Eribisulirwa eryo Yohana ahabawa 15:1-8
15 Kandi munalangira elubula y’oghundi mwatsi. Abya mwatsi munene kandi owakaswekaya. Habya abamalaika irinda (7) ababya n’ebihunzo irinda. Ebyo byo bihunzo by’omwiso, kundi omughulu bikendisyahwa, erihitana ry’oMungu naryo rikendisyabya iryamahweraho.
2 Kandi munalangira ekindu ekisosire engetse y’ekiyo. Ebyabya omo ngetse eyo byabya bitswangene n’omuliro. Abandu abasinga enyama y’omoli n’esanamu yayo, n’enimero eyilingene n’erina ryayo, babya ibanimene hakuhi n’engetse y’ekiyo. Babya ibanawite oko syonanga sy’oMungu.
3 Babya bakimba olwimbo lwa Musa, omughombe w’oMungu, n’olwimbo lw’Ekyana ky’Embuli, bati:
“Yehova* Mungu, Omutoki w’Ebyosi, emiibiri yaghu ni minene kandi ey’eriswekya. Esyonzira syaghu situnganene kandi ni sy’ekwenene. Uli Mwami wa kera na kera.
4 Yehova,* nindi yutewangakusagha n’eripipa erina ryaghu? Kundi iwe musa sulileghula, kusangwa ebihanda byosi bikendisyasa n’erikukama embere syaghu. Kandi byabirilangira ngoko ukatswera omo ritunganene.”
5 N’enyuma sy’aho, munalangira ahabuyirire h’ehema ihabirikingulwa omo lubula. Omo hema eyo mwabya ebinywa by’oMungu.
6 Neryo abamalaika irinda (7) ababya n’ebihunzo irinda mubalua ahabuyirire. Babya ibambite esyongyimba sy’ekitani esyerire kandi esikangabasenie. Kandi babya ibambite ehikimba* hy’ehoro oko kikuba.
7 Ekighuma ky’oko bihangyikwa bini ebiriho mukyaha abamalaika irinda (7) abo ebibakuli* irinda ebikokotibwe omo horo. Omo bibakuli ebyo mwabya muswire erihitana ry’oMungu oyuliho kera na kera.
8 N’ahabuyirire muhusula omuki busana n’olukengerwa lw’oMungu, kandi busana n’obutoki bwiwe. Omundu wosi-wosi mwatatoka eringira ahabuyirire ebihunzo irinda (7) by’abamalaika irinda bitebyahwa.
Amaelezo awehikwa
^ Ulebaye endomeko A5.
^ Ulebaye endomeko A5.
^ Kutse “esyoesharpe.”
^ Kutse “ebibindi.”
