Enzuko 8:1-22
8 Enyuma sy’aho, oMungu mwibuka Noa, esyonyama syosi sy’omoli, n’esyonyama syosi esikatungawa esyabya naye omo bwato.* Kandi oMungu mwalabya erihunga ry’oko kihugho, neryo amaghetse mwatsuka erikeha.
2 Esyongununuko sy’elubula n’emilango y’elubula eyikasiramo amaghetse mubyayikinga, neryo embula yamakya.*
3 Neryo amaghetse mwatsuka erikeha lyolo-lyolo oko kihugho. Habere habilaba ebiro 150, amaghetse mwakeha.
4 Omo kiro kye 17, omwisi we 7, obwato* mubwimana oko bitwa bye Ararati.
5 Amaghetse mwakeha lyolo-lyolo erihika oko mwisi we 10. Ekiro ky’ekwanza ky’omwisi we 10, esyosingyi sy’ebitwa musyalangirika.
6 Muhabya habihwa ebiro 40, Noa mwakingula eridirisa eryo ahira oko bwato.*
7 Neryo mwatuma ekikororo ky’ehihya. Mukyabya kikaghenda n’erisubula erihika omughulu amaghetse uma oko kihugho.
8 Enyuma sy’aho, Noa mwatuma akalikuku kayalebaye amaghetse ng’abirikeha oko kitaka.
9 Akalikuku mukatasunga ah’erikira, neryo mukasuba eyiri Noa omo bwato,* kundi amaghetse abya iniakinaswikire ekihugho kyosi. Neryo Noa mwahambako omo byala, amakasubya omo bwato.
10 Mwalinda ati halabe ebindi biro 7, neryo amatasyatuma akalikuku ehihya w’obwato.*
11 Bwabere bwabya igholo, akalikuku kamasubula. Neryo Noa mwalangira ikanahekire ekiti ky’omuzeituni omo buno bwako. Kabya imo kanamabilua eritwakyo. Neryo Noa mwaminya ngoko amaghetse abirikeha oko kihugho.
12 Kandi mwalinda ati halabe ebindi biro 7, neryo kandi mwatuma akalikuku. Aliwe mukatasyasuba omo bwato.*
13 Ekiro ky’ekwanza ky’omwisi w’ekwanza, Noa iniabiriyira emyaka 601, amaghetse muma oko kihugho. Neryo Noa mwalusya oko bwato* k’olutwe, amalangira ngoko ekitaka kyabiryuma.
14 Ekiro 27, omwisi w’akabiri, ekihugho kyabya ikyabiryuma.
15 Neryo oMungu mwabwira Noa ati:
16 “Ulua omo bwato,* iwe haghuma n’omukali waghu, abaghala baghu, n’abalyana baghu.
17 Uhulukaye ebihangyikwa byosi ebiriho, ni bugha ambu, ebihangyikwa ebikaghuluka, esyonyama, esyonyama esikayikura sitoke erikanya,* eributa, n’eribya sinene oko kihugho.”
18 Neryo Noa mwalua omo bwato* haghuma n’abaghala biwe, omukalli wiwe, n’abalyana biwe.
19 Ebihangyikwa byosi ebiriho, esyonyama syosi esikayikura, ebihangyikwa byosi ebikaghuluka, esyonyama syosi esikaghenda oko kitaka, musyaluamo mo bikuto-bikuto.*
20 Neryo Noa mwahimbira Yehova y’ekiherero. Mwimya esyonyama silebe omo syonyama syosi esyerire, n’omo bihangyikwa byosi ebikaghuluka eby’erire, amaherera amahere w’eryokererya oko kiherero.
21 Yehova mwowa akakumbo akuwene.* Neryo Yehova mwayibwira omo mutima ati: “Sinendisyasyatakira* ekitaka busana n’omundu, kundi amalengekania w’omutima wiwe ni mabi eritsuka omo bulwana bwiwe; kandi sinendisyasyatsandya ebihangyikwa ebiriho ebyo nahangyika.
22 Eritsuka lino, omughulu w’erihera embuto n’erighesa,* embeho n’ekihuhania, omughulu w’ekihuhania kinene n’omughulu w’embeho nene, eritungyi n’ekiro, sibyendisyahwa oko kihugho.”
Amaelezo awehikwa
^ Kutse “safina.”
^ Kutse “yamakakiribwa.”
^ Kutse “esafina.”
^ Kutse “esafina.”
^ Kutse “safina.”
^ Kutse “w’esafina.”
^ Kutse “safina.”
^ Kutse “safina.”
^ Kutse “safina.”
^ Kutse “eryusula.”
^ Kutse “safina.”
^ Kinywa kwa kinywa, “erikwamana n’ebihanda byasyo.”
^ Kutse “akakatuleraya; akakabonderaya.” Kinywa kwa kinywa, “akakaluhukaya.”
^ Kutse “Sinendisyatsuma.”
^ Kutse “n’erisoloma; n’erihulula.”
