Eriluayo 28:1-43

CHINGULA

Esyongyimba sy’abahereri (1-5)
E efodi (6-14)
Ekindu ky’eryambala oko kikuba (15-30)
- E Urimu ne Tumimu (30)
Erikoti eriteko amaboko (31-35)
Esyapu y’ekilemba eyiriko akuma k’ehoro (36-39)
Esindi ngyimba sy’abahereri (40-43)

28 “Omo kati-kati k’Abaisraeli, ubirikire omughala wenyu ye Haruni haghuma n’abaghala biwe, banikolere mo bahereri. Haruni haghuma na Nadabu na Abihu, Eleazari na Itamari, abaghala ba Haruni. ² Ukendikokoterya omughala wenyu ye Haruni y’esyongyimba esibuyirire busana n’olukengerwa n’obubuya. ³ Ukendikania n’abafundi* abasi erikola omubiiri wo ndeke abo nabiryusulyako ekirimu ky’amenge. Bakendikokotya esyongyimba sya Haruni busana n’erihighulwa* liwe atoke eribya muhereri waghe. ⁴ “Esyongyimba esyo bakendikokotya syesi: ekindu ky’eryambala oko kikuba, e efodi, erikoti eriteko amaboko, ekanzu ey’ekare-kare, esapu y’ekilemba, n’omukaba w’omo kanzu. Bakendisyakokoterya esyongyimba esibuyirire esi syo Haruni mughala wenyu n’abaghala biwe atoke eribya muhereri waghe. ⁵ Abafundi abasi erikola omubiiri wo ndeke, bakendisyakolesya ehoro, e uzi ye ble,* obweya bw’embuli bw’erangyi y’olubono-bono,* e uzi y’erangyi y’omusasi eyihena-henirye, n’ekitani ekihungire ndeke. ⁶ “Bakendisyakokotya e efodi omo horo, e uzi ye ble,* obweya bw’embuli bw’erangyi y’olubono-bono,* e uzi y’erangyi y’omusasi eyihena-henirye, n’ekitani ekihungire ndeke, kandi bakendisyasonera kuyo kw’emitsoro ye uzi. ⁷ E efodi ikendisyabya n’ebihande bibiri by’olukimba lw’eryambala oko bitigho olumatanibwe endata oko misike yalo ibiri. ⁸ Omukaba owalukire owakendisyahirwa oko efodi busana n’erihambirirayo, akendisyakokotibwa omo bindu bighumerara. Ehoro, e uzi ye ble,* obweya bw’embuli bw’erangi y’olubono-bono,* e uzi y’erangyi y’omusasi eyihena-henirye, n’ekitani ekihungire ndeke. ⁹ Ukendisyimya amabwe abiri we oniksi n’erighegha kugho kw’amena w’abaghala ba Israeli. ¹⁰ Amena 6 oko ribwe righuma, n’awandi mena 6 oko rindi ribwe, erikwamana ngoko babutirwe. ¹¹ Oyukaghegha oko mabwe, akendisyaghegha amena w’abaghala ba Israeli oko mabwe abiri ayo, ngoko omundu akanaghegha akashe; neryo ukendisyahiragho omo hindu hy’ehoro. ¹² Ukendisyahira amabwe ayo omo bihande bibiri by’olukimba l’oko bitigho olwe efodi eribya mabwe w’eryibukya busana n’abaghala ba Israeli. Na Haruni akendisyaheka amena wabo embere sya Yehova oko bihande bibiri by’olukimba l’oko bitigho busana n’eryibukwa.