Eribisulirwa eryo Yohana ahabawa 17:1-18
17 Omughuma w’oko bamalaika irinda (7) ababya n’ebibakuli* irinda mwasa n’erinibwira ati: “Wase ngendikukangania amalipizi awakendihabwa omumbalaka mukulu oyo wikere oko syonyusi nene.*
2 Abami b’ekihugho mubakola oburaghane* n’omumbalaka oyo, n’abandu abikere oko kihugho mubatamira busana n’edivai y’oburaghane* bwiwe.”
3 Neryo mwanitwala omo mbwarara omo butoki bw’ekirimu. Nabere nahikayo, munalangira omukali oyo wabya wikere oko nyama y’omoli y’erangyi y’omusasi eyihenirye.* Enyama y’omoli eyo yabya yoswireko amena w’ebitsumi, kandi yabya n’emitwe irinda (7) n’amahembe ikumi.
4 Omukali oyo abya ambite esyongyimba sy’erangyi y’olubono-bono,* n’erangyi y’omusasi eyihenirye.* Kandi abya iniabiripambwa omo horo, omo mabwe w’obughuli bunene, n’esyolulu.* Abya iniane n’ekikombe* ky’ehoro omo byala biwe, n’omo kikombe ekyo mwabya muswire ebindu ebikita esyonye, n’omutsafu w’oburaghane* bwiwe.
5 Oko mbumo yiwe kwabya kuhandikire erina eriri n’amaana awatasibwe: “Babiloni Mukulu, mama w’abambalaka, kandi mama w’ebindu ebikita esyonye by’ekihugho.”
6 Kandi munalangira ngoko omukali oyo abya iniabiritamira omusasi w’ababuyirire n’omusasi w’abimiri* ba Yesu.
Nabere nabimulangira, munasweka kutsibu.
7 Neryo omumalaika mwanibwira ati: “Busanaki wabirisweka kutsibu? Ngendikubwira emyatsi eyitasibwe oko mukali oyo. Kandi ngendikubwira emyatsi eyitasibwe oko nyama y’omoli eyimuhekire, eyiwite emitwe irinda (7), n’amahembe ikumi:
8 Enyama y’omoli eyo ulyalangira yabyaho, aliwe siyikiriho. Nikwa yikisiya iyalua omo kyuna kiri-kiri. Kandi yikaya okw’itoghotibwa. Abandu abikere oko kihugho, abo amena wabo syahandikire omo kitabu ky’erilinga ky’engebe, erilua oko mughulu efondasyo y’ekihugho yahirawaho, bakendisyasweka omughulu bakendisyalangira ngoko enyama y’omoli eyabyaho, aliwe siyikiri, ikendisyabya iyikine.
9 “Busana n’ekyo, eryowa emyatsi eyi ritolere omundu iniabya n’amenge manene: Emitwe irinda (7) ikasosekanaya ebitwa irinda ebyo omukali oyo ikereko.
10 Kandi bikasosekanaya abami irinda (7). Abami batano babiritera, omughuma aneho, n’oghundi syalyahika. Aliwe akendibya abihika, akenditabala omo katambi kake.
11 N’enyama y’omoli eyabyaho, aliwe siyiriho, y’omwami w’omunani. Akalua omo bami irinda (7) abo, kandi akaya okw’itoghotibwa.
12 “Amahembe ikumi agho ulyalangira, akasosekanaya abami ikumi abatebahabwa obwami. Aliwe, bakendisyahabwa obutoki bw’eritabala oko mughulu mughumerera n’enyama y’omoli.
13 Bali n’amalengekania maghumerera, neryo bakaha enyama y’omoli y’obutoki, n’akaghala kabo.
14 Bakendisyalwa n’Ekyana ky’Embuli. Aliwe, kundi Ekyana ky’Embuli ni Mukama w’abakama kandi ni Mwami w’abami kikendisyabasinga. N’abali haghuma nakyo, ni bugha ambu, ababirikirawa, abasombolawa, n’abateleghula, nabo bakendisyasinga.”
15 Enyuma sy’aho, omumalaika mwanibwira ati: “Esyonyusi esyo ulyalangira, aho mumbalaka ikere sikasosekanaya abandu, ebikumula by’abandu, ebihanda n’emibughe.
16 N’amahembe ikumi agho ulyalangira, n’enyama y’omoli bikendisyapona omumbalaka oyo n’erimya ebindu biwe byosi, n’erimuyira ndumbu. Bikendisyalya omubiri wiwe, n’erimutimya iniahwererera.
17 Bikendisyakola bitya kundi oMungu abirihira omo mutima wabyo mw’amalengekania w’erikola ekyo anzire, ni bugha ambu, ekyo nabo banzire erikola omwiha obwami bwabo enyama y’omoli, erihika omughulu ebinywa by’oMungu bikendisyabererera.
18 N’omukali oyo walangira akasosekanaya omuyi munene owakatabala abami b’ekihugho.”
Amaelezo awehikwa
^ Kutse “ebibindi.”
^ Kinywa kwa kinywa, “oko maghetse manene.”
^ Ulebaye amaana w’ebinywa.
^ Omo Kigiriki ni por·neiʹa. Ulebaye amaana w’ebinywa.
^ Kutse “lukula-kula, écarlate.”
^ Kutse “erangyi y’omunyama, pourpre.”
^ Kutse “lukula-kula, écarlate.”
^ Kutse “n’esyoperle.”
^ Kutse “olutehi.”
^ Omo Kigiriki ni por·neiʹa. Ulebaye amaana w’ebinywa.
^ Kutse “w’abatemwe.”
