Enzuko 47:1-31
47 Yozefu mwayabwira Farao ati: “Baba waghe n’abaghala betu babirilua omo kihugho kye Kanana. Mubakasa n’esyombuli syabo, esyombene syabo, esyonde syabo, n’ebyosi ebyo bawiteko. Babirihika e Gosheni.”
2 Yozefu mwimya abaghala babo batano, amabatwala embere sya Farao.
3 Neryo Farao mwabulya abaghala babo Yozefu ati: “Mukakola mubiiri ki?” Nabo mubasubirya Farao bati: “Itwe baghombe baghu tuli balisya b’esyombuli eritsuka oko botata-kulu wetu.”
4 Kandi mubabwira Farao bati: “Mutukasa erikala omo kihugho kino ng’abagheni, kundi itwe baghombe baghu sitwangatasyabana ah’erilisirya, kusangwa enzala yabirikala omo kihugho kye Kanana. Kisi, utulighire itwe baghombe baghu erikala omo kiharo kye Gosheni.”
5 Neryo Farao mwabwira Yozefu ati: “Baba wenyu n’abaghala benyu babiryasa eyo uli.
6 Ekihugho kye Misri ni kyaghu. Uhe baba waghu n’abaghala benyu ekiharo ekyuwene kutsibu ky’omo kihugho kino, bikale mukyo. Bikale omo kiharo kye Gosheni. Kandi omw’ibo mwamabya imune abasi erilisya, ubahe omubiiri w’eritsunga esyonyama syaghe.”
7 Neryo Yozefu mwayaminyisya baba wiwe Yakobo oko Farao, na Yakobo mwatsumula Farao.
8 Farao mwabulya Yakobo ati: “Uli n’emyaka mingahi?”
9 Yakobo mwasubirya Farao ati: “Niri n’emyaka 130. Ngabya ininemuhuma-huma. Nabiryaghalwa omo myaka eyo, aliwe ni mike erilinganisyayo n’emyaka eyo abotata-kulu waghe babugha bakahuma-huma.”*
10 Enyuma sy’aho, Yakobo mwatsumula Farao, n’erilua embere sya Farao.
11 Neryo Yozefu mwaha baba wiwe n’abaghala babo ah’erikala omo kihugho kye Misri. Mwabaha ekiharo ekyuwene kutsibu ky’omo kihugho kye Misri, ngoko Farao anabugha. Ekiharo eky’abaha kyabya e Ramsesi.
12 Neryo Yozefu abya akaha baba wiwe, abaghala babo, n’ekihanda kyosi kya baba wiwe b’akalyo.* Abya akaha obuli mundu y’akalyo erikwamana n’abana abo awiteko.
13 Sihabya akalyo omo bihugho byosi, kundi enzala muyakala kutsibu. Abandu omo kihugho kye Misri n’ekye Kanana mubanekera busana n’enzala.
14 Yozefu abya akakuma-kuma esyofranga syosi esyabya sikalua oko kalyo* ako abandu be Misri n’abandu be Kanana babya bakaghula. Abya akatwalasyo ewa Farao.
15 Endambi muyahika esyofranga syamahwa oko bandu be Misri n’abe Kanana. Neryo Abamisri bosi mubatsuka eryasa eyiri Yozefu bati: “Utuhe akalyo, esyofranga syetu syabirihwa. Neryo twanganahola ighunalangire?”
16 Neryo Yozefu mwabugha ati: “Esyofranga syenyu syamabya isyabirihwa, mubye mukaleta esyonyama syenyu. Mukendibya mukambasyo, naghe inabaha akalyo.”
17 Neryo mubatsuka eribya bakaletera Yozefu y’esyonyama syabo. Neryo amabya akabaha akalyo, nabo ibamuha esyosabayiri,* esyombuli, esyombene, esyonde, n’esyopunda. Neryo omo mwaka wosi oyo, mwabya akabaha akalyo, nabo ibamuha esyonyama syabo syosi.
