Eribisulirwa eryo Yohana ahabawa 16:1-21
16 Kandi munowa omulenge muli akalua ahabuyirire. Mwabwira abamalaika irinda (7) ati: “Mughende, muyute ebibakuli* irinda by’erihitana ry’oMungu oko kihugho.”
2 Omumalaika w’erimbere mwaghenda n’eryuta ekibakuli* kiwe oko kihugho. Neryo ekironda ekikaluma kandi ekitandire mukyabya oko bandu ababyako ekiminyikalo ky’enyama y’omoli, n’ababya bakaramya esanamu yayo.
3 Omumalaika w’akabiri muta ekibakuli* kiwe omo ngetse. Neryo engetse muyabya musasi owali ng’ow’omundu oyuholire, n’ebihangyikwa* byosi ebiriho mubyahola, ni bugha ambu, ebindu byosi ebyabya omo ngetse.
4 Omumalaika w’akasatu muta ekibakuli* kiwe omo syonyusi n’omo syongununuko sy’amaghetse. Neryo musyabya musasi.
5 Neryo munowa omumalaika w’esyonyusi akabugha ati: “Iwe, Oyuliho, Oyo wabyaho, Omutaleghula, utunganene kundi wabiritswerabo.
6 Mubuta omusasi w’ababuyirire n’ow’abaminyereri. Busana n’ekyo, wabiribanywisya omusasi. Ekyo kyo batolere.”
7 Neryo munowa ekiherero kikabugha kiti: “Ko bine bitya, Yehova* Mungu, iwe Mutoki w’Ebyosi, ukatswera emyatsi omo kwenene n’omo ritunganene.”
8 N’omumalaika w’akani muta ekibakuli* kiwe ky’oko ryuba. Neryo eryuba muryahabwa obutoki bw’erihisya abandu omo kihuhania kyaryo.
9 Neryo abandu mubahisibwa omo kihuhania kinene ekyo. Aliwe, mubatsuma erina ry’oMungu oyuwite obutoki bw’erileta ebihunzo ebyo, kandi mubatabindula omutima n’erimuha olukengerwa.
10 Omumalaika w’akatano muta ekibakuli* kiwe oko kitumbi ky’obwami ky’enyama y’omoli. Neryo obwami bw’enyama y’omoli mubwabyamo omwirima, n’abandu mubatsuka eriyilumanga oko lulimi busana n’obulumi.
11 Aliwe, mubatsuma oMungu w’elubula busana n’obulumi n’ebironda byabo, kandi mubatabindula emitima yabo.
12 Omumalaika w’endatu (6) muta ekibakuli* kiwe oko lusi lunene lwe Efrati. Neryo amaghetse walo muma. Muma busana n’eriteghekania enzira y’abami abakalua eyo ryuba rikasira.*
13 Kandi munalangira ebinywa bisatu ebituwene ebyasondolawa n’esyombinga.* Byabya ng’ebikere, kandi byabya bikalua omo buno bw’ekiyoka, omo buno bw’enyama y’omoli, n’omo buno bw’omuminyereri w’amabehi.
14 Oko kwenene, ebinywa ebyo bikalua oko syombinga, kandi bikakola emyatsi eyikaswekaya, n’eriyasungana n’abami b’ekihugho kyosi busana n’erikuma-kumirabo oko malwa w’ekiro kikulu ky’oMungu, Omutoki w’Ebyosi.
15 “Ngasa ng’omwibi. Oyutsemire y’omundu oyukateghaya, oyutelusaya esyongyimba* siwe akasyalendera ndumbu n’abandu ibalangira obusoni bwiwe.”
16 Neryo ebinywa ebyo mubyakuma-kumira abami ahakahulawa omo Kiebrania mo Armagedoni.*
17 Omumalaika w’eririnda (7) muta ekibakuli* kiwe oko muka. Neryo omulenge munene owalua ahabuyirire n’omo kitumbi ky’obwami mwabugha ati: “Byabiribererera!”
18 Neryo muhabya amapalyo, emilenge, n’emilumo y’obutuku. Kandi muhabya omusiki munene owate atabya eritsuka omughulu abandu babya oko kihugho. Oko kwenene, omusiki oyo abya munene kandi owakalire.
19 Omuyi munene mwayighabamo bihande bisatu, n’emiyi y’ebihanda muyatera, n’oMungu mwibuka Babiloni Mukulu kusudi amunywisaye ekikombe* ky’edivai y’erihitana riwe rinene.
20 N’ebisanga* byosi mubyatibita, n’ebitwa mubyabulirana.
21 Enyuma sy’aho, amatsuku manene-manene mwalua elubula, amatoghongera oko bandu. Eritsuku righuma ryabya rikaluamo talanta* nguma. Neryo abandu mubatsuma oMungu busana n’ekihunzo ky’amatsuku, kundi abandu babya isibebatalola oko kihunzo kingaha n’ekyo.
Amaelezo awehikwa
^ Kutse “ebibindi.”
^ Kutse “ekibindi.”
^ Kutse “ekibindi.”
^ Kutse “esyonafsi.”
^ Kutse “ekibindi.”
^ Ulebaye endomeko A5.
^ Kutse “ekibindi.”
^ Kutse “ekibindi.”
^ Kutse “ekibindi.”
^ Kutse “ematanga ryuba.”
^ Kinywa kwa kinywa, “ebirimu ebiterire.”
^ Kutse “esyongyimba sy’eryambalira oko sindi.”
^ Omo Kigiriki ni Har Ma·ge·donʹ. Kikalua omo kinywa ky’Ekiebrania ekikamaanisaya “Ekitwa kye Megido.”
^ Kutse “ekibindi.”
^ Kutse “olutehi.”
^ Kutse “îles.”
^ Etalanta nguma y’Ekigiriki yabya ikaluamo ebilo 20,4. Ulebaye endomeko B14.
