Eribisulirwa eryo Yohana ahabawa 9:1-21
9 Omumalaika w’akatano mwabuha omo ngunga yiwe. Neryo munalangira engununu eyalua elubula n’eritoghera oko kihugho. Neryo engununu eyo muyahabwa olufungura lw’ekyuna kiri-kiri.
2 Engununu eyo muyakingula ekyuna kiri-kiri, neryo omuki mwalua omo kyuna ekyo. Abya ng’omuki owakalua omo riko rinene. Neryo omuki owalua omo kyuna ekyo mwaleka eryuba n’ekyanya ibyabyamo omwirima.
3 N’esyongyike musyalua omo muki oyo. Musyayitsatsanga oko kihugho. Neryo musyahabwa obutoki obuli ng’obw’esyonge sy’oko kihugho.
4 Mubabwirasyo ambu isisyatsandaya ebiti, eyindi mimea, n’emiti y’oko kihugho, aliwe ambu sinekeraye abandu abateko ekiminyikalo ky’oMungu oko syombumo syabo.
5 Kandi esyongyike musitahabwa obutoki bw’eriitabo, aliwe musyahabwa obutoki bw’eryaghalyabo omo misi itano. N’obulumi obo bowa bwabya ng’obulumi obo mundu akowa omughulu akalumawa n’enge.
6 Oko biro ebyo, abandu bakendisyasondya oluholo, aliwe sibendisyasungalo. Kandi bakendisyanza erihola, aliwe oluholo lukendisyasaghabo.
7 Esyongyike esyo syabya sisosire esyosabayiri* esyabiriteghekanibwa oko malwa. Oko mitwe yasyo kwabya ebindu ebisosire esyombita sy’ehoro. Obusu bwasyo bwabya ng’obusu bw’abandu.
8 Aliwe, esyonzwiri syasyo syabya ng’esyonzwiri sy’abakali, n’ameno wasyo abya ng’ameno w’esyosimba.
9 N’ebindu ebikateghaya ekikuba ky’esyongyike esyo byabya ng’ebindu ebikateghaya ekikuba ebikokotibwe omo kyuma. Ebipupa byasyo byabya bikaleta efuyo eyiri ng’ey’emitoka eyikakurawa n’esyosabayiri* esikaya eyiri amalwa.
10 N’emikira yasyo yiriko ehindu ehikahutalaya ehiri ng’ehy’esyonge. N’omo mikira yasyo muli obutoki bw’eryaghalya abandu omo misi itano.
11 Omwami w’esyongyike esyo yo mumalaika w’ekyuna kiri-kiri. Omo Kiebrania akahulawamo Abadoni, n’omo Kigiriki iniahulwamo Apolioni.
12 Obulighe bughuma bwabirilaba. Hakisiya amalighe abiri.
13 Omumalaika w’endatu (6) mwabuha omo ngunga yiwe. Neryo munowa omulenge akasira omo mahembe awali oko kiherero ky’ehoro ekiri embere sy’oMungu.
14 Mwabwira omumalaika w’endatu (6) oyo wabya n’engunga ati: “Ubohole abamalaika bani ababohirwe hakuhi n’olusi lunene lwe Efrati.”
15 Neryo abamalaika bani abo mubaboholwa batoke eriita ekighuma ky’ebisatu ky’abandu. Abamalaika abo babya ibabiriteghekanibwa busana n’esaha, ekiro, omwisi, n’omwaka.
16 Emighanzo y’abasuda ababya oko syosabayiri yabya 200 000 000 (milioni mia mbili). Munowa emighanzo yabo.
17 Kandi esyosabayiri esyo nalangira omo nzoli n’ababya bikere kusyo babya batya: Babya n’ebindu ebikateghaya ekikuba, eby’erangyi y’omusasi eyiri ng’omuliro, n’eby’erangyi y’eble* y’ehayasinti, n’eby’erangyi y’ejone* y’esufre,* n’emitwe y’esyosabayiri yabya ng’emitwe y’esyosimba, n’omo buno bwasyo mwabya mukalua omuliro, omuki, n’esufre.*
18 Ekighuma ky’ebisatu ky’abandu mukitibwa omo bihunzo bisatu ebi: Omuliro, omuki, n’esufre* eyabya yikalua omo buno bwasyo.
19 Akaghala kasyo kali omo buno bwasyo n’omo mikira yasyo, kundi emikira yasyo yiriko emitwe, kandi yiri ng’esyonzoka, kandi sikaghalaya abandu omo mikira eyo.
20 Aliwe, abandi bandu abatitibawa omo bihunzo ebyo, mubataleka ebyo babya bakakola. Mubataleka eriramya esyombinga, esyosanamu sy’ehoro, sy’efeza,* sy’ekwivre,* sy’amabwe, sy’emiti, esitesyangalangira, eryowa kutse erighenda.
21 Kandi mubatatsira amalolo wabo, ni bugha ambu obwiti, emyatsi y’obukumu, oburaghane,* n’obwibi.
Amaelezo awehikwa
^ Kutse “esyofarasi, esyoshevale.”
^ Kutse “n’esyofarasi, n’esyoshevale.”
^ Kutse “muteghule, kaniki.”
^ Kutse “erangyi y’ekisande, erangyi y’ekikene.”
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Ni kindu ky’obughuli ekikalua omo kitaka.
^ Kutse “sy’omulinga.”
^ Omo Kigiriki ni por·neiʹa. Ulebaye amaana w’ebinywa.
