Eribisulirwa eryo Yohana ahabawa 19:1-21
19 Enyuma sy’aho, munowa omulenge muli elubula, owali ng’omulenge w’abandu banene. Mwabugha ati: “Mupipe Yah!* Omulamo, olukengerwa, n’obutoki ni by’oMungu wetu,
2 kundi akatswera omo kwenene n’omo ritunganene. Kusangwa omumbalaka mukulu oyo watsandaya ekihugho omo buraghane* bwiwe, oMungu abirimuha amalipizi. Kandi abirituhulya omusasi w’abakobe biwe owabya oko byala by’omumbalaka oyo.”
3 Kandi engendo y’akabiri, abandu banene abo mubabugha bati: “Mupipe Yah!* Kandi omuki owakalua omo muyi owalyatimibawa syendisyaleka eryeruka kera na kera.”
4 N’abasyakulu 24, n’ebihangyikwa bini ebiriho mubakukama n’eriramya oMungu, oyo wikere oko kitumbi ky’obwami, n’eribugha bati: “Amina! Mupipe Yah!”*
5 Kandi, omo kitumbi ky’obwami mumwalua omulenge. Mwabugha ati: “Mupipe oMungu wetu, inywe baghombe biwe bosi, inywe mukamusagha, abakulu n’abalere.”
6 Kandi munowa omulenge owali ng’ow’abandu banene, n’owali ng’ow’olusi lunene,* kandi owali ng’emilumo minene-minene y’obutuku. Mubabugha bati: “Mupipe Yah,* kusangwa Yehova* oMungu wetu, Omutoki w’Ebyosi abiritsuka eritabala.
7 Tutseme n’eriyitsangura, n’erimuha olukengerwa, kundi endwa y’Ekyana ky’Embuli yamabihika, n’omukali wakyo abiriyiteghekania.
8 Abirihabwa olusunzo lw’erimbala olukimba lw’ekitani oluwene, oluhenirye, kandi olw’erire, kundi ekitani ekyuwene kikasosekanaya emikolere eyitunganene y’ababuyirire.”
9 Kandi omumalaika mwanibwira ati: “Uhandike uti: Abalyabirikirawa oko kalyo k’erigholo-gholo k’endwa y’Ekyana ky’Embuli batsemire.” Kandi mwanibwira ati: “Ebinywa ebi ni by’oMungu, kandi ni by’ekwenene.”
10 Busana n’ekyo, munakukama embere sy’ebisando biwe nitoke erimuramya. Aliwe, mwanibwira ati: “Koko! Isiwakola ekyo! Naghe niri mughombe nga we. Kandi niri mughombe ng’abalikyaghu, abali n’omubiiri w’erihubirya emyatsi eyilebirye Yesu. Uramaye oMungu! Kundi amaminyereri abughawa busana n’erikangania ekwenene eyilebirye Yesu.”
11 Munalangira olubula ilwabirikingulwa. Kandi munalangira esabayiri* y’omusohe,* n’oyo wabya wikere kuyo akahulawamo Mutaleghula, n’Ow’ekwene. Kandi akatswera n’erilwa omo ritunganene.
12 Ameso wiwe ni kirimi ky’omuliro. Oko mutwe wiwe kuli esyombita sinene. Kandi ahandikireko erina eritasibwe n’omundu wosi-wosi, ate iye musa.
13 Kandi ambite olukimba* olwabiriyako omusasi. Akahulawamo Ekinywa ky’oMungu.
14 Kandi emilondo y’abasuda b’elubula babya bakamukwama ibane oko syosabayiri* sy’omusohe,* babya bambite ekitani ekyuwene eky’omusohe,* kandi eky’erire.
15 N’omo buno bwiwe mwabya mukatububuka omuyali muli, kandi owatwire atoke eritoghotya mugho mw’ebihanda. Kandi akendisyasondolabo omo fimbo y’ekyuma. Kandi akalyatanga omo muhe w’erihitana erikalire ry’oMungu, Omutoki w’Ebyosi.
16 Oko lukimba* lwiwe, n’oko kihinga kiwe kuhandikire erina rino: Omwami w’abami n’Omukama w’abakama.
17 Kandi munalangira omumalaika inianimene omo ryuba. Mwabirikira omo mulenge muli ehinyunyu hyosi ehikaghuluka omo kyanya ati: “Mwase hano, muhindane busana n’efete y’oMungu.
18 Mulye eminyoku y’abami, y’abakulu b’abasuda, y’abalume b’amaka, y’esyosabayiri* n’eyabikere kusyo, n’eminyoku y’abandu bosi, y’abandu abali omo bwiranda n’abakobe, y’abakulu n’abalere.”
19 Kandi munalangira enyama y’omoli, abami b’ekihugho, n’abasuda babo ibanahindene busana n’erilwa n’oyo wikere oko sabayiri* n’abasuda biwe.
20 N’enyama y’omoli muyahambwa haghuma n’omuminyereri w’amabehi oyo wakola ebitiko-tiko embere sy’enyama eyo; n’erilabira ebitiko-tiko ebyo, mwateba abahirawako ekiminyikalo ky’enyama y’omoli, n’abaramaya esanamu yayo. Abosi babiri mubaghuswa ibakineho omo ngetse y’omuliro n’esufre.*
21 Aliwe, abandi mubitibwa omo muyali muli owalua omo buno b’oyo wikere oko sabayiri.* N’ehinyunyu hyosi muhyughuta eminyoku yabo.
Amaelezo awehikwa
^ Kutse “Aleluya.” Kikalua omo Kiebrania halelou-Yah. “Yah” ni kikuhi ky’erina Yehova.
^ Omo Kigiriki ni por·neiʹa. Ulebaye amaana w’ebinywa.
^ Kutse “Aleluya.” Kikalua omo Kiebrania halelou-Yah. “Yah” ni kikuhi ky’erina Yehova.
^ Kutse “Aleluya.” Kikalua omo Kiebrania halelou-Yah. “Yah” ni kikuhi ky’erina Yehova.
^ Kinywa kwa kinywa, “amaghetse manene.”
^ Kutse “Aleluya.” Kikalua omo Kiebrania halelou-Yah. “Yah” ni kikuhi ky’erina Yehova.
^ Ulebaye endomeko A5.
^ Kutse “enzeru, blanc.”
^ Kutse “efarasi, eshevale.”
^ Kutse “olukimba lw’eryambalira oko lundi.”
^ Kutse “esyofarasi, esyoshevale.”
^ Kutse “enzeru, blanc.”
^ Kutse “eky’ebla.”
^ Kutse “olukimba lw’eryambalira oko lundi.”
^ Kutse “esyofarasi, esyoshevale.”
^ Kutse “farasi, shevale.”
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Kutse “farasi, shevale.”
