Eribisulirwa eryo Yohana ahabawa 13:1-18
13 Kandi ekiyoka mukimana oko mutsanga w’oko musike w’engetse.
Kandi munalangira enyama y’omoli ikalua omo ngetse. Yabya n’amahembe ikumi n’emitwe irinda (7), n’oko buli rihembe kwabya embita, n’oko mitwe yayo kwabya amena w’ebitsumi.
2 Enyama y’omoli eyo nalangira yabya ng’esoro, aliwe ebisando byayo byabya ng’ebisando by’edubu, n’obuno bwayo bwabya ng’obuno bw’esimba. Neryo ekiyoka mukyaha enyama y’omoli y’obutoki bwakyo n’ekitumbi kyakyo ky’obwami n’obutabali.
3 Munalangira omughuma w’oko mitwe yayo iniabiribya ng’abirihutala luhanya-hanya. Aliwe, ekironda kyayo mukyalama. Neryo ekihugho kyosi mukyakwama enyama y’omoli ikyabirikukubala.
4 Kandi mubaramya ekiyoka kundi mukyaha enyama y’omoli y’obutabali. Kandi mubaramya enyama y’omoli bakabugha bati: “Nindi yulingene n’enyama y’omoli, kandi nindi yo wangalwa nayo?”
5 Mubahayo obuno obukabugha ebinywa by’eriyiheka, n’ebitsumi. Kandi muyahabwa obutoki bw’erikola emyatsi omo misi 42.
6 Neryo muyakingula obuno bwayo n’eritsuma oMungu. Muyatsuma erina riwe, ahikere, nibya muyatsuma n’abikere elubula.
7 Enyama eyo muyahamulirwa erilwa n’ababuyirire n’erisingabo. Kandi muyahabwa obutoki oko buli kihanda, abandu, omubughe, n’oko buli kitunga.
8 Abandu bosi abikere oko kihugho bakendisyaramyayo. Eritsuka oko mughulu efondasyo y’ekihugho yahirawaho amena wabo syalyatahandikwa omo kitabu ky’erilinga ky’engebe ky’Ekyana ky’Embuli ekitibawa.
9 Oyuwite amatwi owe.
10 Omundu amabya iniatolere eriya omo bunyewa, akendiya omo bunyewa. Omundu amiita omo muyali, atolere iniakwa omo muyali. Busana n’ekyo, ritolere ababuyirire ibayiyinia n’eribya n’obwikirirya.
11 Kandi munalangira eyindi nyama y’omoli ikalua oko kihugho. Yabya n’amahembe ibiri awali ng’aw’Ekyana ky’Embuli, aliwe muyatsuka eribugha ng’ekiyoka.
12 Ikakolesaya obutoki bosi bw’enyama y’erimbere, kandi ikakola yitya omo meso w’enyama y’erimbere. Kandi ikaleka ekihugho n’abandu abikere mukyo ibaramya enyama y’omoli y’erimbere, eyalama yabihutala luhanya-hanya.
13 Kandi ikakola emyatsi y’eriswekya, kandi nibya ikandaghaliraya omuliro w’oko kitaka erilua elubula abandu ibanalangire.
14 Erilabira emyatsi y’eriswekya eyo yihamulirwe erikola omo meso w’enyama y’omoli, ikateba abandu abikere oko kihugho omwibabwira yiti bakole esanamu y’enyama y’omoli eyahutalibawa luhanya-hanya, aliwe muyalama.
15 Kandi muyahamulirwa eriha esanamu y’enyama y’omoli y’omuka kusudi esanamu y’enyama y’omoli yibughe n’eritisya abosi abakaghana eriramya esanamu y’enyama y’omoli.
16 Enyama y’omoli ikakasa abandu bosi, abakulu n’abalere, abateke n’abera, abandu abali bwiranda n’abakobe, erihirwako ekiminyikalo oko byala byabo by’amali kutse oko mbumo,
17 kusudi isihabya omundu oyukaghula kutse erighulya isyaliko ekiminyikalo ekyo, ni bugha ambu erina ry’enyama y’omoli kutse enimero y’erina ryayo.
18 Busana n’ekyo, ritolere eribya n’amenge. Oyuli n’amenge aghanze enimero y’enyama y’omoli kundi ni nimero y’omundu, n’enimero eyo ni 666.
