Enzuko 48:1-22
48 Enyuma sy’aho, mubabwira Yozefu bati: “Baba waghu anemuluha.” Neryo Yozefu mwaghenda n’abaghala biwe babiri, ye Manase na Efraimu.
2 Mubabwira Yakobo ambu: “Mughala waghu Yozefu abirisyakubana.” Neryo Israeli mwayikalya-kalya, n’erikala oko ngyingo yiwe.
3 Neryo Yakobo mwabwira Yozefu ati:
“OMungu, Omutoki w’Ebyosi, mwanihulukira e Luzi, omo kihugho kye Kanana n’erinitsumula.
4 Mwanibwira ati, ‘Ngendisyakuha abana banene n’erikuyira mo kihanda kinene. Kandi ngendisyakuyira mo bitunga by’abandu, kandi ngendisyaha ekihugho kino ky’abana baghu. Kikendisyabya kyabo kera na kera.’
5 Neryo abana baghu babiri, abo wabutira omo kihugho kye Misri embere niase e Misri eyo uli, ni baghe. Efraimu na Manase bakendisyabya baghe ngoko Rubeni na Simeoni ni baghe.
6 Aliwe abana abo ukendisyabuta enyuma sy’aho bo bakendisyabya baghu. Bakendisyahulwa omo mena w’abaghala babo. Kandi bakendisyahabwa oko mwandu w’abaghala babo.
7 Omughulu nabya ngalua e Padani, Rakeli mwaniholerako omo kihugho kye Kanana. Aliwe habya ihakine olughendo luli embere tuhike e Efrati. Neryo munamuta omo nzira eyikaya e Efrati, ni bugha ambu, e Betlehemu.”
8 Neryo Israeli mwalangira abaghala ba Yozefu, amabulya Yozefu ati: “Aba nabo ni bahi?”
9 Yozefu mwasubirya baba wiwe ati: “Aba ni baghala baghe abo Mungu abirimba omo kihugho kino.” Neryo Israeli mwabugha ati: “Kisi, letabo hano, nitsumulebo.”
10 Israeli abya isyalisyalangira ndeke busana n’obusyakulu. Habya ihakisiya hake iniabya ndime-time. Neryo Yozefu mwasegherya abaghala biwe hakuhi na Israeli, na Israeli mwahabo ebizu n’erikumbatirabo.
11 Israeli mwabwira Yozefu ati: “Nabya isinasi nga ninemwendisyasyalola oko busu bwaghu. Aliwe oMungu abiriniwatikya erilola nibya n’oko bana baghu.”
12 Neryo Yozefu mwalusya abaghala biwe oko maru wa Israeli, amakukama n’erihira obusu bwiwe b’oko kitaka.
13 Neryo Yozefu mwimya abaghala biwe babiri. Mwahamba Efraimu omo byala biwe by’amali atoke eribya oko luhande lw’amalembe lwa Israeli. Mwahamba na Manase omo byala biwe by’amalembe atoke eribya oko luhande lw’amali lwa Israeli. Neryo mwasegheryabo hakuhi na Israeli.
14 Aliwe Israeli mwakakya ebyala biwe by’amali, amahirabyo oko mutwe wa Efraimu, nomo Efraimu abya iyo mulere. Mwahira n’ebyala biwe by’amalembe oko mutwe wa Manase. Mwayiririra, kundi abya inianasi ngoko Manase yo kambere.
15 Neryo mwatsumula Yozefu n’eribugha ati:
“OMungu w’ekwenene, oyo abobaba waghe Abrahamu na Isaka balendera embere siwe,OMungu w’ekwenene, oyuli mulisya waghe omo ngebe yaghe yosi erihika na munabwire,
16 Omumalaika, oyo wabya akanisabula omo maligho waghe wosi, atsumule abalwana aba.
Bahulawe omo rina ryaghe, n’omo rina ry’abobaba waghe, Abrahamu na Isaka,Bakanyirire n’eribya banene oko kihugho.”
17 Yozefu mwabya abilangira ngoko baba wiwe syetalusya ebyala biwe by’amali oko mutwe wa Efraimu, mwapona. Neryo mwasonda erilusya ebyala bya baba wiwe oko mutwe wa Efraimu, n’erihirabyo oko mutwe wa Manase.
18 Yozefu mwabwira baba wiwe ati: “Baba, isiwakola utya, kundi ono yo kambere. Oko mutwe w’ono ko uhire ebyala byaghu by’amali.”
19 Aliwe baba wiwe mwaghana n’eribugha ati: “Ninasi, mughala waghe, ninasi. Naye akendisyabuta abana banene. Kandi naye akendisyabya mukulu, aliwe omulere wiwe akendisyabya mukulu kumulenga, n’abana b’omulere wiwe bakendisyabya banene n’eribya bitunga by’abandu.”
20 Ekiro ekyo, mwalola embere eribatsumula n’eribugha ati:
“Abaisraeli babye bakakwahula omughulu bakatsumula abandi, babye bakabugha bati,‘OMungu akuyire nga Efraimu na Manase.’”
Neryo Israeli mwahira Efraimu endata oko Manase omughulu abya akabatsumula.
21 Neryo Israeli mwabwira Yozefu ati: “Hakisiya hake inahola, aliwe oMungu akendisyabya iniane haghuma nenyu. Kandi akendisyabasubya omo kihugho ky’abotata-kulu wenyu.
22 Aliwe ingye, namakuha n’ekindi kitaka* kulenga ekyo ngaha baghala benyu. Ekitaka ekyo nimayakyo oko Baamori omo muyali waghe, n’obuta* bwaghe.”
