Eryibuka Ebihano 10:1-22
10 “Oko mughulu oyo, Yehova mwanibwira ati, ‘Uyikokoteraye ebibambali bibiri by’amabwe ebisosire by’erimbere, neryo uhetukire eyo niri oko kitwa, kandi ukokotaye erisanduku ry’omuti.
2 Ngendihandika oko bibambali by’amabwe ebyo kw’ebinywa ebyabya oko bibambali by’erimbere by’amabwe ebyo watsutsanga. Ukendihirabyo omo risanduku.’
3 Neryo munakokotya erisanduku omo muti w’olughando.* Munakokotya ebibambali bibiri by’amabwe, ebyabya bisosire eby’erimbere. Neryo munahetukira oko kitwa inine n’ebibambali bibiri by’amabwe omo byala byaghe.
4 Neryo Yehova mwahandika oko bibambali bibiri by’amabwe ebyo kw’ebinywa ebyo ahandika oho embere, ni bugha ambu Emighambo Ikumi,* ebyo Yehova ababwira oko kitwa omulenge wiwe inianemwasira omo muliro. Ekiro ekyo mwabya muhindene. Enyuma sy’aho, mwamba ebibambali by’amabwe ebyo.
5 Neryo munalua oko kitwa n’eriyahira ebibambali by’amabwe ebyo omo risanduku eryo nakokotaya, ngoko Yehova anabugha. Ebibambali by’amabwe ebyo bikine omo risanduku.
6 “Enyuma sy’aho, Abaisraeli mubalua e Beeroti Bene-yakani, bamaya e Mosera, eyo yo Haruni aholera n’eritabwa. Mwabya abihola, mughala wiwe Eleazari mwabya muhereri omo mwanya wiwe.
7 Abaisraeli mubalua aho, bamaya e Gudgoda; kandi mubalua e Gudgoda, bamaya e Yotbata, ekiharo ekirimo esyongununuko sy’amaghetse.*
8 “Oko mughulu oyo, Yehova mwasombola ekihanda kya Lawi kitoke eribya kikaheka erisanduku ry’endaghane ya Yehova, erimana embere sya Yehova busana n’erimukolera, n’eritsumula abandu omo rina riwe, n’ebyo byo banemukola erihika na munabwire.
9 Ekyo kyo kyaleka Abalawi ibatahabwa ekiharo kutse omwandu haghuma n’abaghala babo. Yehova y’omwandu wabo, ngoko Yehova oMungu waghu anababwira.
10 Munabugha oko kitwa kw’ebiro 40 omw’itungyi n’omo kiro, ngoko nanakola engendo y’erimbere. Kandi oko mughulu oyo, Yehova mwanihulikirira. Yehova mwatanza eribabughaho.
11 Enyuma sy’aho, Yehova mwanibwira ati, ‘Ughende, usondole abandu batoke eriyimya ekihugho ekyo nalapira abotata-kulu wabo niti ngendibahakyo.’
12 “Israeli, ekyo Yehova oMungu waghu anzire iwakola niki? Kino kisa kyo anzire iwakola: Anzire iwasagha Yehova oMungu waghu, iwakwama esyonzira siwe, iwamwanza, iwakolera Yehova oMungu waghu n’omutima waghu wosi n’enafsi* yaghu yosi,
13 n’erikwama emighambo, n’ebyalayiro bya Yehova ebyo ngakubwira munabwire, emyatsi yitoke erikughendera ndeke.
14 Hulikirira: Olubula, ni bugha ambu olubula oluli endata kutsibu, ekihugho n’ebyosi ebirimo ni bya Yehova oMungu waghu.
15 Aliwe abotata-kulu waghu, abo basa bo Yehova akola nabo obwira n’eribanza, kandi mwakusombola iwe lubuto lwabo, omo bihanda byosi, ngoko muli munabwire.
16 Litolere iwerya* omutima waghu n’erileka erighundu.*
17 Kundi Yehova oMungu waghu ni Mungu w’emiungu kandi ni Mukama w’abakama, ni Mungu mukulu ow’akaghala, kandi oyukasaghisaya, oyutesolola omundu wosi-wosi, kandi oyuteligha ekyutuliro.
18 Akakolera engubi n’omukwa-kali omo ritunganene, anzire n’abate Baisareli, kandi akabaha akalyo n’esyongyimba.
19 Neryo naghu, litolere iwanza oyute Mwisraeli, kundi naghu wabya mugheni omo kihugho kye Misri.
20 “Yehova oMungu waghu yo litolere iwasagha, iye yo ritolere iwakolera, iye yo ritolere iwamakirira, kandi omo rina riwe mo ritolere iwabya ukalapa.
21 Iye yo litolere iwapipa, iye y’oMungu waghu oyo wakukolera emyatsi minene eyi kandi eyikasaghisaya eyo ameso waghu alangira.
22 Omughulu abotata-kulu waghu bandaghalira e Misri, babya 70.* Aliwe Yehova oMungu waghu abirikuyira mo banene ng’esyongununu sy’elubula.
Amaelezo awehikwa
^ Kutse “w’omughandwe.”
^ Kinywa kwa kinywa, “Ebinywa Ikumi.”
^ Kutse “emisya eyikumamo amaghetse.”
^ Ulebaye Amaana w’ebinywa.
^ Kinywa kwa kinywa, “iwabania.”
^ Kinywa kwa kinywa, “erikalya-kalya ebikya.”
^ Kutse “esyonafsi 70.”
