Eribisulirwa eryo Yohana ahabawa 10:1-11
10 Kandi munalangira oghundi mumalaika w’amaka akalua elubula. Abya iniambite* ekitu. Oko mutwe wiwe kwabya ekima. Obusu bwiwe bwabya ng’eryuba. N’amaghulu* wiwe abya ng’esyonduyi sy’omuliro.
2 Kandi abya inianawite oko katabu kake k’erilinga omo byala biwe, ikanakingulire. Mwahira ekisando kiwe ky’amali ky’oko ngetse, n’ekisando ky’amalembe mwahirakyo oko kitaka.
3 Kandi mwabugha omo mulenge muli ng’esimba eyikaruruma. Abere abibugha omo mulenge muli, emilumo irinda (7) y’obutuku muyabugha.
4 Nabya ingasonda erihandika omughulu emilumo irinda (7) y’obutuku yabugha. Aliwe, omulenge mwalua elubula, mwabugha ati: “Uyire emyatsi eyo emilumo irinda y’obutuku iryabugha mo kumbo,* isiwahandikayo.”
5 Omumalaika oyo nalangira inianimene oko ngetse n’oko kitaka mwasumbira ebyala biwe by’amali elubula.
6 Mwalapa omo rina ry’oyuliho kera na kera, oyo wahangyika olubula n’ebyosi ebirimo, ekihugho n’ebyosi ebirimo, n’engetse n’ebyosi ebirimo. Mwalapa ati: “Sihendisyasyabya erilindirira.
7 Aliwe, omughulu omumalaika w’eririnda (7) akendisyasonda eribuha omo ngunga yiwe, ekumbo* nyibuyirire eyo Mungu abwira abakobe biwe abaminyereri mo ngulu mbuya, ikendisyahika oko nduli.”
8 Kandi munowa omulenge akalua elubula. Mwatasyanibwira ati: “Ghenda, wimaye ekitabu ky’erilinga ekikingulire ekiri omo byala by’omumalaika oyo wimene oko ngetse n’oko kitaka.”
9 Neryo munaya eyiri omumalaika n’erimubwira niti ambe akatabu kake k’erilinga. Mwanibwira ati: “Imayako, ulyeko. Kakendiluma* omo nda yaghu mo kutsibu, aliwe kakendisihirira ng’obuki omo buno bwaghu.”
10 Neryo munimya akatabu kake ako k’erilinga omo byala by’omumalaika, munalyako. Mukasihirira omo buno ng’obuki. Aliwe, munabya nabimerako, mukaluma omo nda yaghe.*
11 Kandi mubanibwira bati: “Ritolere iwatasyabugha obuminyereri obulebirye abandu, ebihanda, emibughe, n’abami bangyi.”
Amaelezo awehikwa
^ Kutse “aswikireko.”
^ Kinywa kwa kinywa, “N’ebisando.”
^ Kutse “siri.”
^ Kutse “esiri.”
^ Kinywa kwa kinywa, “kakendikaliha.”
^ Kinywa kwa kinywa, “mukakaliha.”
