Enzuko 44:1-34
44 Enyuma sy’aho, Yozefu mwabwira omulume oyo wabya akimanira enyumba yiwe ati: “Usulaye emifuko y’abalume aba, uhiremo akalyo kanene ako bangatoka eriheka, kandi uhire esyofranga sy’obuli mundu omo mufuko wiwe mw’endata-ndata.
2 Kandi uhire ekikombe* kyaghe, eky’efeza,* omo mufuko w’akatungo mw’endata-ndata. Uhiremo n’esyofranga esyo alyaghulako akalyo.” Neryo omulume oyo mwakola ngoko Yozefu amubwira.
3 Omo tututu ibwamabikya, mubalekabo baghende n’esyongamia syabo.
4 Babya imo banamalua omo muyi, isibebahika hali, neryo Yozefu mwabwira omulume oyo wabya imanire enyumba yiwe ati: “Kwamirira abalume abo! Ukendibya wabibahikako, ubabwire uti, ‘Omukama waghe mwakabakolera ebyuwene, busanaki inywe mumukamukolera ekibi?
5 Busanaki mumukaheka ekikombe* ekyo mukama waghe akanywiramo, kandi ekikamuwatikaya eriminya ebikendisyabya? Mumukakola ekituwene.’”
6 Neryo mwaghenda. Abere abihika kubo, amababwira ebinywa ebyo.
7 Mubamusubirya bati: “Mukama, busanaki ukabugha utya? Itwe baghombe baghu sitwangakola ekyo.
8 Sunasi ngoko mutwalua e Kanana tukasubulya esyofranga esyabya omo mifuko yetu. Neryo tukenditsuka tuti eriba efeza* kutse ehoro omo nyumba y’omukama waghu?
9 Ekikombe* ekyo kyamabisungika omo mufuko w’omughuma w’okw’itwe baghombe baghu, omundu oyo iniahola, n’itwe bandi itwabya bakobe b’omukama waghe.”
10 Neryo mwabugha ati: “Bibye ngoko mwamabugha: Oyo tukendisungako ekikombe* ekyo, yukendibya mukobe waghe, aliwe abandi bakendibya isibaliko lubanza.”
11 Neryo obuli mughuma mwakimirya omufuko wiwe w’ahisi, amakingulagho.
12 Omulume oyo mwakwesa-kwesa ekikombe* ekyo omo mifuko yabo, eritsuka oko mufuko w’omukulu erihika oko w’akatungo. Oko mwiso, ekikombe ekyo mukyasungika omo mufuko wa Benyamini.
13 Neryo mubatulanga esyongyimba syabo n’obuli mundu amasubya omuzigo wiwe oko punda yiwe, bamasuba omo muyi.
14 Omughulu Yuda n’abaghala babo bingira omo nyumba ya Yozefu, Yozefu abya iniakinemo. Neryo mubimana bamahira obusu bwabo oko kitaka embere siwe.
15 Yozefu mwababwira ati: “Mumukanikolera mutya busanaki? Simwasi ngoko omulume nga ngye anganaminyerera emyatsi?”
16 Yuda mwasubirya ati: “Tubughe tutiki, mukama? Twamabula eky’eribugha! Tukendikangania tuti ngoko mututitiba? OMungu w’ekwenene amabikangania ekosa y’abaghombe baghu. Lino twamabibya bakobe b’omukama waghe, itwe n’oyulyasungikako ekikombe!”*
17 Aliwe Yozefu mwabugha ati: “Sinangakola ekyo n’ahake! Oyulyasungikako ekikombe* kyaghe yukendibya mukobe waghe. Inywe bandi mughende, musube eyiri baba wenyu yo buholo.”
18 Yuda mwaseghera hakuhi na Yozefu, amamubwira ati: “Ngakusaba kisi, mukama waghe, uhulikirire omughombe waghu. Uleke abughe ekinywa kighuma kisa, isiwahitana oko mukobe waghu, kundi uli nga Farao.
