Eriluayo 39:1-43

CHINGULA

Erikokotya esyongyimba sy’abahereri (1)
E efodi (2-7)
Ekindu ky’eryambala oko kikuba (8-21)
Erikoti eriteko amaboko (22-26)
Esindi ngyimba sy’abahereri (27-29)
Akuma k’ehoro (30, 31)
Musa akayiteghereraya etabernakulo (32-43)

39 Mubaluka esyongyimba esilukire ndeke busana n’omubiiri w’ahabuyirire. Mubalukasyo omo uzi ye ble,* obweya bw’embuli bw’erangyi y’olubono-bono,* n’omo uzi ey’erangyi y’omusasi eyihena-henirye. Mubakokotya esyongyimba esibuyirire busana na Haruni ngoko Yehova anabya iniabirilayira Musa. ² Mwakokotya e efodi omo horo, e uzi ye ble, obweya bw’embuli bw’erangyi y’olubono-bono,* ne uzi y’erangyi y’omusasi eyihena-henirye, n’omo kitani ekihungire ndeke. ³ Mubahesa ebibambali binene-binene by’ehoro, byamabya hibambali hike-hike, neryo mwatwamo ehikamba ehy’eriluka haghuma ne uzi ye ble,* obweya bw’embuli bw’erangyi y’olubono-bono,* ne uzi ey’erangyi y’omusasi eyihena-henirye, n’omo kitani ekyuwene, n’emitsoro muyasonerwa oko efodi. ⁴ Mubakokotya ebihande by’olukimba l’oko bitigho ebyabya bimatanibwe haghuma. Mubyamatabibwa haghuma ne efodi oko misike ibiri y’endata ye efodi. ⁵ N’omukaba* owalukire owabya oko efodi busana n’erihambiririrayo, mwakokotibwa omo bindu bighumerera ebyo; ehoro, e uzi ye ble,* obweya bw’embuli bw’erangyi y’olubono-bono,* ne uzi ey’erangyi y’omusasi eyihena-henirye, n’omo kitani ekihungire ndeke, ngoko Yehova anabya iniabirilayira Musa. ⁶ Neryo mubahira amabwe we oniksi omo hindu hy’erihira w’omo ehy’ehoro. Mubaghegha kugho kw’amena w’abaghala ba Israeli ngoko omundu akanaghegha oko kashe. ⁷ Mwahiragho oko bihande by’olukimba l’oko bitigho ebye efodi mo mabwe w’eryibukya busana n’abaghala ba Israeli ngoko Yehova anabya iniabirilayira Musa. ⁸ Enyuma sy’aho mwakokotya ekindu ky’eryambala oko kikuba n’erihira kukyo kw’emitsoro. Mwatsorakyo ngoko e efodi yanatsorawa; omo horo, e uzi ye ble,* obweya bw’embuli bw’erangyi y’olubono-bono,* ne uzi ey’erangyi y’omusasi eyihena-henirye, n’omo kitani ekihungire ndeke. ⁹ Kyabilingwa, ekindu ky’eryambala oko kikuba ekyo kyabya kilingirirene oko mbande syosi. Ngoko bakokotayakyo, ikikabya kyabilingwa, ikikabya n’obuli n’obutambi bw’epa nguma y’ebyala.* ¹⁰ Mubatondeka kukyo kw’emilondo ini y’amabwe. Omulondo w’erimbere abya w’amabwe w’erubi, topazi, n’ezumaridi. ¹¹ Omulondo w’akabiri abya w’amabwe we tirkwaze, yakuti, n’eyaspi. ¹² Omulondo w’akasatu abya w’amabwe we leshemi, agate,* ne ametisti. ¹³ N’omulondo w’akani abya w’amabwe w’ekrisolito, oniksi, n’ejade. Abya atondekirwe omo hindu hy’erihira w’omo ehy’ehoro. ¹⁴ Amabwe ayo abya alingene n’emighanzo y’amena w’abaghala 12 ba Israeli. Amena ayo mwaghewa oko mabwe, ngoko omundu akanaghegha akashe. Obuli ribwe ryabyako erina ry’ekighuma ky’oko bihanda 12. ¹⁵ Mubakokotya eminyororo busana n’ekindu ky’eryambala oko kikuba. Yabya ilukire ng’esyokamba sy’ehoro eyerire. ¹⁶ Kandi mubakokotya ehindu hibiri hy’ehoro n’esyombuka ibiri sy’ehoro n’eribohera esyombuka ibiri esyo oko syongonde* ibiri sy’ekindu ky’eryambala oko kikuba ekyo. ¹⁷ Enyuma sy’aho mubalabya esyokamba ibiri sy’ehoro esyo omo syombuka ibiri esyabya oko syongonde* sy’ekindu ky’eryambala oko kikuba. ¹⁸ Neryo mubaghobya emitwe-mitwe ibiri y’esyokamba ibiri esyo omo hindu hibiri hy’erihiramo amabwe n’eriboherasyo oko bihande bibiri by’olukimba lw’oko bitigho, oko luhande lw’embere lwe efodi. ¹⁹ Enyuma sy’aho mubakokotya esyombuka ibiri sy’ehoro, bamahirasyo oko misike ibiri y’emwisi y’ekindu ky’eryambala oko kikuba, oko musike wakyo kw’emwisi oko efodi. ²⁰ Mubatasyakokotya n’esindi mbuka ibiri sy’ehoro, bamahirasyo oko luhande lw’embere lwe efodi ahikwa oko bihande by’olukimba l’oko bitigho hakuhi n’aho bimatanibwe haghuma, endata oko aho omukaba* owalukire amatanibwe ne efodi. ²¹ Okw’ibughirira, mubaboha ekindu ky’eryambala oko kikuba omo kamba ye ble.