Eribisulirwa eryo Yohana ahabawa 12:1-17
12 Neryo omwatsi owakaswekaya mwahuluka elubula. Muhabya omukali oyo wabya ambite eryuba. Omughenda abya eyikwa w’ebisando biwe. N’oko mutwe wiwe kwabya embita y’esyongununu 12.
2 Abya mukule. Kandi abya akayilakira busana n’obulumi n’eryaghalwa kundi iniakisiya iniabuta.
3 N’oghundi mwatsi w’eriswekya mwalangirika elubula. Habya ekiyoka eky’erangyi y’omuliro. Kyabya n’emitwe irinda (7) n’amahembe ikumi, obuli mutwe abyako embita.
4 N’omukira wakyo mwakurubana ekighuma ky’ebisatu ky’esyongununu sy’elubula. Neryo mukyaghusasyo oko kihugho. Ekiyoka ekyo kyabya ikinimene embere sy’omukali oyo wabya iniakisiya iniabuta. Kyabya ikinimene aho kusudi omukali oyo akendibya abibuta, ikyalw’ikyatomera omwana wiwe.
5 Neryo omukali oyo mwabuta omulwana, omwana w’obulume, oyukendisyateya ebihanda byosi omo fimbo y’ekyuma. Omwana oyo mwalw’iniatwalwa eyiri oMungu, eyiri ekitumbi ky’obwami ky’oMungu.
6 Omukali oyo mwatibitira omo mbwarara. Eyo y’oMungu abya iniabirimuteghekanirya akanya. Eyo yo bangamuhere akalyo omo biro 1 260.
7 Neryo elubula muyabya amalwa: Mikaeli* n’abamalaika biwe mubalwa n’ekiyoka. N’ekiyoka n’abamalaika bakyo mubalwa.
8 Aliwe, ekiyoka ekyo n’abamalaika bakyo mubatasinga.* Kandi n’omwanya wabo mwatasyasungika elubula.
9 Neryo ekiyoka kinene mukyaghuswa, enzoka ya kera, ekikahulawamo Diabolo na Sitani, ekikatebaya ekihugho kyosi mukyaghuswa oko kihugho, n’abamalaika bakyo mubaghuswa haghuma nakyo.
10 Neryo munowa omulenge munene elubula akabugha ati:
“Lino omulamo, obutoki, n’Obwami bw’oMungu, n’obutoki bwa Kristo wiwe byamalangirika, kundi oyukatsongera abaghala betu abirighuswa, oyukabatsongera omo musibo n’omo kiro embere sy’oMungu wetu!
11 Mubamusinga busana n’omusasi w’Ekyana ky’Embuli kandi busana n’omwatsi ogho babya bakahubirya. Mubatalangira engebe* yabo mo y’omughaso, neryo mubatasagha erihola.
12 Busana n’ekyo, inywe lubula n’inywe mwikeremo, mutseme! Obulighe oko kihugho n’oko ngetse, kundi Diabolo abirindaghalira ewenyu iniabirihitana kutsibu, kundi anasi ngoko awite akatambi kake.”
13 Aliwe, omughulu ekiyoka kyalangira ngoko kyabirighuswa oko kihugho, mukyaghalya omukali oyo wabuta omwana w’obulume.
14 Aliwe, mubaha omukali y’ebipupa bibiri eby’erisamba rinene atoke erighulukira omo mbwarara, omo mwanya ogho bamuteghekaniraya, eyo bangamuhere akalyo omo mughulu, emighulu, n’enusu y’omughulu,* ehali oko nzoka.
15 Neryo ekiyoka mukyasalira amaghetse enyuma sy’omukali kitoke erimusendya. Amaghetse ayo abya ng’olusi lunene.
16 Aliwe, ekihugho mukyasyawatikya omukali. Mukyatanda obuno bwakyo n’erimera olusi lunene olo kiyoka kyasala.
17 Neryo ekiyoka mukyahitana oko mukali, n’eriyalwa n’abasighala oko lubuto lwiwe, abakakwama ebyalayiro by’oMungu, n’abali n’omubiiri w’eritula engulu eyilebirye Yesu.
Amaelezo awehikwa
^ Erina eryo rikamaanisaya “Nindi Yuli ng’oMungu?”
^ Kutse kandi, “aliwe, [ni bugha ambu, ekiyoka] mukyasingwa.”
^ Kutse “enafsi.”
^ Ni bugha ambu, emighulu isatu n’enusu.
