihali mbugha. Simusaghe. OMungu wenyu, kandi oMungu wa baba wenyu, yo wahira esyofranga esyo omo mifuko yenyu. Esyofranga syenyu munabanasyo. N’enyuma sy’aho, mwabaletera Simeoni.”
24 Neryo omulume oyo mwabingirya omo nyumba ya Yozefu, mwabaha amaghetse w’erinaba oko bisando, amaha n’esyongamia syabo sy’akalyo.
25 Neryo mubateghekania ekihembo ekyo bakendiha Yozefu omughulu akendihika oko medi, kundi babya ibabiriminya ngoko bakendilira aho.
26 Yozefu mwabya abingira omo nyumba, mubamuha ekihembo, bamakukama n’erihira obusu bwabo bw’oko kitaka embere siwe.
27 Enyuma sy’aho, Yozefu mwababulya nga banuwene, kandi mwatasyabugha ati: “Baba wenyu, oyo wabirikekeluha oyo mwahula, anuwene? Akineho?”
28 Mubamusubirya bati: “Baba wetu, omughombe waghu, anuwene. Kandi akineho.” Neryo mubakukama n’erihira obusu bwabo oko kitaka embere siwe.
29 Mwabya abilangira Benyamini, mughala wabo oyo babutenwe naye omo nda nguma,* mwabugha ati: “Aka k’akatungo kenyu ako mwahula?” Mwatasyabugha ati: “OMungu akukanganaye olukogho lwiwe, mughala waghe.”
30 Neryo Yozefu mwatatoka eriyikakirya abilangira mughala wabo. Neryo mwahuluka luba-luba eriyarondya ah’erilirira. Neryo mwingira ekati amayalirirayo.
31 Enyuma sy’aho, mwanaba omo busu. Neryo rero iniamabitulera, mwahuluka, amabuga ati: “Mulete akalyo.”
32 Yozefu mwalya bwiwe, abaghala babo mubalira bwabo, n’Abamisri bamalira bwabo, kundi Abamisri isibangalya haghuma n’Abaebrania kusangwa ekyo ini kibi oko Bamisri.
33 Baghala babo Yozefu babya bikere embere siwe eritsuka oko kambere kundi iyo mukulu, erihika oko katungo kundi iyo mulere. Babya bakasamalirana, kandi ibabirisweka.
34 Mwabya akimya oko kalyo akabya oko meza yiwe, inialabiryako oko meza yabo. Mwabya akaha Benyamini y’akalyo kanene. Akalyo ako abya akamuha kabya kanene ngendo katano kulenga k’abandi. Neryo mubalya n’erinywa, bamughuta.
Amaelezo awehikwa
^ Alinga engano kutse kisusu.
^ Kutse “n’esyo amande.”
^ Kinywa kwa kinywa, “mughala wa mama wiwe.”
