Eribisulirwa eryo Yohana ahabawa 5:1-14
5 Kandi munalangira omo byala by’amali by’oyo wabya wikere oko kitumbi ky’obwami imune ekitabu ky’erilinga. Kyabya kihandikireko oko syombande ibiri, kandi kyabya kibohire omo bindu irinda (7) by’eribohamo ekitabu ky’erilinga.
2 Kandi munalangira omumalaika w’amaka akabugha omo mulenge muli ati: “Nindi yutolere erikingula ekitabu ky’erilinga n’eribohola ebindu ebibohirekyo?”
3 Aliwe, elubula, oko kihugho, kutse emwisi sy’ekitaka habya isihali oyo wangatoka erikingula ekitabu ky’erilinga kutse erilebya mukyo.
4 Munalira kutsibu kundi muhatasungika oyutolere erikingula ekitabu ky’erilinga kutse erilebya mukyo.
5 Aliwe, omughuma w’oko basyakulu mwanibwira ati: “Isiwalira. Esimba y’omo kihanda kya Yuda, omulihi wa Daudi abirikinda. Neryo akendikingula ekitabu ky’erilinga n’ebindu irinda (7) ebibohirekyo.”
6 Kandi munalangira ekyana ky’embuli ekyabya nga kyabirikerwa ikinimene omo kati-kati k’ekitumbi ky’obwami n’ebihangyikwa bini ebiriho, n’omo kati-kati k’abasyakulu. Ekyana ky’embuli ekyo kyabya n’amahembe irinda (7) n’ameso irinda. Ameso ayo akasosekanaya ebirimu irinda by’oMungu ebyatumawa omo kihugho kyosi.
7 Aho n’aho mukyaseghera hakuhi, kyamimya ekitabu ky’erilinga ekyabya omo byala by’amali by’oyo wabya wikere oko kitumbi ky’obwami.
8 Kyabere kyabimya ekitabu ky’erilinga, ebihangyikwa bini ebiriho, n’abasyakulu 24 mubakukama embere sy’Ekyana ky’Embuli. Obuli mughuma w’okw’ibo abya n’enanga n’ebibakuli* by’ehoro ebyabya byoswiremo obukwa. (Obukwa bukasosekanaya emisabe y’ababuyirire.)
9 Kandi bakimba olwimbo luhya-luhya, olukabugha luti: “Utolere erimya ekitabu ky’erilinga n’erikingula ebibohirekyo kundi muwitibwa, n’omo musasi waghu muwaghulira oMungu y’abandu b’omo buli kihanda, obuli mubughe, obuli bandu, n’obuli kitunga.
10 Kandi muwabayiramo bami* n’abahereri b’oMungu wetu. Bakendisyatabala ekihugho.”
11 Kandi munalangira n’eryowa omulenge w’abamalaika bangyi, abatimbire oko kitumbi ky’obwami, ebihangyikwa ebiriho, n’abasyakulu. Babya amakumi w’amaelfu w’amakumi w’amaelfu n’amaelfu w’amaelfu.
12 Kandi babya ibanemubugha omo mulenge muli bati: “Ekyana ky’Embuli ekyakerawa kitolere erihabwa obutoki, obuteke, amenge, akaghala, erisikibwa, olukengerwa, n’emiyisa.”
13 Kandi munowa ebihangyikwa byosi ebyabya elubula, oko kihugho, emwisi w’ekitaka, omo ngetse n’ebyosi ebirimo, bikabugha biti: “Oyo wikere oko kitumbi ky’obwami n’Ekyana ky’Embuli, bahabawe emiyisa, erisikibwa, olukengerwa, n’obutoki kera na kera.”
14 Ebihangyikwa bini ebiriho byabya bikabugha biti: “Amina!” N’abasyakulu mubakukama n’eriramya.
