Eribisulirwa eryo Yohana ahabawa 20:1-15
20 Kandi munalangira omumalaika akalua elubula inianawite oko lufungura lw’ekyuna kiri-kiri, kandi iniane n’omunyororo munene omo byala biwe.
2 Mwahamba ekiyoka, enzoka ya kera ni bugha ambu, Diabolo na Sitani, neryo mwabohayo omo munyororo omo myaka 1 000.
3 Mwamughusa omo kyuna kiri-kiri n’erikingakyo. Mwamuhomeramo kusudi isyasyateba ebihanda erihika oko nduli y’emyaka 1 000. N’enyuma sy’aho, akendisyaboholwa omo katambi kake.
4 Kandi munalangira ebitumbi by’obwami, n’ababya bikere kubyo mubahabwa obutoki bw’eritswera abandu. Munalangira esyonafsi* sy’abandu abitawa* busana n’erihubirya emyatsi eyilebirye Yesu, kandi busana n’erikania oko myatsi eyilebirye oMungu. Kandi munalangira abataramaya enyama y’omoli, kutse esanamu yayo, n’abatahirawako ekiminyikalo kyayo oko syombumo syabo n’oko byala byabo. Mubasuba n’eritabala haghuma na Kristo omo myaka 1 000.
5 (Abandi baholi mubatasuba emyaka 1 000 yiteyahwa.) Eri ry’erilubuka ry’erimbere.
6 Abandu abatsemire kandi ababuyirire bo bakendisyalubuka okw’ilubuka ery’erimbere. Sibendisyasyahola oko luholo lw’akabiri. Aliwe, bakendisyabya bahereri b’oMungu na ba Kristo. Kandi bakendisyatabala na Kristo omo myaka 1 000.
7 Omughulu emyaka 1 000 ikendisyahwa, Sitani akendisyaboholwa omo ngomo.
8 Neryo akendisyayatebya ebihanda ebiri oko syongonde* ini sy’ekihugho, ni bugha ambu, Gogu na Magogu. Akendisyahindaniabo oko malwa. Emighanzo yabo ikendisyabya ng’omutsanga w’oko ngetse.
9 Kandi bakendisyayitsatsanga oko kihugho kyosi n’eritimba oko kambi y’ababuyirire n’oko muyi owanzirwe. Aliwe, omuliro akendisyalua elubula n’eritimyabo.
10 Na Diabolo oyo wabya akatebabo akendisyaghuswa omo ngetse y’omuliro n’esufre,* eyiri enyama y’omoli n’omuminyereri w’amabehi. Neryo bakendisyaghalibwa* omo musibo n’omo kiro kera na kera.
11 Kandi munalangira ekitumbi kinene ky’obwami eky’omusohe,* n’oyo wabya wikere kukyo. Ekihugho n’olubula mubyalua embere siwe, kandi muhatasyasungika omwanya wabyo.
12 Neryo munalangira abaholi, abakulu n’abalere, ibanimene embere sy’ekitumbi ky’obwami. N’ebitabu by’erilinga mubyakingulwa. Aliwe, ekindi kitabu ky’erilinga mukyakingulwa. Ekitabu ekyo ni kitabu ky’erilinga ky’engebe. Abaholi mubatswerwa erikwamana n’emyatsi eyabya yihandikire omo bitabu by’erilinga, erikwamana n’ebyo bakola.
13 Neryo engetse muyahulukya abaholi ababya muyo, n’oluholo n’Eyisinda* mubyahulukya abaholi ababya mubyo. Obuli mughuma mwatswerwa erikwamana n’ebyo akola.
14 Oluholo n’Eyisinda* mubyaghuswa omo ngetse y’omuliro. Engetse y’omuliro ikasosekanaya oluholo lw’akabiri.
15 Kandi omundu oyo rina riwe ritahandikire omo kitabu ky’engebe mwaghuswa omo ngetse y’omuliro.
Amaelezo awehikwa
^ Ulebaye amaana w’ebinywa.
^ Kinywa kwa kinywa, “abitibawa omo mbasa.”
^ Kutse “syosonda, coins.”
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Kutse “bakendisyabohwa; bakendisyahirwa omo ngomo.”
^ Kutse “enzeru, blanc.”
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