19 Mukama waghe, muwatubulya itwe baghombe baghu uti, ‘Baba wenyu akineho? Munawite oko ghundi mughala wenyu?’
20 Neryo mukama wetu, mutwakubwira tuti, ‘Baba wetu akineho, aliwe abiribya musyakulu, kandi tunawite oghundi mughala wetu, akatungo ako baba abuta iniabiribya musyakulu, aliwe mughala w’abo katungo ako abirihola, n’akatungo ako ko kakisiya oko bana obo mama wako abuta, neryo baba wako akanzire.’
21 Enyuma sy’aho, muwatubwira itwe baghombe baghu uti, ‘Mulete akatungo kenyu nilole kuko.’
22 Aliwe mukama waghe, mutwabugha tuti, ‘Omulwana syangalua ahali baba wiwe. Amabiluaho, baba wiwe iniakahola.’
23 Neryo muwatubwira itwe baghombe baghu uti, ‘Isimwanasyatapima erihika embere syaghe mute n’akatungo kenyu.’
24 Neryo mukama waghe, mutwasuba eyiri baba, omughombe waghu, twamayamubwira ebyo wabugha.
25 Enyuma sy’aho, baba wetu mwatubwira ati, ‘Musube e Misri, muyatughulireyo akalyo kake.’
26 Aliwe mutwabugha tuti, ‘Sitwendindaghala. Tutetaghenda n’akatungo ketu, isitwendindaghala, kundi sitwangahika embere sy’omulume oyo tute n’akatungo ketu.’
27 Neryo baba wetu, omughombe waghu, mwatubwira ati, ‘Munasi ndeke-ndeke ngoko omukali waghe mwanibutira abana babiri basa b’obulume.
28 Aliwe omughuma syakiriho. Munayibwira niti: “Enyama y’omoli yanganabya iyabiri mutulanga mo bihande-bihande!” Neryo sindinatamulolako erihika lino.
29 Mwamatasyaheka n’oyu n’erimutwala ehali okw’ingye, omwatsi mubi amabimuhikira neryo iniahola, aho imukendibya imwamabindaghalirya esyombwi syaghe omo Yisinda* omo bulighe.’
30 “Baba waghe syangabyaho butsira omwana oyo. Namabisuba eyiri baba waghe, omughombe waghu, isiniri n’omwana oyo,
31 neryo akendibya abilangira ngoko omulwana oyo syali netu, akendilw’iniahola. Aho abaghombe baghu ibamandaghalirya esyombwi sya baba wetu, omughombe waghu, omo Yisinda* omo bulighe.
32 Ingye mughombe waghu mungayisinga niti omwana oyo akendibya omo mutwe waghe. Mungabugha niti, ‘Namatendikusubulirya omulwana, aho ingendibya inamabikuhalyako iwe baba waghe olosi.’
33 Neryo kisi, mukama waghe, ingye nibye mukobe waghu omo mwanya w’omulwana oyo, neryo omulwana asubule n’abaghala babo.
34 Sinangasuba eyiri baba nite n’omulwana oyo. Sinanzire baba akaghalwa!”
Amaelezo awehikwa
^ Kutse “olutehi.”
^ Ni kindu ky’obughuli ekikalua omo kitaka.
^ Kutse “olutehi.”
^ Ni kindu ky’obughuli ekikalua omo kitaka.
^ Kutse “Olutehi.”
^ Kutse “olutehi.”
^ Kutse “olutehi.”
^ Kutse “olutehi.”
^ Kutse “olutehi.”
^ Kutse “Sheoli,” ni bugha ambu, eyisinda y’abandu bosi.” Ulebaye Amaana w’ebinywa.
^ Kutse “Sheoli,” ni bugha ambu, eyisinda y’abandu bosi.” Ulebaye Amaana w’ebinywa.
