Enzuko 46:1-34
46 Israeli mwimya ebyosi* ebyo abya nabyo, amaghenda. Mwabya abihika e Beeri-sheba, mwaherera oMungu wa baba wiwe Isaka y’obuhere.
2 Neryo, omo kiro, oMungu mwakania na Israeli omo nzoli. Mwamubirikira ati: “Yakobo, Yakobo!” Yakobo mwamusubirya ati: “Ingye y’ono.”
3 OMungu mwamubwira ati: “Ingye Mungu w’ekwenene, oMungu wa baba waghu. Isiwasagha erindaghalira e Misri, kundi eyo ngendikuyiramo kihanda kinene.
4 Naghe ingyuwene-wene ngendindaghalira e Misri haghuma naghu, kandi n’ingye ngendisyakulusyayo. Na Yozefu akendisyahira ebyala biwe oko meso waghu.”*
5 Enyuma sy’aho, Yakobo mwalua e Beeri-sheba, n’abaghala ba Israeli mubaheka Yakobo, baba wabo, abana babo, n’abakali babo omo mitoka eyo Farao atuma ati iyamuheke.
6 Mubaheka n’esyonyama syabo n’ebindu byabo ebyo babya ibabiritunda omo kihugho kye Kanana, neryo Yakobo n’ekihanda kiwe kyosi mubahika e Misri.
7 Yakobo mwaghenda e Misri n’abaghala biwe, abali biwe, n’abitsikulu biwe, ni bugha ambu, olubuto lwiwe losi.
8 Aya w’amena w’abaghala ba Israeli, ni bugha ambu, abaghala ba Yakobo abo aghenda nabo e Misri: Rubeni yo wabya kambere ka Yakobo.
9 Abaghala ba Rubeni babya Hanoki, Palu, Hezroni na Karmi.
10 Abaghala ba Simeoni babya Yemueli, Yamini, Ohadi, Yakini, Zohari, na Shauli, oyo Simeoni abuta oko mukali Mukanana.
11 Abaghala ba Lawi babya Gershoni, Kohati, na Merari.
12 Abaghala ba Yuda babya Eri, Onani, Shela, Perezi, na Zera. Aliwe Eri na Onani mubaholera omo kihugho kye Kanana.
Abaghala ba Perezi babya Hezroni na Hamuli.
13 Abaghala ba Isakari babya Tola, Puva, Iobu, na Shimroni.
14 Abaghala ba Zabuloni babya Seredi, Eloni, na Yaleli.
15 Abo bo b’aghala ba Lea abo abutira Yakobo e Padani-aramu haghuma n’omwana w’obukali oyukahulawa mo Dina. Abaghala n’abali* biwe bosi babya 33.
16 Abaghala ba Gadi babya Zifioni, Hagi, Shuni, Ezboni, Eri, Arodi, na Areli.
17 Abaghala ba Asheri babya Imna, Ishva, Ishvi na Beria, na mwali wabo abya Sera.
Abaghala ba Beria babya Heberi na Malkieli.
18 Aba b’abaghala ba Zilpa, omughombe oyo Labani aha mwali wiwe ye Lea. Abana bosi abo Zilpa abutira Yakobo babya 16.
19 Abaghala ba Rakeli, muka Yakobo, babya Yozefu na Benyamini.
20 E Misri, Asenati mwali wa Potifera omuhereri we Oni* mwabutira Yozefu yo Manase na Efraimu.
21 Abaghala ba Benyamini babya Bela, Bekeri, Ashbeli, Gera, Naamani, Ehi, Rosi, Mupimu, Hupimu, na Ardi.
22 Abana bosi b’obulume abo Rakeli abutira Yakobo babya 14.*
23 Omughala* wa Dani abya Hushimu.
24 Abaghala ba Naftali babya Yazeeli, Guni, Yezeri, na Shilemu.
25 Aba b’abaghala ba Bila, omughombe oyo Labani aha mwali wiwe Rakeli. Abana bosi b’obulume abo Bila abutira Yakobo babya 7.*
26 Abana bosi* ba Yakobo abaghenda naye e Misri babya 66, erilusyako abalyana biwe.
27 Abana b’obulume abo Yozefu abutira e Misri babya babiri.* Abosi* b’omo nyumba ya Yakobo abaya e Misri babya 70.
28 Yakobo mwatuma Yuda ati ayabwire Yozefu ngoko hakisiya hake iniahika e Gosheni. Mubabya babihika Gosheni,
29 Yozefu mwabugha ati bateghekanaye omutoka wiwe, neryo mwayalindirira baba wiwe e Gosheni. Mwabya abiyiminyisha okw’iye, amalw’iniamukumbatira* n’erilira omo katambi kalebe.*
30 Neryo Israeli mwabwira Yozefu ati: “Ibwa nanganahola sasa! Namabilangira obusu bwaghu, n’eriminya ngoko ukineho.”
31 Neryo Yozefu mwabwira abaghala babo n’ekihanda kya baba wiwe ati: “Muleke ngatsuka nayabwira Farao niti, ‘Abaghala betu, n’ekihanda kya baba waghe, ababya omo kihugho kye Kanana, babiryasa eyo niri.
32 Aliwe, abandu abo ni balisya, bakatunga esyonyama. Babiryasa n’esyombuli syabo, esyombene syabo, esyonde syabo, n’ebyosi ebyo bawiteko.’
33 Farao amabibabirikira n’eribabulya ati, ‘Mukakola mubiiri ki?’
34 Ritolere imwamubwira muti, ‘Abaghombe baghu ni balisya eritsuka omo bulwana erihika na lino, eritsuka n’oko botata-kulu wetu.’ Mumubwire mutya mutoke erikala omo kihugho kye Gosheni, kundi Abamisri baponire omulisya wosi-wosi w’esyombuli.”
Amaelezo awehikwa
^ Kutse “abosi.”
^ Ni bugha ambu, erilibagho Yakobo abihola.
^ Kutse “esyonafi syosi sy’abaghala n’abali biwe bosi.”
^ Ni bugha ambu, Heliopolisi.
^ Kutse “syonafsi 14.”
^ Kinywa kwa kinywa, “Abaghala.”
^ Kutse “esyonafsi 7.”
^ Kutse “Esyonafsi syosi.”
^ Kutse “esyonafsi ibiri.”
^ Kutse “Esyonafsi syosi.”
^ Kinywa kwa kinywa, “mwawa oko bikya biwe.”
^ Kutse “mwawa oko bikya biwe mo ngendo-ngendo.”