18 Omwaka oyo mwahwa. Neryo oko ghundi mwaka, mubayabwira Yozefu bati: “Mukama wetu, sitwendikubisa mwatsi. Twabirikuha esyofranga syetu, n’esyonyama syetu. Mukama wetu, situkiwite eky’erikuha. Emibiri yetu n’amalima byo tukinawiteko bisa.
19 Tukendihola tuti ighunalangire? N’amalima wetu akendibya kisuki ighunalangire? Utughule, itwe n’amalima wetu, neryo utuhe akalyo. Itwe tukendibya bakobe ba Farao, n’ebitaka byetu bikendibya biwe. Utuhe embuto tukasyahola, n’amalima wetu akasyabya kisuki.”
20 Neryo Yozefu mwaghulira Farao y’ebitaka byosi by’Abamisri. Obuli Mumisri mwaghulya eririma riwe, kundi enzala yabya iyabirikala kutsibu. Neryo ebitaka byosi mubyabya bya Farao.
21 Neryo Yozefu mwabwira abandu bosi ababya omo milongo ye Misri ati bahumire omo miyi.
22 Ebitaka by’abahereri byo Yozefu ataghula, kundi Farao yo wabya akalisya abahereri. Neryo kundi babya ibakalya akalyo ako Farao abya akabaha, ekyo kyo kyaleka ibataghulya ebitaka byabo.
23 Neryo Yozefu mwabwira abandu ati: “Inywe n’ebitaka byenyu si mwamabibya ba Farao, kundi nabiribaghula. Neryo embuto yeyi, muyahereyo omo malima.
24 Ebyalya bikendisyabya byabyera, imwaghababyo ngendo itano. Esehemu nguma, imwahayo Farao, aliwe esyosehemu ini sikendisyabya syenyu. Syo mukendisyabya mukalusyako embuto y’erihera, akalyo ako mukendisyabya mukalya, inywe, abali omo manyumba wenyu, n’abana benyu.”
25 Neryo mubamusubirya bati: “Wabirileka itutahola. Mukama wetu, utukanganaye olukogho. Tukendibya bakobe ba Farao.”
26 Neryo Yozefu mwahiraho omughambo owakabugha ati: Obuli mundu akendisyabya abyerya akalyo, akendisyabya akaghabako ngendo itano. Neryo akendisyabya akaha esehemu nguma yo Farao. Omughambo oyo akine erihika na munabwire. Ebitaka by’abahereri bisa byo Farao atimaya.
27 Israeli mwaendelea erikala e Misri, omo kiharo kye Gosheni, iye n’ekihanda kiwe. Mubikala mukyo, bamabuta n’erikanyirira kutsibu.
28 Yakobo mwabugha omo kihugho kye Misri mw’emyaka 17. Neryo mwahola iniawite oko myaka 147.
29 Omughulu Israeli asonda erihola, mwabugha ati bayende mughala wiwe, ye Yozefu. Neryo mwamubwira ati: “Wamabya iwabirinisima, kisi hira ebyala byaghu eyikwa w’ekihinga kyaghe. Kandi unikanganaye olukogho n’obutaleghula. Kisi, isiwanita e Misri.
30 Omughulu ngendisyahola,* ritolere iwanilusya omo kihugho kye Misri, iwayanita omo yisinda y’abotata-kulu waghe.” Neryo Yozefu mwamubwira ati: “Ngendikola ngoko wamabugha.”
31 Neryo Israeli mwabugha ati: “Unilapire.” Neryo Yozefu mwamulapira. Neryo Israeli munamya omutwe oko museghemo w’engyingo yiwe.
Amaelezo awehikwa
^ Kutse “bakikala ng’omugheni.”
^ Kinywa kwa kinywa, “b’omukati.”
^ Alinga engano kutse kisusu.
^ Kutse “esyofarasi; esyoshevale.”
^ Kinywa kwa kinywa, “ngendisyaghotsera n’abo tata-kulu waghe.”