* Mubabohakyo erilua oko syombuka syakyo erihika oko syombuka sye efodi, ekindu ky’eryambala oko kikuba kitoke erisighala omo mwanya wakyo oko efodi endata oko mukaba* owalukire, ngoko Yehova anabya iniabirilayira Musa. ²² Neryo mwakokotya erikoti eriteko amaboko erye efodi. Muryalukwa n’omuluki w’esyongyimba. Eryosi muryalukwa omo uzi ye ble.* ²³ Ekyuna ky’erilabyamo omutwe eky’oko rikoti eriteko amaboko, kyabya omo kati-kati walyo, kyabya ng’ekyuna ky’oko rikoti ry’ekyuma. Ekyuna ekyo kyabya kitimbireko omutsotso* kikasyalandukala. ²⁴ Neryo mubakokoterya oko musike w’eyikwa w’erikoti eriteko amaboko eryo, kw’amakomamanga we uzi y’erangyi ye ble,* obweya bw’embuli bw’erangyi y’olubono-bono,* ne uzi y’erangyi y’omusasi eyihena-henirye. Ebyosi mubyalukirwa haghuma. ²⁵ Neryo mubakokotya esyonzogha omo horo eyerire, bamahirasyo omo kati-kati k’amakoma-manga eritimba oko musike w’erikoti eriteko amaboko eryo. Omo kati-kati k’amakomamanga ²⁶ mubakwama-kwamania enzogha n’ekomamanga, enzogha n’ekomamanga, eritimba oko musike w’eyikwa w’erikoti eriteko amaboko eryabya rikakolesibwa erikola omubiiri w’obuhereri, ngoko Yehova anabya iniabirilayira Musa. ²⁷ Mubakokotya n’esyokanzu omo kitani ekyuwene, ekyalukawa n’omuluki w’esyongyimba busana na Haruni n’abaghala biwe, ²⁸ n’esapu y’ekilemba omo kitani ekyuwene n’ekindu ky’eryambala oko mutwe ekipambire eky’ekitani ekyuwene, ehipitula* ehy’ekitani ekyuwene, ekilukire. ²⁹ N’omukaba w’omo kanzu ow’ekitani ekihungire ndeke, e uzi ye ble,* obweya bw’embuli bw’erangyi y’olubono-bono,* ne uzi ey’erangyi y’omusasi eyihena-henirye ebilukire haghuma; ngoko Yehova anabya iniabirilayira Musa. ³⁰ Oko nduli mubakokotya akuma akakamelemeta, akaminyikalo* k’erihighulwa. Mubakokotyako omo horo eyerire. Mubaghegha kuko kw’ebihandiko ngoko omundu anganaghegha oko kashe, bati: “Obubuyirire ni bwa Yehova.” ³¹ Mubabohera kuko kw’ekamba ye uzi y’erangyi ye ble* batoke eriboherako oko sapu y’ekilemba; ngoko Yehova anabya iniabirilayira Musa. ³² Neryo omubiiri wosi w’etabernakulo, ni bugha ambu ehema y’erihindanamo, mwahwa. N’Abaisraeli mubakola ebyosi ebyo Yehova alayira Musa. Ko banabya bakolire batya. ³³ Neryo mubaletera Musa y’etabernakulo, ehema n’ebindu byayo byosi: ebibohi byayo, ehikadre hyayo, emighamba* yayo, n’esyonduyi syayo, n’ehindu hyayo hy’erikalirako ehirimo ebyuna; ³⁴ eky’eriswika kuyo eky’esyongobi sy’esyombangale esinire omo rangyi y’omusasi, eky’eriswika kuyo ky’esyongobi sy’esyopombolo, n’erido ry’erighabula; ³⁵ erisanduku ry’Endaghane, n’emighamba* yalyo, n’omufuniko walyo; ³⁶ emesa n’ebindu byayo byosi, emikati y’erikangania; ³⁷ ekindu ky’erihirako esyotala ky’ehoro eyerire n’esyotala syakyo, esyotala esitondekene n’ebindu byakyo byosi, n’amaghuta busana n’erikolerya; ³⁸ ekiherero ky’ehoro, amaghuta awabuyirire,* obukwa bw’amanukato, erido ry’oko lukyo lw’ehema; ³⁹ ekiherero ky’ekwivre,* n’akaingilo kakyo k’ekwivre, emighamba* yakyo, n’ebindu byakyo byosi, ekibeseni n’ekindu kyakyo ky’erikalirako; ⁴⁰ esyorido sy’erilelembya oko butala, n’ehindu ehirimo ebyuna hy’erikaliryako esyonduyi sy’obutala, akarido k’oko lukyo lw’obutala, esyokamba n’esyongondo* sy’ehema, n’ebindu byosi busana n’omubiiri w’omo tabernakulo, ni bugha ambu ehema y’erihindanamo; ⁴¹ esyongyimba esilukire ndeke busana n’omubiiri w’ahabuyirire, esyongyimba esibuyirire busana na Haruni omuhereri, n’esyongyimba sy’abaghala biwe busana n’erikola omubiiri w’obuhereri. ⁴² Erikwamana n’ebyosi ebyo Yehova alayira Musa, Abaisraeli ko bakola omubiiri wosi wo batya. ⁴³ Musa abere abiyiteghererya omubiiri wabo wosi, mwalangira ngoko mubakakolagho ngoko Yehova analayira. Neryo Musa mwatsumulabo.