Eribisulirwa eryo Yohana ahabawa 2:1-29
2 “Uhandikire omumalaika w’endeko ye Efeso uti: Oyuwite oko syongununu irinda (7) omo byala biwe by’amali n’oyukalendera omo kati-kati k’ebindu irinda by’ehoro by’erihirako esyotala akabugha ati:
2 ‘Ninasi ebyo ukakola, omubiiri waghu owakalire, n’eriyiyinia ryaghu. Kandi ninasi ngoko sighuliligha abandu babi, kandi wabirilenga oko bandu abakayahulamo bakwenda, aliwe isi bakwenda. Muwalangira ngoko ni babehi.
3 Unemuyiyinia kandi unemuhanda omutima busana n’erina ryaghe kandi muwataluha.
4 Aliwe, siniritsemera omwatsi ono okw’iwe: Wabirileka erikangania olwanzo olo wabya nalo oko mwanzo.
5 “‘Wibuke aho ulyaterera. Ubindule omutima kandi ukole emyatsi eyo wabya ukakola oko mwanzo. Utitayisubako, ingendyasa n’erilusya ekindu kyaghu ky’erihirako etala aho kiri.
6 Aliwe, omwatsi ogho nanzire okw’iwe w’ono: Uponire ng’angye emibere ey’ab’omo kasomo ka Nikola.
7 Oyuwite amatwi owe ebyo kirimu kikabwira esyondeko. Oyukasinga, ngendisyamulighira erirya oko matunda w’omuti w’engebe, owali omo paradiso y’oMungu.’
8 “Uhandikire omumalaika w’endeko ye Simirna uti: ‘Ow’ekwanza n’Ow’omwiso’ oyo wahola n’erilubuka akabugha ati:
9 ‘Ninasi amaligho n’obwera bwaghu. Aliwe, uli muteke. Kandi ninasi ngoko abandu abakayahulamo Bayahudi bakabya ibanemukutsuma. Aliwe, si Bayahudi, abandu abo ni sinagogi* ya Sitani.
10 Isiwasagha busana n’amaligho awakisiya iniakuhikira. Uminye ngoko Diabolo akendibya inianemughusa abaghuma b’okw’inywe b’omo muliki mutoke erilengwako ndeke-ndeke. Kandi mukendyaghalibwa omo biro ikumi. Ubye mutaleghula erihika oko luholo, neryo naghe ngendisyakuha embita y’engebe.
11 Oyuwite amatwi owe ebyo kirimu kikabwira esyondeko. Oyukasinga, syendisyahola oluholo lw’akabiri.’
12 “Uhandikire omumalaika w’endeko ye Pergamo uti: Oyuli n’omuyali muli owatwire kandi owakatwira oko syombande ibiri akabugha ati:
13 ‘Ninasi eyo wikere. Wikere ahali ekitumbi ky’obwami kya Sitani. Nomo bine bitya, uli mutaleghula okw’ingye,* kandi muwataleka erinikirirya nibya n’omo biro bya Antipa, omwimiri* waghe mutaleghula, oyo bita imunasamalire, oho Sitani ikere.
14 “‘Aliwe, hane emyatsi milebe eyo nitetsemera okw’iwe: Omo kati-kati kaghu mune abandu abakakwama amakangirirya wa Balaamu, oyo wakangiriraya Balaki erihira ekindu ekikatwikalaya embere sy’abana be Israeli, ni bugha ambu, mwabakangirirya erirya ebyalya ebiryahererawa oko syosanamu n’erikola oburaghane.*
15 Kandi omo kati-kati kaghu namo mune abandu abakakwama amakangirirya w’akasomo ka Nikola.
16 Neryo, ubindule omutima. Utitayisubako, ingendyasa luba n’erilwa nabo omo muyali muli owakalua omo buno bwaghe.
17 “‘Oyuwite amatwi owe ebyo kirimu kikabwira esyondeko. Oyukasinga, ngendisyamuha amana make awabisire, kandi ngendisyamuha akabwe k’omusohe* akahandikireko erina rihya-rihya eritasibwe n’omundu wosi-wosi, ate oyulyahabawako.’
18 “Uhandikire omumalaika w’endeko ye Tiatira uti: Omughala w’oMungu, oyuli n’ameso awali ng’ekirimi ky’omuliro, n’oyuli n’ebisando ebiri ng’ekwivre* eyuwene ati:
19 ‘Ninasi ebyo ukakola, olwanzo lwaghu, obwikirirya bwaghu, n’omubiiri waghu. Kandi ninasi ngoko ebyo ukakola lino ni binene kulenga ebyo wakola oko mwanzo.
20 “‘Aliwe ekyo nitetsemera okw’iwe kya kino: Ukaligha omukali oyo, oyuli nga Yezebeli, oyukayahulamo muminyereri. Akakangiriraya n’eriteba abakobe baghe kusudi bakole oburaghane* n’erirya ebyalya ebiryahererawa esyosanamu.
21 Munamuha akatambi k’eribindula omutima, aliwe syanzire erileka oburaghane* bwiwe.
22 Ngendimuletera obukoni obukendileka iniabula kw’akahangana.* N’abakasingira naye, ngendyaghalyabo kutsibu, bamatendibindula emitima.
23 Kandi ngendisyiita abana biwe b’omo kihunzo ekikalire. Neryo esyondeko syosi sikendiminya ngoko ngaminya ebiri omo mutima w’omundu n’ebyo akalengekanaya.* Kandi ngendisyaliha obuli mundu erikwamana n’ebyo akakola.
24 “‘Nikwa abandi abali omo ndeko ye Tiatira, abosi abatekwama amakangirirya aya, n’abatebataminya emyatsi eyo abandu balebe bakahulamo “emyatsi milito ya Sitani,” ngababwira niti: Sinendibahekya oghundi muheke.
25 Aliwe, ekyo mukole: Mumakirire ekyo muwiteko erihika oko mughulu ngendisyasa.
26 Oyukasinga kandi oyukakola ebyo nanzire erihika oko nduli, ngendisyamuyiramo mutabali w’ebihanda.
27 Kandi akendisyateya abandu omo fimbo y’ekyuma. Neryo bakendisyatsutsangikamo bihande-bihande ng’ebindu by’eribumba, ngoko naghe nahabawa obutoki obo na Tata waghe.
28 Kandi ngendisyamuha engununu y’omo tututu.
29 Oyuwite amatwi owe ebyo kirimu kikabwira esyondeko.’
Amaelezo awehikwa
^ Ulebaye amaana w’ebinywa.
^ Kinywa kwa kinywa, “unemumakirira erina ryaghe.”
^ Kutse “omutemwe.”
^ Ulebaye amaana w’ebinywa.
^ Kutse “enzeru, blanc.”
^ Kutse “ng’omulinga.”
^ Ulebaye amaana w’ebinywa.
^ Omo Kigiriki ni por·neiʹa. Ulebaye amaana w’ebinywa.
^ Kutse “Ngendimughusa omo ngyingo y’amakoni.”
^ Kutse “amalengekania w’emwisi.” Kinywa kwa kinywa, “esyombiko.”
