Eribisulirwa eryo Yohana ahabawa 11:1-19
11 Neryo munahabwa oluseke oluli ng’efimbo.* Neryo mubanibwira ambu: “Hangana, upime ehekalu y’oMungu, ekiherero, n’erighanza abakaramiraya muyo.
2 Aliwe, uleke ekibugha ekiri eyihya w’ehekalu, isiwapimakyo, kundi kyabirihabwa abandu b’ebihanda. Bakendisyalyatangira omuyi owabuyirire omo misi 42.
3 Ngendisyatuma abimiri* baghe babiri eribugha obuminyereri omo biro 1 260 ibanambite esyongyimba sy’esaki.”*
4 Abimiri* babiri aba basosikanibwe n’emiti ibiri y’emizeituni n’ebindu bibiri by’erihirako esyotala. Kandi bimene embere sy’Omukama w’ekihugho.
5 Omundu amanza erihutalyabo, omuliro akalua omo buno bwabo n’eritimya esyonzighu syabo. Omundu amasonda erihutalyabo, kwatolere iniakwa atya.
6 Abimiri* babiri aba bali n’obutoki bw’erikinga ekyanya* kusudi embula isiyawa omo biro ebyo bakabugha obuminyereri. Bali n’obutoki bw’eribindula amaghetse mo musasi, n’erileta oko kihugho kw’emihanda yosi y’ebihunzo omughulu banzire.
7 Bakendisyabya babibugha eribugha obuminyereri, enyama y’omoli eyikalua omo kyuna kiri-kiri ikendisyalwa nabo. Ikendisyasingabo n’eriitabo.
8 N’ebinda byabo bikendisyabya oko ndaki nene y’omuyi munene, owakahulawa omo nzira y’ekisosekanio mo Sodomo ne Misri, eyo Mukama wabo naye akongomererawa oko muti.
9 Neryo abandu, ebihanda, emibughe, n’ebitunga by’abandu bakendisyasamalira ebinda by’abimiri* babiri abo omo biro bisatu n’enusu. Sibendisyalighira ebinda byabo eritabwa.
10 Kandi abandu abikere oko kihugho bakendisyatsema busana n’oluholo lw’abimiri* babiri abo, n’eriyisyandira. Kandi bakendisyatumirana ebihembo kundi abaminyereri babiri abo mubaghalya abandu abikere oko kihugho.
11 Ebiro ebisatu n’enusu byabere byabilaba, ekirimu ekikaha engebe ekikalua ew’oMungu mukingira mubo, neryo mubahangana. Abandu abalangirabo mubasagha kutsibu.
12 Neryo abaminyereri babiri abo mubowa omulenge muli akalua elubula. Mwababwira ati: “Muhetukire eno.” Neryo mubahetukira elubula omo kitu, n’esyonzighu syabo musyalangirabo.*
13 Oko ndambi eyo, muhabya omusiki munene, n’ekighuma ky’omwikumi ky’omuyi mukyatera. Neryo abandu 7 000 mubahola omo musiki, n’abandi mubasagha kutsibu n’eriha oMungu w’elubula y’olukengerwa.
14 Obulighe bw’akabiri bwamabilaba. Obulighe bw’akasatu bunemwasa luba-luba.
15 Omumalaika w’eririnda (7) mwabuha omo ngunga yiwe. Neryo emilenge miri muyalua elubula. Muyabugha yiti: “Obwami bw’ekihugho bwabiribya bw’Omukama wetu, n’obwa Kristo wiwe. Akendisyatabala kera na kera.”
16 Neryo abasyakulu 24 ababya bikere oko bitumbi byabo by’obwami embere sy’oMungu mubunama n’eriramya oMungu.
17 Mubabugha bati: “Tukakusima Yehova* Mungu, Omutoki w’Ebyosi, oyuliho, kandi oyo wabyaho, kundi wabirikolesya obutoki bwaghu bunene n’eritsuka eritabala.
18 Aliwe, abandu b’ebihanda mubahitana, n’ighuwene-wene muwahitana, n’endambi eyihirirweho muyahika, ey’eritswera abaholi n’erihemba abakobe baghu abaminyereri, ababuyirire, n’abakasagha erina ryaghu, abakulu n’abalere, n’eritsandya abakatsandaya ekihugho.”
19 Kandi ehekalu y’oMungu ey’elubula muyakingulwa, n’esanduku y’erilaghana muyalangirika omo hekalu yiwe. Neryo muhabya amapalyo, emilenge, emilumo y’obutuku, omusiki, n’eritsuku rinene.
Amaelezo awehikwa
^ Kutse “efimbo y’eripimamo.”
^ Kutse “abatemwe.”
^ Kutse “esyopiri, esyongyimba sy’ekiriro.”
^ Kutse “Abatemwe.”
^ Kutse “Abatemwe.”
^ Kutse “olubula.”
^ Kutse “ky’abatemwe.”
^ Kutse “lw’abatemwe.”
^ Kutse “isinemusamalira.”
^ Ulebaye endomeko A5.
