Enzuko 50:1-26
50 Neryo Yozefu mwayighusa oko baba wiwe, mwalirira oko baba wiwe iniane mumukumbatira.
2 Enyuma sy’aho, Yozefu mwabwira abaghombe biwe, abanganga, ati bahire oko mubiri wa baba wiwe kw’edawa akasyahonda. Neryo abanganga mubahira oko Israeli kw’edawa.
3 Mubamuhirako edawa omo biro 40, kundi ebyo by’ebiro ebyo bakabugha bakahira oko kinda kw’edawa kikasyahonda. N’Abamisri bosi mubalira Israeli omo biro 70.
4 Ebiro by’erimulira byabere byabilaba, Yozefu mwayabwira abakakolera oko bwikalo* bwa Farao ati: “Mwamabya imwabirinisima, mubwire Farao muti:
5 ‘Baba waghe mwanilapisya ati: “Hakisiya hake inahola. Ukendisyanita omo yisinda yaghe eyo nayitakulira omo kihugho kye Kanana.” Neryo kisi, munileke niyate baba waghe. Ngendibya nabimuta, inasubula.’”
6 Farao mwamusubirya ati: “Ghenda, uyate baba waghu, ngoko akulapisaya.”
7 Neryo Yozefu mwayata baba wiwe. Mwaghenda n’abaghombe bosi ba Farao, abasyakulu abakakolera oko bwikalo bw’omwami, n’abasyakulu bosi b’omo kihugho kye Misri,
8 abandu bosi b’omo nyumba ya Yozefu, abaghala babo n’enyumba yosi ya baba wiwe. Abana babo balere basa bo basighala omo kiharo kye Gosheni, haghuma n’esyombuli sy’abo, esyombene, n’esyonde sy’abo.
9 Mubaghenda n’emitoka n’abakaghenda oko syosabayiri.* Babya bandu banene kutsibu.
10 Neryo mubahika ahali ekihumbiro kye Atadi, ekiri omo kiharo kye Yordani. Babere bahika eyo, mubabya omo bulighe, bamalira kutsibu. Yozefu mwalira baba wiwe omo biro 7.
11 Abakalani b’omo kihugho ekyo, ni bugha ambu, Abakanana babere babilangira bakalirira ahali ekihumbiro kye Atadi, mubabugha bati: “Abamisri bali omo kiriro kinene!” Kyo kyaleka omwanya oyo iniahulwamo Abele-mizraimu.* Omwanya oyo ali omo kiharo kye Yordani.
12 Neryo abaghala biwe mubakola ngoko anababwira.
13 Abaghala biwe mubamutwala omo kihugho kye Kanana. Mubamuta omo mwangalu owabya omo ririma rye Makpela, erihererenie ne Mamre, eryo Abrahamu aghula oko Efroni Omuhiti, busana n’erita mukali wiwe.
14 Yozefu abere abita baba wiwe, mwasuba e Misri n’abaghala babo n’abosi abamukwama akayata baba wiwe.
15 Abaghala babo Yozefu babere balangira ngoko baba wabo abirihola, mubabugha bati: “Yozefu anganabya iniabiritubikako ekinigha. Neryo eryo naye akenditukolera muhanda, kundi netu mutwamukolera muhanda.”
16 Neryo mubatuma omulaghe ono oko Yozefu: “Embere ahole, baba waghu mwabugha ati:
17 ‘Mukendisyabwira Yozefu muti, “Kisi, ngakusaba niti ughanyire ekosa y’abaghala benyu, n’erilolo eryo bakukolera omw’ikwaghalya kutsibu.”’ Neryo kisi, utughanyire, itwe baghombe b’oMungu wa baba waghu.” Babere babimubwira batya, Yozefu mwalira.
18 Neryo abaghala babo n’abo mubasa, bamunama embere siwe, n’eribugha bati: “Tuli bakobe baghu!”
19 Yozefu mwababwira ati: “Simusaghe. N’ingye Mungu kwe?
20 Inywe, mwabya mwazire erinikolera muhanda, aliwe oMungu abya anzire eribindula emyatsi mibi eyo mo myatsi eyuwene, n’eriteya engebe y’abandu bangyi, n’ekyo kyo anemukola munabwire.
21 Neryo simusaghe. Sinendileka eribaha akalyo, inywe n’abana benyu balere.” Neryo mwabakirania n’eribasubya omutima w’omo nda.
22 Yozefu mwaendelea erikala omo kihugho kye Misri, iye n’ekihanda kya baba wiwe. Yozefu mwahola iniawite emyaka 110.
23 Yozefu mwalangira oko bana ba Efraimu erihika oko kizazi* ky’akasatu. Mwalola n’oko bana ba Makiri, mughala wa Manase. Yozefu iniakabakolera ng’abana biwe-biwe.*
24 Yozefu abere akasonda erihola, mwabwira baghala babo ati: “Nikisiya inahola, aliwe oMungu syendisyabibirirwa. Akendisyabalusya omo kihugho kino, n’eribatwala omo kihugho ekyo alapa eriha Abrahamu, Isaka na Yakobo.”
25 Neryo Yozefu mwalapisya abaghala ba Israeli ati: “Ninasi ngoko oMungu syendisyabibirirwa. Isimwanasyatasigha amakuha waghe w’eno.”
26 Neryo Yozefu mwahola iniawite emyaka 110. Mubamuhirako edawa akasyahonda. Mubamuhira omo sanduku e Misri.
Amaelezo awehikwa
^ Kutse “nyumba.”
^ Kutse “syofarasi; syoshevale.”
^ Ni bugha ambu “ekiriro ky’Abamisri.”
^ Kutse “lulengo.”
^ Kinywa kwa kinywa, “Mubabutirwa oko maru wa Yozefu.”
