Eribisulirwa eryo Yohana ahabawa 3:1-22
3 “Uhandikire omumalaika w’endeko ye Sardi uti: Oyuli n’ebirimu irinda (7) by’oMungu, n’esyongununu irinda, akabugha ati: ‘Ninasi ebyo ukakola. Ninasi ngoko abandu bakakulangira ng’oyuliho, aliwe uholire.
2 Ubuke, ukala-kalaye ebikisiya ibyahola, kundi mungalangira sighuliwakola ebyosi* ebyo oMungu waghe akakusaba.
3 Neryo ubye ukibuka ekyo wahabawa n’ekyo wowa. Umakirirekyo n’erisuba oko mutima. Utitabuka, ingendyasa ng’omwibi, kandi siwendisyaminya endambi eyo ngendisyasirako.
4 “‘Aliwe, omo ndeko ye Sardi mune abandu balebe* abatakinaya esyongyimba syabo. Abandu abo bakendisyalendera naghe ibanambite esyongyimba sy’omusohe* kundi batolere.
5 Oyukendisinga, akendisyambalibwa esyongyimba sy’omusohe* ng’abandu abo. Kandi sinendisyazima* erina riwe ry’omo kitabu ky’engebe n’ahake, aliwe embere sya Tata waghe n’abamalaika biwe, ngendisyabugha niti ninasi erina riwe.
6 Oyuwite amatwi owe ebyo ekirimu kikabwira esyondeko.’
7 “Uhandikire omumalaika w’endeko ye Filadelfia uti: Oyubuyirire, ow’ekwenene, oyuwite olufungura lwa Daudi, oyukakingula isihangasyabya oyo wangakinga, n’oyukakinga isihangasyabya oyo wangakingula, akabugha ati:
8 ‘Ninasi ebyo ukakola. Nabirihira embere syaghu omulango owakingulire ogho mundu ate angakinga. Ninasi ngoko uwite akaghala kake, aliwe unemuyikasa erisikya ekinywa kyaghe. Kandi sighulikola ebyangahemula erina ryaghe.
9 Ab’omo sinagogi* ya Sitani abakayahulamo Bayahudi, aliwe isi Bayahudi, nikwa ni babehi, ngendiletabo kusudi bakukame embere sy’ebisando byaghu, n’eriminyisyabo ngoko nabirikwanza.
10 Kundi ukasikaya ebyo wowa okwiyiyinia ryaghe,* kandi ngendisyakuteya omo mughulu w’erilengwako, erikendisyahikira ekihugho kyosi busana n’erilenga oko bosi abikere kukyo.
11 Ngasa luba. Umakirire ekyo uwiteko kusudi sihabye oyukimaya embita yaghu.
12 “‘Oyukasinga, ngendisyamuyiramo nduyi omo hekalu y’oMungu waghe. Syendisyaluamo n’ahake. Kandi ngendisyamuhandikako erina ry’oMungu waghe, n’erina ry’omuyi w’oMungu waghe, e Yerusalema nyihya-nyihya, eyikalua elubula, ew’oMungu waghe. Kandi ngendisyamuhandikako erina ryaghe rihya.
13 Oyuwite amatwi owe ebyo kirimu kikabwira esyondeko.’
14 “Uhandikire omumalaika w’endeko ye Laodikia uti: Ye Amina, omwimiri* mutaleghula now’ekwenene, ekihangyikwa ky’erimbere ky’oMungu, akabugha ati:
15 ‘Ninasi ebyo ukakola. Ninasi ngoko sighuhuhirire kutse sighuhuhene. Ngambe niki ulyatahuhirira kutse iwahuhana.
16 Aliwe, kundi sighuhuhirire kutse sighuhuhene, ngendikusala.
17 Kusangwa ukabugha uti: “Niri muteke, nabiritunda ebindu bingyi, sinilaghire oko kindu.” Aliwe, siwasi ngoko uli muhanya, ow’erikwira obulighe, omwera, endimetime, kandi uli ndumbu.
18 Ngakuhana niti unighuleko ehoro eyabiryeribwa omo muliro utoke eribya muteke. Kandi unighuleko esyongyimba sy’omusohe* utoke eryambala bakasyalangira obusoni bwaghu. Kandi unighuleko edawa y’ameso utoke erilangira.
19 “‘Abosi abo nanzire, ngabakanganaya amakosa wabo n’eribakunga. Neryo ukole n’omuhwa, n’eribindula omutima.
20 Ninimene oko mulango kandi ninemukongota. Omundu amowa omulenge waghe n’erikingula omulango, ingendingira omwiwe n’erirya akalyo k’erigholo-gholo haghuma naye, naye inialya haghuma naghe.
21 Oyukasinga, ngendisyamwikalya haghuma naghe oko kitumbi kyaghe ky’obwami, ngoko naghe nasinga n’erikala haghuma na Tata waghe oko kitumbi kiwe ky’obwami.
22 Oyuwite amatwi owe ebyo kirimu kikabwira esyondeko.’”
Amaelezo awehikwa
^ Kutse “sighuli wabughirira.”
^ Kinywa kwa kinywa, “amena malebe.”
^ Kutse “enzeru, blanc.”
^ Kutse “enzeru, blanc.”
^ Kutse “sinendisyasangula, sinendisyalusya.”
^ Ulebaye amaana w’ebinywa.
^ Kutse kandi, “muwayiyinia ng’angye.”
^ Kutse “omutemwe.”
^ Kutse “enzeru, blanc.”
