Enzuko 9:1-29
9 OMungu mwatsumula Noa n’abaghala biwe. Mwababwira ati: “Mubute, mubye bangyi, n’eryusulya ekihugho.
2 Ebihangyikwa byosi ebiriho ebiri oko kihugho, ebihangyikwa byosi ebikaghuluka omo kyanya, ebihangyikwa byosi ebikaghenda oko kitaka, n’esyonyama syosi sy’omo ngetse sikendibya sikabasagha n’eribakwa obuba. Namakuhabyo, utabalebyo.
3 Wanganalya esyonyama syosi esikaghenda, kandi esiriho. Namakuhasyo, esyosi ngoko nabirikuha ebiti.
4 Aliwe isiwalya enyama n’engebe* yayo, ni bugha ambu, omusasi wayo.
5 Kandi ngendiha amalipizi obuli mundu oyukuta omusasi wenyu.* Ngendiha amalipizi obuli kihangyikwa ekiriho, n’obuli mundu oyukita omughala wabo.
6 Omundu amabyuta omusasi w’oghundi mundu, naye omusasi wiwe iniakendisyutibwa n’omundu, kundi oMungu mwabumba omundu omo kisosekanio kiwe.
7 Aliwe inywe, mubute, mubye banene, mukanyirire oko kihugho, n’eryusulamo.”
8 Neryo oMungu mwabwira Noa n’abaghala biwe ati:
9 “Ngakola endaghane haghuma nenyu n’abana benyu,
10 kandi haghuma n’ebihangyikwa byosi ebiriho ebiri haghuma nenyu, ni bugha ambu, esyonyunyu, esyonyama, ebihangyikwa byosi by’oko kihugho ebiriho kandi ebiri haghuma nenyu, ebyosi ebiryalua omo bwato,* ni bugha ambu, ebihangyikwa byosi ebiriho kandi ebiri oko kihugho.
11 Ngakola endaghane eno haghuma nenyu: Sinendisyasyatsandya ebihangyikwa byosi ebiriho omo maghetse awakabwagha, kandi sinendisyasyatsandya ekihugho omo maghetse awakabwagha.”
12 Kandi oMungu mwabugha ati: “Kino kyo kikendibya kikakangania endaghane eyo ngakola haghuma nenyu, kandi haghuma n’ebihangyikwa byosi ebiriho, ebiri haghuma nenyu, n’abandu bosi abakendisyabyaho enyuma syenyu:
13 Ngahira ekima kyaghe omo bitu. Kikendisyabya kikakangania endaghane eyo niryakola n’ekihugho.
14 Omughulu ngendisyabya ngaleta ekitu endata oko kihugho, ekima kikendisyabya kikalangirika omo bitu.
15 Neryo ngendisyabya ng’ibuka endaghane eyo nakola haghuma nenyu, haghuma n’emihanda yosi y’ebihangyikwa ebiriho, kandi amaghetse syendisyasyabwagha busana n’eritsandya ebihangyikwa byosi ebiriho.*
16 Omughulu ekima kikendisyabya kikalangirika omo bitu, ngendisyabya ngalangirakyo n’eryibuka endaghane ya kera na kera eyo nakola n’ebihangyikwa byosi ebiriho ebiri oko kihugho.”
17 Kandi oMungu mwasubirira omo ebyo abwira Noa ati: “Kino kyo kikendibya kikakangania endaghane eyo ngakola n’ebihangyikwa byosi ebiri oko kihugho.”
18 Abaghala ba Noa abalua omo bwato* babya Semu, Hamu, na Yafeti. Enyuma sy’aho, Semu mwabuta Kanana.
19 Abalume basatu abo babya baghala ba Noa. Abo bo babuta abandu bosi abusula oko kihugho.
20 Noa mwatsuka eribya akalima. Mwahera emizabibu.
21 Kiro kighuma, mwanywa edivai, amatamira, amalusya esyongyimba siwe iniane omo hema yiwe.
22 Hamu, baba wa Kanana, mwalangira obusoni bwa baba wiwe, amayakanirya abaghala babo babiri ababya ehihya.
23 Neryo Semu na Yafeti mubimya olukimba, bamahiralo oko bitigho byabo, bamingira omo hema bunyume-nyume n’eriswika obusoni bwa baba wabo. Kundi mubingiramo bunyume-nyume, mubatalangira obusoni bwa baba wabo.
24 Bwabere bwabimuhwako, Noa mwowa ebyo mughala wiwe mulere alyakola.
25 Noa mwabugha ati:
“Kanana atakirawe.
Abye mukobe w’omwiso w’omo bakobe b’abaghala babo.”
26 Kandi mwabugha ati:
“Yehova, oMungu wa Semu, apipawe,Na Kanana abye mukobe wiwe.
27 OMungu ahe Yafeti ekiharo kinene,Kandi ikale omo syohema sya Semu.
Kandi Kanana abye mukobe wa Yafeti.”
28 Erighunga ry’amaghetse ryabere ryabihwa, Noa mwabugha eyindi myaka 350.
29 Neryo Noa mwahola iniawite emyaka 950.
Amaelezo awehikwa
^ Kutse “n’enafsi.”
^ Kutse “omusasi w’esyonafsi syenyu.”
^ Kutse “safina.”
^ Kinywa kwa kinywa, “emibiri yosi.”
^ Kutse “safina.”
