Eribisulirwa eryo Yohana ahabawa 22:1-21
22 Kandi mwanikangania olusi lw’amaghetse w’engebe. Amaghetse walo abya iniahenirye ng’ekristale. Olusi olo lwabya lukalua omo kitumbi ky’obwami ky’oMungu n’eky’Ekyana ky’Embuli.
2 Lwabya lukasenda omo kati-kati k’endaki nene y’omuyi. Oko misike ibiri y’olusi kwabya emiti y’engebe. Yabya yikahetya amatunda ngendo 12 oko mwaka. Iyikahetaya amatunda obuli mwisi, n’ebiti by’emiti eyo byabya ini by’erilamya ebihanda.
3 Omuyi oyo syendisyatakirwa. Ekitumbi ky’obwami ky’oMungu n’eky’Ekyana ky’Embuli bikendisyabya omo muyi oyo, n’abakobe biwe bakendisyamukolera omubiiri abuyirire.
4 Kandi bakendisyalangira obusu bwiwe, n’erina riwe rikendisyabya oko mbumo syabo.
5 Kandi sibwendisyasyabya bukira omo muyi oyo. Kandi sibendisyalagha oko kyakakala ky’etala kutse ky’eryuba, kundi Yehova* Mungu akendisyabakolerya. Kandi bakendisyatabala kera na kera.
6 Mwanibwira ati: “Ebinywa ebi ni by’eriyiketera kandi ni by’ekwenene. Yehova* oMungu, oyo wasondola abaminyereri omo kirimu kiwe, mwatuma omumalaika wiwe kusudi akanganaye abakobe biwe b’emyatsi eyikisiya iyabya.
7 Ngasa luba! Oyukakwama obuminyereri obuli omo kitabu eki ky’erilinga atsemire.”
8 Ingye Yohana, ningye nowa n’erilangira emyatsi eyi. Omughulu nowa n’erilangirayo, munakukama embere sy’ebisando by’omumalaika oyo wanikanganayayo, nitoke erimuramya.
9 Aliwe, mwanibwira ati: “Koko! Isiwakola ekyo! Naghe niri mughombe ng’awe kandi niri mughombe ng’abalikyaghu abaminyereri, kandi ng’abakakwama ebinywa ebihandikire omo kitabu eki ky’erilinga. Uramaye oMungu.”
10 Mwatasyambwira ati: “Ebinywa by’obuminyereri ebihandikire omo kitabu eki ky’erilinga, isiwayirabyo mo kumbo,* kundi omughulu owabirihirwaho akisiya iniahika.
11 Oyukakola ebituwene syaleke erikola ebituwene, n’oyuli n’emibere eyiterire isyalekayo. Aliwe, omutunganene syaleke eribya mundu oyutunganene, n’omubuyirire syaleke eribya mubuyirire.
12 “‘Ngasa luba, kandi ngasa n’omusahara nitoke eriliha obuli mundu erikwamana n’omubiiri wiwe.
13 Niri Alfa na Omega,* ow’erimbere n’ow’omwiso, enzuko n’enduli.
14 Abandu abatsemire b’abandu abakafula esyokanzu syabo batoke erihamulirwa erirya oko matunda w’emiti y’engebe, kandi batoke erihamulirwa erilaba omo milango bakingira omo muyi oyo.
15 Aliwe, eyihya w’omuyi yiri esyombwa,* abakakola emyatsi y’obukumu, abakakola oburaghane,* abiti, abakaramaya esyosanamu, n’abosi abanzire n’ababeghere eribugha amabehi.’
16 “‘Ingye Yesu, munatuma omumalaika waghe atoke eribakangania emyatsi eyi eyikendiwatikya esyondeko. Niri mulihi n’olubuto lwa Daudi, kandi niri ngununu y’omo tututu eyikapala-palaya.’”
17 Ekirimu n’omulunga mukali bakabya ibanemubugha bati: “Asa!” N’oyukowa naye abughe ati: “Asa!” N’oyukwire enyota ase; oyo wanzire imaye amaghetse w’engebe wo bule.
18 “Obuli mundu oyukowa ebinywa by’obuminyereri ebiri omo kitabu eki ky’erilinga ngamubwira niti: Omundu amatomeka okw’ebi kw’ebindi binywa, oMungu iniakendisyamutomekera oko bihunzo ebihandikire omo kitabu eki ky’erilinga.
19 N’oyukalusaya oko binywa by’ekitabu ky’erilinga ky’obuminyereri obu, oMungu akendisyamulusyako ebindu bibuya ebihandikire omo kitabu eki ky’erilinga, ni bugha ambu, oMungu syendisyamulighira erirya oko matunda w’omuti w’engebe, kandi syendisyamulighira eringira omo muyi owabuyirire.
20 “Oyukatula emyatsi eyi akabugha ati: ‘Ngasa luba.’”
“Amina! Wase, Mukama Yesu.”
21 Olukogho lw’Omukama Yesu lubye n’ababuyirire.
Amaelezo awehikwa
^ Ulebaye endomeko A5.
^ Ulebaye endomeko A5.
^ Kutse “esiri.”
^ Kutse “A ne Z.” Alfa y’eherufi y’ekwanza y’olufabe lw’Ekigiriki, ne Omega y’eherufi y’omwiso.
^ Ni bugha ambu, ababeghere erikola emyatsi eyikita esyonye omo meso w’oMungu.
^ Ulebaye amaana w’ebinywa, “Oburaghane.”
