Eribisulirwa eryo Yohana ahabawa 14:1-20
14 Neryo munalangira Ekyana ky’Embuli ikinimene oko Kitwa kye Sioni n’abandu 144 000 babya haghuma nakyo. Oko syombumo syabo kwabya ikuhandikire erina ryakyo n’erina rya Tata wakyo.
2 Munowa omulenge akalua elubula. Abya ng’omulenge w’olusi lunene,* kandi abya ng’omulenge w’omulumo munene w’obutuku. Omulenge ogho nowa abya ng’omulenge w’abimbi, abakimba ibanemuwata esyonanga.
3 Kandi bakimba olwimbo oluli ng’olwimbo luhya-luhya. Bakimbiralo embere sy’ekitumbi ky’obwami, embere sy’ebihangyikwa bini ebiriho, n’embere sy’abasyakulu. Kandi sihabya omundu oyo wangatoka erimba olwimbo olo bate ib’abandu 144 000 abaghulawa oko kihugho.
4 Aba bo batayitsandaya omo bakali, ni babikira. Aba bakabya ibanemukwama Ekyana ky’Embuli ehosi-hosi eyo kikaya. Mubaghulwa omo kati-kati k’abandu batoke eribya ng’ebyalya by’erimbere-mbere ebikahererawa oMungu n’Ekyana ky’Embuli.
5 Kandi sibalibugha amabehi; sibaliko bulema.
6 Kandi munalangira oghundi mumalaika akaghuluka omo kati-kati k’ekyanya.* Abya n’engulu mbuya ya kera na kera y’eribwira abandu abikere oko kihugho, y’eribwira obuli kitunga, obuli kihanda, obuli mubughe, n’abandu bosi.
7 Abya akabugha omo mulenge muli ati: “Musaghe oMungu n’erimuha olukengerwa, kundi endambi yiwe y’eritswera yamabihika. Muramaye oyo wahangyika olubula, ekihugho, engetse, n’esyongununuko sy’amaghetse.”
8 N’oghundi mumalaika ow’akabiri mwasa, mwabugha ati: “Abiritera! Babeli Mukulu abiritera, oyukanywisaya ebihanda byosi edivai eyikaleka abandu ibabya n’engumbu nene y’erikola oburaghane* naye!”
9 Enyuma sy’abamalaika abo, muhasa oghundi ow’akasatu. Mwabugha omo mulenge muli ati: “Omundu amabiramya enyama y’omoli n’esanamu yayo, n’erihirwako ekiminyikalo oko mbumo kutse oko byala biwe,
10 naye iniakendinywa edivai y’erihitana ry’oMungu, edivai eyiteyahirwamo amaghetse eyo Mungu akuta omo kikombe kiwe. Kandi akendisyaghalibwa omo muliro n’omo sufre,* abamalaika babuyirire n’Ekyana ky’Embuli ibanalangire.
11 N’omuki owakalua omo muliro owabahisaya syendisyaleka eryeruka kera na kera. Abakaramaya enyama y’omoli n’esanamu yayo n’erihirwako ekiminyikalo ky’erina ryayo sibaliluhuka omo musibo n’omo kiro.
12 Busana n’ekyo, ritolere ababuyirire ibayiyinia, abakakwama ebyalayiro by’oMungu, n’abateleka erikirirya Yesu.”
13 Kandi munowa omulenge akalua elubula mwabugha ati: “Uhandike uti: Eritsuka oko ndambi eno, abaholi abakahola omo bughuma n’Omukama batsemire. Ekirimu kiti ko bine bitya, muleke baluhuke oko mibiiri yabo eyikalire, kundi emyatsi eyo bakola yinemubakwama.”
14 Enyuma sy’aho, munalangira ekitu ky’omusohe.* Omundu oyo wabya asosire omughala w’omundu abya inianikere oko kitu ekyo. Abya n’embita y’ehoro oko mutwe wiwe, n’omughusu owatwire abya omo byala biwe.
15 Oghundi mumalaika mwalua omo hekalu. Abya inianemubugha omo mulenge muli n’oyo wabya wikere oko kitu, ati: “Utsuke erikolesya omughusu waghu. Ughese, kundi endambi y’erighesa yabirihika, kusangwa ebyalya ebiri oko kihugho byabiryera.”
16 Neryo oyo wabya wikere oko kitu mwaghusa omughusu wiwe oko kihugho, n’ebyalya ebyabya oko kihugho mubyagheswa.
17 N’oghundi mumalaika mwalua omo hekalu eyiri elubula, naye inianawite oko mughusu owatwire.
18 N’oghundi mumalaika mwalua ahali ekiherero. Abya n’obutoki bw’erikolesya omuliro ngoko anzire. Mwabwira omo mulenge muli omumalaika oyo wabya n’omughusu owatwire ati: “Ukolesaye omughusu waghu owatwire n’eritwa emizabibu eyiri oko kihugho, kundi emizabibu eyo yabiryera.”
19 Omumalaika oyo mwaghusa omughusu wiwe oko kihugho n’eritwa emizabibu eyabya oko kihugho. Kandi omumalaika oyo mwaghusa emizabibu eyo omo muhe munene w’erihitana ry’oMungu.
20 Mubalyatanga omo muhe eyihya w’omuyi, n’omusasi mwalua omo muhe. Omusasi oyo mwabya munene, mwahika n’oko bikoba by’omo bikya by’esyosabayiri.* Omusasi oyo mwahika oko stadia* 1 600.
Amaelezo awehikwa
^ Kinywa kwa kinywa, “amaghetse manene.”
^ Kutse “omo kati-kati k’elubula, endata sy’omutwe waghe.”
^ Omo Kigiriki ni por·neiʹa. Ulebaye amaana w’ebinywa.
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Kutse “enzeru, blanc.”
^ Kutse “esyofarasi, esyoshevale.”
^ Hakuhi ebilometre 296. Estadia nguma yabya ilingene n’esyometre 185. Ulebaye endomeko B14.
