Enzuko 7:1-24
7 Enyuma sy’aho, Yehova mwabwira Noa ati: “Iwe n’ekihanda kyaghu kyosi mwingire omo bwato,* kundi nabirilangira ngoko utunganene omo kati-kati k’abandu b’ekizazi* kino.
2 Omo buli muhanda w’esyonyama esy’erire, wimaye esyonyama 7,* ey’obulume n’ey’obukali; n’omo buli muhanda y’esyonyama esiterire, wimaye esibiri sisa, ey’obulume n’ey’obukali;
3 N’omo buli muhanda w’ebihangyikwa ebikaghuluka omo kyanya, wimaye ebihangyikwa 7,* ey’obulume n’ey’obukali, sikasyahola kandi sikasyahwa oko kihugho.
4 Kundi hakisiya ebiro 7 inaleta embula oko kihugho omo biro 40, omw’itungyi n’omo kiro, kandi ngendibugha oko kihugho kw’ebihangyikwa byosi ebiriho ebyo nabumba.”
5 Neryo Noa mwakola ebyosi ebyo Yehova amubwira.
6 Noa abya n’emyaka 600 omughulu eribwagha ry’amaghetse ryasa oko kihugho.
7 Noa, abaghala biwe, omukali wiwe, n’abalyana biwe, mubingira omo bwato* embere amaghetse atsuke eribwagha oko kihugho.
8 Esyonyama syosi esyerire, esyonyama syosi esiterire, ebihangyikwa ebikaghuluka, n’ebihangyikwa byosi ebikaghenda oko kitaka
9 mubyasa eyiri Noa n’eringira omo bwato* mo bibiri-bibiri, ey’obulume n’ey’obukali, ngoko oMungu anabwira Noa.
10 Muhabya habihwa ebiro 7, eribwagha ry’amaghetse muryasa oko kihugho.
11 Ekiro 17 ky’omwisi w’akabiri, Noa iniamabiyira emyaka 600, ekiro ekyo esyongununuko syosi sy’elubula musyatububukamo amaghetse, n’emilango y’elubula eyikasiramo amaghetse muyakingukala.
12 Embula muyawa oko kihugho omo biro 40, omw’itungyi n’omo kiro.
13 Omo kiro ekyo kisa-kisa, Noa mwingira omo bwato* haghuma n’abaghala biwe, ye Semu, Hamu, na Yafeti, n’omukali wiwe, n’abalyana biwe basatu.
14 Mubingiramo n’obuli muhanda w’esyonyama sy’omoli, obuli muhanda w’esyonyama esikatungawa, obuli muhanda w’esyonyama esikayikura, obuli muhanda w’ebihangyikwa ebikaghuluka, obuli muhanda w’enyunyu, n’obuli muhanda w’ebihangyikwa ebiriko ebipupa.
15 Obuli muhanda w’ebihangyikwa ebikahumula,* mubyabya bikasa eyiri Noa omo bwato* mo bibiri-bibiri.
16 Emihanda yosi y’ebihangyikwa muyingiramo, eby’obulume n’eby’obukali, ngoko oMungu anabwira Noa. Enyuma sy’aho, Noa abingira omo bwato,* Yehova mwakinga omulango.
17 Embula muyalola embere eriwa oko kihugho omo biro 40, n’amaghetse mwakanyirira n’eritsuka eriheka obwato.* Neryo mubwaleleta endata oko kihugho.
18 Amaghetse mwabya manene kutsibu, amakanyirira kutsibu oko kihugho. Aliwe obwato* mubwaleleta oko maghetse.
19 Amaghetse mwakanyirira kutsibu oko kihugho, amahika n’oko kika ky’eriswika ebitwa biri-biri byosi ebyabya eyikwa w’elubula.
20 Amaghetse mwalenga oko bitwa, mwahika oko syometre 6,5 endata kubyo.
21 Neryo ebihangyikwa byosi ebiriho ebikaghenda oko kitaka mubyahola, ni bugha ambu, ebihangyikwa ebikaghuluka, esyonyama esikatungawa, esyonyama sy’omoli, ehinyama hike-hike, n’abandu bosi.
22 Ebyosi ebyabya oko kitaka ebyabya bikahumula* mubyahola.
23 Neryo oMungu mwatoghotya ebihangyikwa byosi ebiriho ebyabya oko kihugho, ni bugha ambu, abandu, esyonyama, esyonyama esikayikura, n’ebihangyikwa ebikaghuluka omo kyanya. Ebyosi mubyahwa oko kihugho. Noa musa n’ababya naye omo bwato* bo basaka.
24 Amaghetse mwaswika ekihugho omo biro 150.
Amaelezo awehikwa
^ Kutse “safina.”
^ Kutse “b’olulengo.”
^ Kutse kandi, “esyonyama 14 omo buli muhanda w’esyonyama esyerire.”
^ Kutse alinga, “ebihangyikwa 14 ebikaghuluka omo kyanya.”
^ Kutse “safina.”
^ Kutse “safina.”
^ Kutse “safina.”
^ Kutse “ebirimo ekirimu ky’engebe.”
^ Kutse “safina.”
^ Kutse “safina.”
^ Kutse “esafina.”
^ Kutse “esafina.”
^ Kutse “ebyabyamo ekirimu ky’engebe.”
^ Kutse “safina.”
