Eribisulirwa eryo Yohana ahabawa 6:1-17
-
Ekyana ky’Embuli kyamakingula ebindu ndatu (6) ebibohire ekitabu ky’erilinga (1-17)
-
Oyukakinda ali oko sabayiri y’omusohe (1, 2)
-
Oyuli oko sabayiri y’erangyi y’omuliro amahabwa obutoki bw’erilusyaho obuholo (3, 4)
-
Oyuli oko sabayiri y’ekirima akaleta enzala (5, 6)
-
Oyuli oko sabayiri y’erangyi y’eribu akahulawamo Luholo (7, 8)
-
Esyonafsi sy’abakerawa siri emwisi w’ekiherero (9-11)
-
Omusiki munene (12-17)
-
6 Kandi munalangira omughulu Ekyana ky’Embuli kyabohola ekighuma ky’oko bindu irinda (7) ebibohire ekitabu ky’erilinga. Kandi munowa ekighuma ky’oko bihangyikwa bini ebiriho kikabugha omo mulenge owali ng’omulenge w’eriluma ry’obutuku kiti: “Asa!”
2 Neryo munalangira esabayiri* y’omusohe,* n’oyo wabya wikere kuyo abya n’ekindu ky’erighusamo omusali.* Mubamuha embita. Neryo mwaghenda akakinda n’eribughirira erikinda riwe.
3 Omughulu Ekyana ky’Embuli kyakingula ekindu ky’akabiri ekyabya kibohire ekitabu ky’erilinga, munowa ekihangyikwa eky’akabiri ekiriho kikabugha kiti: “Asa!”
4 Eyindi sabayiri* muyahuluka. Yabya y’erangyi y’omuliro. Oyo wabya wikere kuyo mubamuha obutoki bw’erilusya obuholo oko kihugho, kusudi abandu bitane. Kandi mubamuha omuyali munene.
5 Omughulu Ekyana ky’Embuli kyakingula ekindu ky’akasatu ekyabya kibohire ekitabu ky’erilinga, munowa ekihangyikwa ky’akasatu ekiriho kikabugha kiti: “Asa!” Neryo munalangira esabayiri* y’ekirima,* n’oyo wabya wikere kuyo abya n’ekilo omo byala biwe.
6 Munowa owali ng’omulenge omo kati-kati k’ebihangyikwa bini ebiriho akabugha ati: “Ekilo kighuma ky’engano ni dinari* nguma, n’ebilo bisatu by’ekisusu ni dinari nguma. Kandi isimwatsandaya amaghuta w’emizeituni n’edivai.”
7 Omughulu Ekyana ky’Embuli kyakingula ekindu ky’akani ekyabya kibohire ekitabu ky’erilinga, munowa omulenge w’ekihangyikwa ky’akani ekiriho akabugha ati: “Asa!”
8 Neryo munalangira esabayiri* y’erangyi y’eribu, n’oyo wabya wikere kuyo abya akahulwamo Luholo. N’Eyisinda* yabya iyinemumukwama hakuhi-kuhi. Neryo mubabaha obutoki oko kihande ky’ebini ky’ekihugho obw’eriita abandu omo muyali muli, omo nzala, omo bihunzo, n’omo syonyama sy’omoli sy’ekihugho.
9 Omughulu Ekyana ky’Embuli kyakingula ekindu ky’akani ekyabya kibohire ekitabu ky’erilinga, munalangira emwisi w’ekiherero iyine esyonafsi* sy’abakerawa busana n’ekinywa ky’oMungu, kandi busana n’omubiiri w’erihubirya ogho babya bakakola.
10 Omusasi w’abandu abo mwabugha omo mulenge muli ati: “Iwe Mukama Mukulu Oko Bosi, oyubuyirire n’ow’ekwenene, twasyalindirira erihika oko mughulu wahi imo wasala watswera abikere oko kihugho n’eribaha amalipizi busana n’omusasi wetu ogho buta?”
11 Kandi obuli mughuma wa kubo mwahabwa ekanzu y’omusohe.* Kandi mubababwira ambu bataluhuka hake erihika omughulu emighanzo y’abakobe balikyabo n’ey’abaghala babo abakisiya ibitibwa ngoko nabo bitibawa ikendisyaghonera.
12 Kandi munalangira omughulu Ekyana ky’Embuli kyakingula ekindu ky’endatu (6) ekyabya kibohire ekitabu ky’erilinga. Neryo muhabya omusiki munene n’eryuba muryakina ng’olukimba lw’esaki,* n’omughenda wosi mwabya ng’omusasi.
13 N’esyongununu sy’elubula musyatoghera oko kihugho ng’omughulu ekihunga kinene kikatsinga-tsingaya omuti w’etini neryo ikyatoghongya ebikuke by’esyotini.
14 N’olubula mulwayihighulaho ng’ekitabu ky’erilinga ekikalingawa, ebitwa byosi n’ebisanga* mubyalusibwaho.
15 Neryo abami b’ekihugho, abakulu, abakomanda, abateke, abawite akaghala, abakobe bosi, n’abandu bosi abate bakobe, mubayibisa omo myangalu, n’omo mabwe manene-manene w’oko bitwa.
16 Babya bakabera eribwira ebitwa n’amabwe manene-manene bati: “Mututerereko n’eritubisa kusudi oyo wikere oko kitumbi ky’obwami isyatulangira. Kandi mutubise okw’ihitana ry’Ekyana ky’Embuli.
17 Kundi ekiro ky’erihitana ryabo kyabirihika, neryo nindi yukendibala?”
Amaelezo awehikwa
^ Kutse “efarasi, eshevale.”
^ Kutse “enzeru, blanc.”
^ Kutse “obuta, upinde.”
^ Kutse “efarasi, eshevale.”
^ Kutse “efarasi, eshevale.”
^ Kutse “noir.”
^ Ekitsere ky’Abanya Roma ekyabya kikokotibwe omo feza. Kyabya omupokero w’omubiiri w’ekiro kighuma. Ulebaye endomeko B14.
^ Kutse “efarasi, eshevale.”
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
^ Alinga ni musasi owutika hakuhi n’ekiherero.
^ Kutse “enzeru, blanc.”
^ Kutse “epiri, olukimba lw’ekiriro.” Alinga olukokotibwe omo bweya bw’embene
^ Kutse “îles.”