* ¹³ Ukendisyakokoterya amabwe ayo w’ehindu hy’ehoro ehyo akendisyabyamo, ¹⁴ n’eminyororo ibiri eyihungire ng’ekamba eyikokotibwe omo horo eyerire. Ukendisyabohera eminyororo eyo oko hindu hy’erihiramo amabwe. ¹⁵ “Ukendisyabwira omundu oyo wasi erihira edese y’omo lukimba, uti akokotaye ekindu ky’eryambala oko kikuba, eky’erikolesya busana n’eriminya eritswera ly’oMungu. Kikendisyakokotibwa nge efodi; omo horo, e uzi ye ble,* obweya bw’embuli bw’erangyi y’olubono-bono,* e uzi y’erangyi y’omusasi eyihena-henirye, n’ekitani ekihungire ndeke. ¹⁶ Kikendisyabya kyalingwa, ekindu ky’eryambala oko kikuba ekyo, kikendisyalingirirana oko mbande syakyo syosi. Ekyosi kikendisyabya n’obuli bw’epa nguma y’ebyala* n’obutambi bw’ebyala bighuma. ¹⁷ Ukendisyahira oko kindu ekyo kw’emilondo 4 y’amabwe eyitondekire. Omulondo w’erimbere akendisyabya w’amabwe w’erubi, topazi, n’ezumaridi. ¹⁸ Omulondo w’akabiri akendisyabya w’amabwe w’etirkwaze, yakuti, n’eyaspi. ¹⁹ Omulondo w’akasatu akendisyabya w’amabwe we leshemi,* agate, ne ametisti. ²⁰ Omulondo w’akani akendisyabya w’amabwe we krisolito, oniksi, n’ejade. Amabwe ayo akendisyahirwa omo hindu hy’erihira w’omo ehy’ehoro. ²¹ Amabwe ayo akandisyalingana n’emighanzo y’amena w’abaghala 12 ba Israeli. Obuli ribwe rikendisyaghewa ng’akashe. Kandi obuli ribwe rikendisyabyako erighuma ry’oko mena w’ebihanda 12 bya Israeli. ²² “Ukendisyahira oko kindu ky’eryambala oko kikuba kw’eminyororo eyilukire ng’esyokamba esikokotibwe omo horo eyerire. ²³ Ukendisyakokoterya oko kindu ky’eryambala oko kikuba ekyo kw’esyombuka ibiri sy’ehoro n’erihirasyo oko misike ibiri y’ekindu ky’eryambala oko kikuba ekyo. ²⁴ Ukendisyalabya esyokamba ibiri sy’ehoro esyo omo syombuka ibiri esiri oko musike w’ekindu ky’eryambala oko kikuba. ²⁵ Ukendisyaghobya emitwe-mitwe y’esyokamba ibiri esyo omo hindu hibiri hy’erihiramo amabwe ehiri oko bitigho n’eriboherasyo oko luhande lw’embere lw’ebihande by’olukimba l’oko bitigho olwe efodi. ²⁶ Ukendisyakokotya esyombuka ibiri sy’ehoro. Ukendisyahirasyo oko misike ibiri y’ekindu ky’eryambala oko kikuba, oko musike wakyo kw’emwisi oko efodi. ²⁷ Ukendisyakokotya n’esindi mbuka ibiri esy’ehoro oko luhande lw’embere oko efodi ahikwa oko bihande bibiri by’olukimba l’oko bitigho olwe efodi, hakuhi n’aho e efodi imatanibwe, endata oko mukaba owalukire. ²⁸ Ekindu ky’eryambala oko kikuba kikendisyabohwa omo kamba ye ble* kitoke erihamba ndeke. Ekamba eyo ikendisyabohera haghuma esyombuka sy’ekindu ky’eryambala oko kikuba n’esyombuka sye efodi. Ekyo kikendisyaleka ekindu ky’eryambala oko kikuba ikyahamba ndeke oko efodi endata oko mukaba owalukire. ²⁹ Haruni akendisyaheka oko mutima wiwe amena w’abaghala ba Israeli oko kindu ky’eryambala oko kikuba ekikawatikaya eriminya eritswera ry’oMungu, omughulu akingira Ahabuyirire busana n’eryibukwa mughulu wosi embere sya Yehova. ³⁰ Omo kindu ky’eryambala oko kikuba ekyo ekikawatikaya eriminya eritswera ly’oMungu, ukendisyahiramo e Urimu, ne Tumimu.