Eriluayo 15:1-27
15 Neryo Musa n’Abaisraeli mubimbira Yehova yo lwimbo luno:
“Ngendyimbira Yehova, kusangwa abirikinda omo lukengerwa lunene.
Esabayiri n’oyuli kuyo, abirighusabo omo ngetse.
2 Yah* ni maka waghe kandi ni kaghala kaghe.
Kusangwa abiribya mulamo waghe.
Oyu ni Mungu waghe, kandi ngendimupipa;OMungu wa tata waghe, kandi ngendimuhalamba.
3 Yehova ni mulwi w’amaka.
Yehova ryo rina riwe.
4 Abirighusa emitoka y’amalwa* ya Farao n’emilondo yiwe omo ngetse,N’esyombangyi siwe syabiryongoberera omo Ngetse y’Engula.
5 N’ebisunda by’amaghetse byabiriswikabo;Babiryongoberera omo mutobero w’engetse ng’eribwe.
6 Yehova, ebyala byaghu by’amali biwite obutoki bunene,Yehova ebyala byaghu by’amali, byanganabunzungula enzighu mo bitswe-bitswe.
7 Omo bukulu bwaghu, ukakinda abakahangana erilwa naghu,Ukatuma erihitana ryaghu erikaka, iryahisyabo ng’ebiti ebyumire.
8 Omo muka w’emihuli yaghu, amaghetse mwabya kilundo;Amaghetse mwimana, ebisunda mubyimana;Amaghetse mwabohana omo mutobero w’engetse.
9 Enzighu muyabugha yiti: ‘Ngendikwamirirabo! Ngandilengyabo amaghulu!
Ngendighaba ebyo niryanyegha erihika aho ngendighutira!
Ngendilusya omuyali waghe omo lubo lwagho! Ebyala byaghe bikendikindabo!’
10 Muwabuhirira omo muka waghu, n’engetse yamaswikabo;Mubatobera omo maghetse manene, ng’ekyuma ekilitohire.*
11 Yehova, omo kati-kati k’emiungu, nindi yuli nga we?
Nindi yuli nga we, iwe ukayikanganaya ko ubuyirire kutsibu?
Iwe utolere eryubahwa omo syonyimbo sy’eripipaIwe ukakola emyatsi y’eriswekera.
12 Muwasumba ebyala byaghu by’amali, n’ekitaka mukyamerabo.
13 Omo lwanzo oluteleghula,* wabirisondola abandu baghu,Abo wakombola omo maka waghuUkendibasondola erihika omo bwikalo bwaghu obubuyirire.
14 Litolere abandu ibowagho, neryo ibatitimana;Amaghali* akendihika oko bandu be Filistia.
15 Oko mughulu oyo, abakama* be Edomu bakendisyubaha kutsibu;N’abatabali b’amaka be Moabu bakendisyatitimana.
Abikalani bosi be Kanana bakendisyayibulamo omutima.
16 Obuba n’erititimana bikendisyabahikako.
Busana n’obukulu b’okuboko kwaghu, bakendisyabya butaseghana ng’eribwe,Erihika aho abandu baghu bakendisyalabira, iwe Yehova,Erihika aho abandu baghu abo wahiraho bakendisyalabira.
17 Ukendisyaletabo n’erihandabo omo kitwa ky’omwandu waghu,Omo bwikalo obo iwe Yehova, wabiriyiteghekanirya,Ahabuyirire aho iwe Yehova wakokotaya omo byala byaghu.
18 Yehova akendisyatabala n’eribya Mwami kera na kera.
19 Esyosabayiri sya Farao n’emitoka yiwe y’amalwa*Haghuma n’abandu biwe abakaghenda oko syosabayiriBabere babingira omo ngetse,Yehova mwasubulya amaghetse w’engetse amaswikabo.
Aliwe Abaisraeli mubalaba oko kitaka ekyumire omo kati-kati k’engetse.”
20 Neryo mwali wabo Haruni, ye Miriamu, omuminyereri w’obukali mwimya akaghoma* omo byala biwe. N’abandi bakali bosi mubamukwama ibanawite oko highoma, ibanemusata.
21 Miriamu mwimba akasubirya oko lwimbo lw’abalume ati:
“Mwimbire Yehova kusangwa abirikinda omo lukengerwaAbirighusa esabayiri n’oyukaghendayayo omo ngetse.”
22 Enyuma sy’aho Musa mwasondola Abaisraeli, bamalua oko Ngetse y’Engula, bamaya omo mbwarara ye Shuri. Mubaghenda ebiro bisatu omo mbwarara, aliwe mubatabana amaghetse.
23 Mubahika e Mara.* Nikwa mubatatoka erinywa oko maghetse we Mara kundi abya akalihire. Kyo kyaleka iniahulaho mo Mara.’
24 Neryo abandu mubatsuka eriyilungumula oko Musa, bati: “Neryo tukanywaki?”
25 Mwalakira Yehova, na Yehova mwamukangirira ahali omuti. Abere abighusagho omo maghetse, amaghetse mwasiha.
Aho oMungu mwabaha omughambo, n’ekyalayiro ky’erikolesya omw’itswera. Kandi aho mwabalengako.
26 Mwababwira ati: “Mwamabihulikirira ndeke-ndeke omulenge wa Yehova Mungu wenyu, n’erikola ebikamutsemesaya, n’eritegha amatwi oko bihano biwe, n’erikwama emighambo yiwe yosi, isinendisyabaletako endwala n’enguma eyo naletera Abamisri. Kusangwa ingye Yehova ngabalamaya.
27 Enyuma sy’aho mubahika e Elimu, ahabya esyonunga 12 n’emiti 70 y’etende.* Neryo mubahimba ekambi hakuhi n’amaghetse.
Amaelezo awehikwa
^ Yah ni kikuhi ky’erina Yehova.
^ Kutse “esyosharyo.”
^ Kutse “erisasi, plomb.”
^ Kutse “obubuya bwaghu bw’olwanzo; olwanzo lwaghu olutyusa.”
^ Kinywa kwa kinywa, “amaghali awali ng’awakahikira omukule akasonda eributa.”
^ Kinywa kwa kinywa, “abashehe.” Omushehe ini mukulu w’ekihanda.
^ Kutse “esyosharyo.”
^ Kutse “akakeleya, akaghoma k’omo byala.”
^ Kikamaanisaya “erikaliha.”
^ Omuti w’etende asosire omuti w’obukindo.
