Enzuko 49:1-33
49 Yakobo mwabirikira abaghala biwe, amababwira ati: “Muhindane haghuma. Ngendibabwira ebikendisyabahikira omo biro by’enduli.
2 Muhindane haghuma n’erihulikirira, inywe baghala ba Yakobo. Muhulikirire baba wenyu, ye Israeli.
3 “Rubeni, iwe kambere kaghe, akaghala kaghe, enzuko y’obutoki bwaghe bw’eributa. Wabya n’olukengerwa lunene n’akaghala kanene.
4 Aliwe kundi ukahumayira* ng’amaghetse awaghungire, siwendisyabya mukulu, kundi muwasambira oko ngyingo ya baba waghu. Oko mughulu oyo, muwatsandya engyingo yaghe. Batahi tu mwasambira kuyo!
5 “Simeoni na Lawi ni baghala. Bakakolesaya ebindu byabo by’amalwa erikola obutsururu.
6 Isiwabya ukatamba nabo, iwe nafsi* yaghe. Isiwabya ukasiba nabo, iwe rina* ryaghe, kundi busana n’erihitana, mubita abandu. Kandi busana n’eriyitsemesya, mubatwa emiki y’oko maru w’esyonume sy’esyonde.
7 Ekinigha kyabo kitakirawe, kundi sikirimo obulighe. N’erikapikira ryabo ritakirawe, kundi rikalire. Leka nibapanza-panzire omo kihugho kya Yakobo. Kandi leka nibapanza-panzire omo Israeli.
8 “Iwe Yuda, abaghala benyu bakendisyabya bakakupipa. Ebyala byaghu bikendisyahamba ebikya by’esyonzighu syaghu. Abana ba baba waghu bakendisyakukama embere syaghu.
9 Yuda ni kyana ky’esimba. Mughala waghe, ukendisyahangana wabirya enyama eyo ulyita. Abiribundama n’eriyikakya ng’esimba, nindi yo wangayitswa erimubukya?*
10 Omutso w’obwami syendisyalua omo Yuda, n’omutso w’omukomanda syendisyalua omo kati-kati k’amaghulu wiwe, erihika omughulu Shilo* akendisyasa, n’oyo yo bandu bosi bakendisyakenga.
11 Akabohera epunda yiwe oko muti w’omuzabibu n’ekyana ky’epunda yiwe oko muti w’omuzabibu oghuwene. Akendisyabya akafula esyongyimba siwe omo divai, n’olukimba lwiwe omo musasi w’emizabibu.
12 Edivai ikaleka ameso wiwe iniabya w’erangyi y’omusasi eyikinire, n’amaziwa akaleka ameno wiwe iniabya w’erangyi y’omusohe.*
13 “Zabuloni akendisyikala oko musike w’engetse, hakuhi n’omusike w’engetse aho amato akimana. Omupaka w’ekiharo kiwe akendisyahika ebwanga e Sidoni.
14 “Isakari ni punda eyiriko amakuha awakala-kalire. Akabundama omo kati-kati k’emifuko ibiri eyo ahekire.
15 Akendisyalangira ngoko ah’akaluhukira huwene, kandi ngoko ekihugho kyuwene. Akendisyakondomya ebitigho biwe busana n’eriheka emizigo. Akendisyaligha erikola omubiiri w’erikaswa.
16 “Dani, ekihanda kighuma ky’omo bihanda bye Israeli, akendisyabya akatswera abandu.
17 Dani abye ng’enzoka eyiri oko musike w’enzira, enzoka eyiriko amahembe oko musike w’enzira eyikaluma esabayiri* oko hisinziro, n’eryo oyuli oko sabayiri iniawa kinyume-nyume.
18 Yehova, ngendisyalinda erihika omughulu ukendisyatusabula.
19 “Abakanyegha bakendisyabambira Gadi, aliwe iye akendisyabambirabo oko hisinziro.
20 “Asheri akendisyabya n’akalyo* kanene, kandi akendisyabya akerya akalyo ako mwami atolere erirya.
21 “Naftali ni ngabi y’obukali eyanguhire. Akabugha ndeke.
22 “Yozefu ni mutahi w’omuti owakahetaya amatunda, w’omuti owali hakuhi n’engununuko y’amaghetse, ogho mitahi yagho yilabire ndata oko luhimbo.
23 Aliwe abalasi b’emisali mubabya bakalwa naye. Mubabya bakamughusako emisali n’erimubikako ekinigha.
24 Aliwe akinahambirire obuta* bwiwe, n’ebyala biwe bikine n’akaghala, kandi bikinanguhire. Byabya bitya busana n’ow’amaka oyukawatikaya Yakobo, omulisya, eribwe rya Israeli.
25 Yozefu ni kihembo ky’oMungu oyo baba waghu akakolera, n’oMungu oyo akendikuwatikya. Kandi Yozefu ane haghuma n’Omutoki w’Ebyosi. N’Omutoki w’Ebyosi akendikuha emiyisa eyikandaghala erilua elubula, emiyisa eyikalua omo kitaka mw’emwisi-si, kandi akendikuha abana banene n’esyonyama nene.*
26 Emiyisa ya baba waghu ikendisyabya minene kulenga emiyisa y’ebitwa bya kera na kera. Kandi ikendisyabya minene kulenga ebindu ebyuwene by’ehitwa hya kera na kera. Siyendisyalua oko mutwe wa Yozefu, oko kaghuli-ghuli k’omutwe w’oyo balusaya oko baghala babo.
27 “Benyamini akendisyabya akatulanga esyonyama ng’eboha. Omo tututu, akendisyalya enyama eyalyita, n’omw’igholo iniaghaba ebyo alyanyegha omo malwa.”
28 Abosi abo bo baluamo ebihanda 12 bye Israeli, n’ebyo by’ebinywa ebyo baba wabo abwirabo omughulu abya akabatsumula. Mwaha obuli mundu y’emiyisa eyimutolere.
29 Enyuma sy’aho, mwababwira ati: “Ngendihindanibwa n’abandu baghe.* Munite aho bata abo baba waghe, omo mwangalu owali omo ririma rya Efroni Omuhiti,
30 omwangalu owali omo ririma rye Makpela, owahererenie ne Mamre, omo kihugho kye Kanana, eririma eryo Abrahamu aghula oko Efroni Omuhiti, busana n’eritaho omukali wiwe.
31 Aho ho bata Abrahamu na mukali wiwe Sara, kandi aho ho bata Isaka na mukali wiwe Rebeka, naghe aho ho nata Lea.
32 Eririma n’omwangalu owali muryo byaghulawa oko baghala ba Heti.”
33 Yakobo mwabya abibugha eriha abaghala biwe b’ebyalayiro ebyo, mwasubya ebisando biwe oko ngyingo, amatwa omutima n’erihindanibwa oko bandu biwe.*
Amaelezo awehikwa
^ Kutse “busana n’eritendiyikakirya.”
^ Ulebaye Amaana w’ebinywa.
^ Kutse kandi, “malengekania.”
^ Kutse “erimutengulya.”
^ Ni bugha ambu “omwinyekyo.”
^ Kutse “y’enzeru; ye blanc.”
^ Kutse “efarasi; eshevale.”
^ Kinywa kwa kinywa, “n’omukati.”
^ Ni kindu ky’erilasamo emisali.
^ Kinywa kwa kinywa, “emiyisa y’amabere n’enda.”
^ Ni binywa by’ekisosekanio ebikamaanisaya erihola.
^ Ni binywa by’ekisosekanio ebikamaanisaya erihola.
