Eribisulirwa eryo Yohana ahabawa 8:1-13
8 Omughulu Ekyana ky’Embuli kyakingula ekindu ky’eririnda (7) ekyabya kibohire ekitabu ky’erilinga, olubula mulwahunerera hakuhi omo nusu y’esaha.
2 Neryo munalangira abamalaika irinda (7) abakimana embere sy’oMungu. Mubahabwa esyongunga irinda.
3 Oghundi mumalaika oyo wabya n’ekindu ky’ehoro ky’erihisiryamo obukwa mwahika n’erimana hakuhi n’ekiherero. Neryo mubamuha obukwa bunene, atoke erihererabo oko kiherero ekiri embere sy’ekitumbi ky’obwami n’emisabe y’ababuyirire bosi iyinemuhetuka.
4 Omuki w’obukwa owabya omo byala by’omumalaika mwahetukira embere sy’oMungu haghuma n’emisabe y’ababuyirire.
5 Enyuma sy’aho, omumalaika mwalw’inimya ekindu ky’erihisiryamo obukwa, musulyamo amakala awalusaya oko kiherero, neryo mwaghusawo oko kihugho. Neryo muhabya emilumo y’obutuku, emilenge, amapalyo, n’emisiki.
6 Neryo abamalaika irinda (7) ababya n’esyongunga irinda mubayiteghekania eribuha musyo.
7 Omumalaika w’erimbere mwabuha omo ngunga yiwe. Neryo muhabya eritsuku n’omuliro owatswangenemo omusasi. Kandi ebyosi ebyo mubyaghuswa oko kihugho. Neryo ekighuma ky’oko bisatu ky’ekihugho mukyahya, n’ekighuma ky’oko bisatu ky’emiti mukyahya, n’ebiti byosi mubyahya.
8 Omumalaika w’akabiri mwabuha omo ngunga yiwe. Neryo ekindu ekiri ng’ekitwa kinene ekiriko omuliro mukyaghuswa omo ngetse. Neryo ekighuma ky’oko bisatu ky’engetse mukyahinduka musasi.
9 N’ekighuma ky’oko bisatu ky’esyonyama esyabya omo ngetse musyahola, ekighuma ky’oko bisatu ky’amato mukyatsutsangika.
10 Omumalaika w’akasatu mwabuha omo ngunga yiwe. Neryo engununu nene eyabya ikaka ng’etala muyatogha erilua elubula. Muyatoghera oko kighuma ky’ebisatu ky’esyonyusi n’oko syongununuko sy’amaghetse.
11 Erina ry’engununu eyo ni Ngalihira. Neryo ekighuma ky’ebisatu ky’amaghetse mukyabindukamo ngalihira. N’abandu bangyi mubahola busana n’amaghetse ayo kundi abya iniabirikaliha.
12 Omumalaika w’akani mwabuha omo ngunga yiwe. Neryo ekighuma ky’ebisatu ky’eryuba, ekighuma ky’ebisatu ky’omughenda, n’ekighuma ky’ebisatu ky’esyongununu mubyabandwako kusudi ekighuma ky’ebisatu kyabyo kibyemo mwirima, kandi sihabye ekyakakala omo kighuma ky’ebisatu ky’eritungyi n’omo kighuma ky’ebisatu ky’ekiro.
13 Kandi munalangira n’eryowa erisamba rikaghuluka omo kati-kati k’olubula, rikabugha omo mulenge muli riti: “Obulighe, obulighe, obulighe oko bosi abikere oko kihugho busana n’emilenge y’esyongunga sy’abamalaika abasatu abakisiya ibabuha musyo.”
