Eribisulirwa eryo Yohana ahabawa 4:1-11
4 Enyuma sy’aho, munalangira omulango inianakingulire elubula. N’omulenge w’erimbere ogho nowa akakania naghe abya ng’ow’engunga. Mwabugha ati: “Hetukira eno. Ngendikukangania emyatsi eyikendibya.”
2 Enyuma sy’aho, obutoki bw’ekirimu mubwabya okw’ingye. Neryo munalangira ekitumbi ky’obwami elubula, n’omundu abya inianikere oko kitumbi ky’obwami ekyo.
3 Oyo wabya wikere oko kitumbi ky’obwami ekyo abya asosire eribwe ry’eyaspi, n’eribwe ry’esardwane.* Kandi oko kitumbi ky’obwami kwabya kutimbire ekima ekyabya ng’eribwe ry’ezumaridi.
4 Oko kitumbi ky’obwami kwabya kutimbire ebitumbi by’obwami 24, n’oko bitumbi ebyo by’obwami kwabya kwikere abasyakulu 24. Babya bambite esyongyimba sy’omusohe,* n’oko mitwe yabo kwabya esyombita sy’ehoro.
5 Amapalyo, emilenge, n’emilumo y’obutuku yabya ikalua oko kitumbi ky’obwami. Kandi habya esyotala irinda (7) sy’omuliro isinemwaka embere sy’ekitumbi ky’obwami. Esyotala esyo sikasosekanaya ebirimu irinda by’oMungu.
6 Embere sy’ekitumbi ky’obwami habya ekindu ekisosire engetse y’ekiyo, ng’eribwe ry’ekristale.
Ebihangyikwa bini ebiriho byabya omo kati-kati k’ekitumbi ky’obwami,* kandi byabya bitimbire kukyo. Ebihangyikwa ebyo byabya byoswireko ameso embere n’enyuma.
7 N’ekihangyikwa ky’erimbere ekiriho kyabya kisosire esimba, ekihangyikwa ky’akabiri ekiriho kyabya kisosire enume y’ende eyikine nyilere, ekihangyikwa ky’akasatu ekiriho kyabya n’obusu obuli ng’obw’omundu, n’ekihangyikwa ky’akani ekiriho kyabya kisosire erisamba erinemughuluka.
8 Obuli kihangyikwa ekiriho eky’oko bihangyikwa bini ebyo kyabya n’ebipupa ndatu (6) ebyabya byoswireko ameso ehosi-hosi. Kandi omo kiro n’omwitungyi bikabya ibinemubugha biti: “Omubuyirire, omubuyirire, omubuyirire ni Yehova* Mungu, Omutoki w’Ebyosi, oyo wabyaho, oyuliho, n’oyukasa.”
9 Omughulu ebihangyikwa ebiriho bikapipa, eriha olukengerwa, n’erisima oyo wikere oko kitumbi ky’obwami, oyuliho kera na kera,
10 abasyakulu 24 bakunama embere sy’oyo wikere oko kitumbi ky’obwami n’eriramya oyuliho kera na kera. Kandi bakaghusa esyombita syabo embere sy’ekitumbi ky’obwami n’eribugha bati:
11 “Yehova* Mungu wetu, utolere erihabwa olukengerwa, erisikibwa, n’obutoki, kundi muwahangyika ebindu byosi, kandi ebindu byosi byabyaho n’erihangyikwa busana n’erisonda ryaghu.”
Amaelezo awehikwa
^ Kutse “eribwe ery’obughuli bunene ery’erangyi y’omusasi.”
^ Kutse “enzeru, blanc.”
^ Kutse “omo kati-kati aho kitumbi ky’obwami kiri.”
^ Ulebaye endomeko A5.
^ Ulebaye endomeko A5.