* Bikendisyabya oko kikuba kya Haruni omughulu akingira embere sya Yehova. Mughulu wosi Haruni akendisyaheka oko mutima wiwe embere sya Yehova ebindu ebyo, eby’erikolesya omw’itswera erilebirye Abaisraeli. ³¹ “Erikoti rye efodi eriteko amaboko, ukendisyakokotyaryo omo uzi ye ble* nyisa. ³² Likendisyabya n’ekyuna ky’erilabyamo omutwe endata* walyo omo kati-kati. Ekyuna ekyo kikendisyatimbako omutsotso owakendisyakolwa n’omuluki w’esyongyimba. Kikendisyabya ng’ekyuna ky’oko rikoti ry’ekyuma, kikasyalandukala. ³³ Oko ndina yaryo oko mbande syosi, ukendisyatimbyako amakomamanga we uzi y’erangyi ye ble,* obweya bw’embuli bw’erangyi y’olubono-bono,* ne uzi y’erangyi y’omusasi eyihena-henirye. N’omo kati-kati k’amakomamanga ayo, hakendisyabya esyonzogha sy’ehoro. ³⁴ Oko ndina y’erikoti eriteko maboko eryo, eritimba kuryo, ukendisyakwama-kwamania enzogha y’ehoro n’ekomamanga, enzogha y’ehoro n’ekomamanga. ³⁵ Haruni akendisyambalaryo atoke erikola omubiiri. N’omulenge w’esyonzogha owakasira omo rikoti eryo, litolere inyowika omughulu akingira ahabuyirire embere sya Yehova, n’omughulu akaluamo; akasyahola. ³⁶ “Ukendisyakokotya akuma ak’ehoro eyerire akakamelemeta, n’erighegha kuko ngoko omundu akanaghegha akashe, uti: ‘Obubuyirire ni bwa Yehova.’ ³⁷ Ukendisyakabohera oko kilemba omo kamba y’erangyi ye ble.* Kakendisyasighala oko luhande lw’embere lw’esapu y’ekilemba. ³⁸ Kakendisyabya oko mbumo ya Haruni. Omughulu omundu mulebe akahalaya oko bindu ebibuyirire ebyo Abaisraeli bakahighula,* omughulu bakahererabyo mo bihembo bibuyirire, Haruni akendisyabyako omusango. Akatswe k’ekyuma ako, kakendisyabya oko mbumo ya Haruni mughulu wosi Abaisraeli batoke eriliwa na Yehova. ³⁹ “Ukendisyakokotya ekanzu y’ekitani ekyuwene ey’emirera-mirera. Ukedisyakokotya ekilemba omo kitani ekyuwene n’eriluka omukaba w’omo kanzu. ⁴⁰ “Ukendisyakokoterya n’abaghala ba Haruni b’esyokanzu, n’emikaba y’omo syokanzu, n’esyosapu sy’ekilemba; busana n’olukengerwa n’obubuya. ⁴¹ Ukendisyambalya omughala wenyu ye Haruni, n’abaghala biwe kutya. Ukendisyahira kubo kw’amaghuta;* ukendisyasingyabo, n’erihighulabo.* Neryo bakedisyanikolera nga bahereri. ⁴² Ukendisyabakokoterya n’ehipitula* hy’ekitani busana n’eriswika endumbu yabo. Ehipitula ehyo hikendisyatsuka omo mbindi erihika oko bihinga. ⁴³ Haruni n’abaghala biwe bakendisyabya bakambalahyo omughulu bakingira omo hema y’erihindanamo kutse omughulu bakaseghera hakuhi n’ekiherero bakasyakola omubiiri ahabuyirire. Bakendisyakola batya bakasyahalya neryo ibahola. Ni mughambo w’omughulu wosi busana naye na busana n’olubuto lwiwe enyuma siwe.