Eribisulirwa eryo Yohana ahabawa 7:1-17
7 Enyuma sy’aho, munalangira abamalaika bani ibanimene oko syongonde* ini sy’ekihugho. Babya ibanahambirire ebihunga bini by’ekihugho kusudi sihabye ekihunga n’ekighuma ekikendibuhirira oko kihugho, oko ngetse, kutse oko muti wosi-wosi.
2 Kandi munalangira oghundi mumalaika akalua eyo eryuba rikasira.* Abya n’ekindu ekyo oMungu amuha busana n’erihira oko bandu kw’ekiminyikalo. Mwabugha omo mulenge muli n’abamalaika bani ababirihabwa obutoki bw’eritsandya ekihugho n’engetse.
3 Mwababwira ati: “Isimwatsandaya ekihugho, engetse, kutse emiti erihika omughulu tukendisyabugha erihira ebiminyikalo oko syombumo sy’abakobe b’oMungu wetu.”
4 Neryo munowa emighanzo y’abandu abahirawako ekiminyikalo. Babya bandu 144 000. Bahirawako ekiminyikalo omo buli kihanda ky’abana be Israeli:
5 omo kihanda kya Yuda, abahirawako ekiminyikalo babya 12 000;omo kihanda kya Rubeni, abahirawako ekiminyikalo babya 12 000;omo kihanda kya Gadi, abahirawako ekiminyikalo babya 12 000;
6 omo kihanda kya Aseri, abahirawako ekiminyikalo babya 12 000;omo kihanda kya Naftali, abahirawako ekiminyikalo babya 12 000;omo kihanda kya Manase, abahirawako ekiminyikalo babya 12 000;
7 omo kihanda kya Simeoni, abahirawako ekiminyikalo babya 12 000;omo kihanda kya Lawi, abahirawako ekiminyikalo babya 12 000;omo kihanda kya Isakari, abahirawako ekiminyikalo babya 12 000;
8 omo kihanda kya Zabuloni, abahirawako ekiminyikalo babya 12 000;omo kihanda kya Yozefu, abahirawako ekiminyikalo babya 12 000;omo kihanda kya Benyamini, abahirawako ekiminyikalo babya 12 000.
9 Enyuma sy’aho, munalangira endeko nene* eyo omundu ate angatoka erighanza, ey’abandu b’omo bitunga byosi, b’ebihanda byosi, b’abandu bosi, n’emibughe yosi. Babya bimene embere sy’ekitumbi ky’obwami, n’embere sy’Ekyana ky’Embuli, ibanambite esyokanzu sy’omusohe,* ibanawite oko mitahi y’amabondo omo byala byabo.
10 Kandi omughulu wosi babya ibanemubugha omo mulenge muli bati: “Omulamo wetu akalua oko Mungu wetu, oyo wikere oko kitumbi ky’obwami, kandi akalua oko Kyana ky’Embuli.”
11 Abamalaika bosi babya batimbire oko kitumbi ky’obwami, oko basyakulu, n’oko bihangyikwa bini ebiriho. Kandi mubakukama embere sy’ekitumbi ky’obwami n’eriramya oMungu.
12 Babya bakabugha bati: “Amina! Eripipwa, olukengerwa, amenge, erisima, erisikibwa, obutoki, n’akaghala bitolere erihabwa oMungu wetu kera na kera. Amina.”
13 Neryo omughuma w’oko basyakulu mwanibulya ati: “Abandu aba abambite esyokanzu sy’omusohe* ni bahi kandi bakalua hayi?”
14 Neryo munamusubirya niti: “Mukama waghe, iwe wasi.” Neryo mwanibwira ati: “Abandu aba bakalua omw’ighalwa rinene, kandi babirifula esyokanzu syabo nyiri n’eriyirasyo mo sy’omusohe* omo musasi w’Ekyana ky’Embuli.”
15 Ekyo kyo kikaleka ibabya embere sy’ekitumbi ky’obwami ky’oMungu, kandi bakamukolera omubiiri mubuyirire omo kiro n’omwitungyi omo hekalu yiwe. N’oyo wikere oko kitumbi ky’obwami akendisyabaswika omo hema yiwe.
16 Sibendisyasyakwa enzala, kutse enyota, kutse eryuba siryendisyabahisya, kutse ekihuhania kyosi-kyosi.
17 Kundi Ekyana ky’Embuli ekiri omo kati-kati k’ekitumbi ky’obwami kikendisyabya mulisya wabo, kandi kikendisyabasondola n’eritwalabo oko syongununuko sy’amaghetse w’engebe. Kandi oMungu akendisyasangula emisonia yosi omo meso wabo.”
Amaelezo awehikwa
^ Kutse “syosonda, coins.”
^ Kutse “ematanga ryuba.”
^ Kutse “ekikumula ky’abandu bangyi.”
^ Kutse “enzeru, blanc.”
^ Kutse “enzeru, blanc.”
^ Kutse “enzeru, blanc.”
