Enzuko 6:1-22
6 Abandu babere babibya banene oko kihugho, n’abambesa babibutwa,
2 abana b’oMungu w’ekwenene mubalangira ngoko abambesa abo abandu babuta ni babuya. Neryo mubatsuka eriyimirya abakali bosi abo banzire.
3 Neryo Yehova mwabugha ati: “Sinendivumilia omundu yo kera na kera, kundi akakola amalolo.* Busana n’ekyo, emyaka yiwe ikendibya 120.”
4 Oko mughulu oyo, n’enyuma sy’aho, Abanefili babya ibane oko kihugho. Oko mughulu oyo, abana b’oMungu w’ekwenene mubaghotsera n’abambesa abo bandu babuta, n’abambesa abo mubababutira abana b’obulume. Abana abo bo babya bandu b’akaghala b’oko mughulu oyo, kandi abalume abakumayire.
5 Neryo Yehova mwalangira ngoko obubi bw’abandu bwabirikanyirira oko kihugho, kandi ngoko omughulu wosi amalengekania w’omutima wabo ni mabi.
6 Yehova mwayikubya b’omo* ng’alyahira omundu oko kihugho busanaki, kandi mwaghalwa* omo mutima.
7 Neryo Yehova mwabugha ati: “Ngendibugha abandu abo nabumba oko kihugho. Ngendibughaho abandu, esyonyama sy’eritunga, esyonyama esikayikura, n’ebihangyikwa ebikaghuluka omo kyanya, kundi nabiriyikubya b’omo nga nahangyikabyo busanaki.”
8 Aliwe Yehova mwatsemera Noa.
9 Ehistoria ya Noa y’eno:
Noa abya mundu oyutunganene. Syabyako ehinywa-hinywa* omo kati-kati k’abandu b’oko mughulu wiwe. Noa mwalendera n’oMungu w’ekwenene.
10 Ebiro bikalaba, Noa mwabuta abana basatu b’obulume. Habya Semu, Hamu, na Yafeti.
11 Aliwe, ekihugho kyabya ikyabiritsanda omo meso w’oMungu w’ekwenene, n’ekihugho kyabya ikyabiryusulamo obutsururu.
12 OMungu mwasamalira ekihugho, amalangira ngoko kyabiritsanda. Abandu bosi* ababya oko kihugho babya ibabiritsanda.
13 Enyuma sy’aho, oMungu mwabwira Noa ati: “Nabiriyisogha eribughaho abandu bosi, kundi babirileka ekihugho ikyusulamo obutsururu, neryo ngenditsandyabo n’ekihugho.
14 Uyihimbire obwato* omo muti w’egoferi. Ukendihiramo ebyumba, kandi ukendipakako egudro emwisi n’ehihya.
15 Ukendihimbabo utya: Obuli bwabo bukendibya amaboko 300,* obughali bwabo bukendibya amaboko 50, n’obuli bwabo eriya endata bukendibya amaboko 30.
16 Ukendikokotya eridirisa erikendibya rikingirya ekyakakala omo bwato.* Rikendibya ry’okuboko kughuma erilua oko lutwe. Ukendihira omulango w’obwato oko ndambi-ndambi yabo. Kandi ukendihiramo e etaje y’eyikwa, e etaje y’akabiri, ne etaje y’akasatu.
17 “Naghe ngendileta eribwagha ry’amaghetse oko kihugho nitoke eritsandya ebihangyikwa byosi ebikahumula* ebiri eyikwa w’elubula, ebyosi ebiri oko kihugho bikendihola.
18 Kandi ngakola endaghane haghuma naghu. Wingire omo bwato,* iwe n’abaghala baghu, omukali waghu, n’abakali b’abaghala baghu.
19 Wimaye oko buli muhanda w’esyonyama kw’ibiri-biri, neryo wingirayesyo omo bwato,* iwe nasyo mukasyahola. Wingiraye ey’obulume n’ey’obukali.
20 Wimaye ibiri-biri omo mihanda mbiriri-mbiriri y’ebihangyikwa ebikaghuluka, omo mihanda mbiriri-mbiriri y’esyonyama sy’eritunga, n’omo mihanda mbiriri-mbiriri y’esyonyama syosi esikayikura oko kitaka, wingirayesyo omo bwato* sikasyahola.
21 Naghu wimaye obuli muhanda w’akalyo, ubikeko, iwe n’esyonyama mukasyabula eky’erirya.”
22 Noa mwakola ebyosi ebyo oMungu amubwira. Mwakola ngoko anabwirawa.
Amaelezo awehikwa
^ Kutse “ni w’omubiri.”
^ Kutse “mwaghalwa.”
^ Kutse “mwateseka.”
^ Kutse “Abya mundu musa-musa; Abya aluyirirene; Syabyako bulema.”
^ Kinywa kwa kinywa, “Emibiri yosi.”
^ Kutse “esafina.”
^ Okuboko kughuma ni santimetre 44,5. Ulebaye Endomeko B14.
^ Kutse “safina.”
^ Kutse “ebirimo ekirimu ky’engebe.”
^ Kutse “safina.”
^ Kutse “safina.”
^ Kutse “safina.”
