Eribisulirwa eryo Yohana ahabawa 1:1-20
1 Eribisulirwa* rya Yesu Kristo, ery’oMungu amuha, atoke erikangania abakobe biwe b’emyatsi eyikisiya iyahika. Mwatuma omumalaika wiwe, n’omumalaika oyo mwakangania emyatsi eyo omukobe wiwe Yohana omo bisosekanio.
2 Yohana mwakania oko kinywa ky’oMungu, n’oko myatsi eyo Yesu Kristo amuha. Oko kwenene, mwakania oko myatsi yosi eyo alangira.
3 Omundu oyukasoma omo mulenge muli n’abakowa ebinywa by’obuminyereri ebi n’erikwama emyatsi eyihandikiremo batsemire, kundi omughulu ogho oMungu abirihiraho ali hakuhi.
4 Ingye Yohana ngahandikira esyondeko irinda (7) esiri omo kiharo kye Azia:
Olukogho n’obuholo “bw’Oyuliho, n’oyo w’abyaho, n’oyukasa,” bibye haghuma nenyu. Kandi olukogho n’obuholo obukalua oko birimu irinda (7) ebiri embere sy’ekitumbi ky’oMungu ky’obwami, bibye haghuma nenyu.
5 Kandi olukogho n’obuholo bwa Yesu Kristo, “Omwimiri* Mutaleghula,” “oyo watsuka erilubukibwa,” n’“Omutabali w’abami b’ekihugho,” bibye haghuma nenyu.
Oyutwanzire kandi oyo watulusaya omo bukobe bw’amalolo wetu erilabira omusasi wiwe,
6 kandi oyo wabirituyiramo bami* n’abahereri b’oMungu kandi Tata wetu, ahabawe olukengerwa n’obutoki kera na kera. Amina.
7 Mulebaye! Akasa omo bitu, n’obuli riso rikendisyamulangira. Nibya n’abamutsimita bakendisyamulangira, n’ebihanda byosi bikendisyayibandanga oko kikuba ibinemulira busana naye. Inga, amina.
8 Yehova* Mungu akabugha ati: “Ingye niri Alfa na Omega,* oyuliho, oyo w’abyaho, n’oyukasa, Omutoki w’Ebyosi.”
9 Ingye Yohana, omughala wenyu oyukaghalawa haghuma nenyu, oyukendisyatabala haghuma nenyu, n’oyukayiyinaya busana n’eribya mwigha wa Yesu, nabya omo kisanga* ekikahulawamo Patmosi, busana n’erikania oko Mungu n’erikania oko kwenene ya Yesu.
10 Ekirimu kibuyirire mukyanitwala omo kiro ky’Omukama. Neryo munowa omulenge munene akasira enyuma syaghe. Abya ng’omulenge w’engunga.
11 Mwabugha ati: “Ebyo wamalangira, uhandikebyo omo kitabu ky’erilinga, n’eritumirabyo esyondeko irinda (7): Eye Efeso, eye Smirna, eye Pergamo, eye Tiatira, eye Sardi, eye Filadelfia, n’eye Laodikia.”
12 Munabinduka n’erilebya oyukabugha naghe nga nindi. Neryo nabere nabibinduka, munalangira ebindu irinda (7) eby’erihirako esyotala ebikokotibwe omo horo.
13 Omo kati-kati k’ebindu ebyo eby’erihirako esyotala, mwabya omundu oyusosire omughala w’omundu. Abya iniambite olukimba oluhikire oko bisando. Kandi abya inianambite akakimba* ak’ehoro k’oko kikuba.
14 Omutwe n’esyonzwiri siwe byabya by’omusohe* ng’obweya bw’esyombuli, ng’enzururu. Ameso wiwe abya ng’ekirimi ky’omuliro.
15 N’ebisando biwe byabya bikangabasenie ng’ekwivre* eyuwene omughulu yikeribawa omo riko. N’omulenge wiwe abya ng’erihuha ry’olusi lunene.
16 Kandi abya iniane n’esyongununu irinda (7) omo byala biwe by’amali. N’omo buno bwiwe, mwabya imunemutububuka omuyali muli, owatwire, kandi owakatwira oko syombande ibiri. N’obusu bwiwe bwabya ibukangabasenie ng’eryuba omughulu rikakola kutsibu.
17 Nabere nabimulangira, munawa oko bisando biwe ng’omundu oyuholire.
Neryo mwanihirako ebyala biwe by’amali n’erinibwira ati: “Sighusaghe. Ingye niri Ow’erimbere n’Ow’omwiso,
18 n’oyuliho. Munahola, aliwe ulangire ngoko niriho kera na kera. Kandi niwite oko mafungura w’oluholo n’aw’Eyisinda.*
19 Neryo, uhandike emyatsi eyo ulyalangira, emyatsi eyikalaba lino, n’emyatsi eyikendisyabya enyuma sy’aho.
20 Esyongununu irinda (7) esyo ulyalangira omo byala byaghe by’amali n’ebindu irinda by’ehoro by’erihirako esyotala ni kumbo* nyibuyirire. Uminye ngoko esyongununu irinda sikasosekanaya abamalaika b’esyondeko irinda. N’ebindu irinda by’erihirako esyotala bikasosekanaya esyondeko irinda.
Amaelezo awehikwa
^ Kutse “Erikumbula.”
^ Kutse “Omutemwe.”
^ Kinywa kwa kinywa, “obwami.”
^ Ulebaye endomeko A5.
^ Kutse “A ne Z.” Alfa y’eharfu y’ekwanza y’olufabe lw’Ekigiriki, ne Omega y’eherufi y’omwiso.
^ Kutse “île.”
^ Kutse “eesharpe.”
^ Kutse “enzeru, blanc.”
^ Kutse “omulinga.”
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
^ Kutse “esiri.”
