Eryibuka Ebihano 11:1-32
11 “Litolere imwanza Yehova oMungu wenyu n’eribya mukakwama ebyosi ebyo akabasaba erikwama n’erisikya ebihano biwe, ebyalayiro biwe, n’emighambo yiwe.
2 Munasi ngoko munabwire ngakanaya nenyu, sindikanaya n’abana benyu abataminya kutse erilangira amahano wa Yehova oMungu wenyu, obukulu bwiwe, ebyala biwe by’amaka, n’okuboko kwiwe kw’amaka.
3 Mubatalangira emyatsi y’obutoki eyo akolera Farao, omwami we Misri, n’ekihugho kiwe kyosi, e Misri,
4 n’ebyo akolera abasuda be Misri, esyosabayiri* sya Farao n’emitoka yiwe y’amalwa, eyasenda omo maghetse w’Engetse y’Engula omughulu Abamisri babya bakabakwamirira inywe. Yehova mwalw’initabo olosi.*
5 Mubatalangira ebyo abakolera omo mbwarara erihika omughulu mwahika hano.
6 Mubatalangira n’ebyo akolera Datani, na Abiramu, abaghala ba Eliabu, mughala wa Rubeni, omughulu ekihugho kyatulika, neryo kyamabamera ibo n’ebihanda byabo, amahema wabo wosi, n’obuli kihangyikwa ekiriho ekyabya kikabakwama, Abaisraeli bosi ibanalangire.
7 Mumwayilangirira omo meso wenyu emyatsi mikulu-mikulu yosi eyo Yehova akola.
8 “Mutolere imwasikya emighambo yosi eyo ngabaha munabwire, mutoke erikanyirira n’erisokera omo kihugho ekyo mukayimaya,
9 kandi mutoke eribugha biro binene omo kihugho ekyo Yehova alapa eriha abotata-kulu wenyu n’abana babo, ekihugho ekikasendamo amasabu n’obuki.
10 “Ekihugho ekyo mukayimaya sikiri ng’ekihugho kye Misri, ekyo mwaluamo. Omo kihugho ekyo, imukahera esyombuto n’eryuta kusyo kw’amaghetse omo kisando,* ngoko omundu akuta amaghetse omo ririma eririmo emboka y’ebiti.
11 Aliwe ekihugho ekyo mukasonda erisokeramo n’erimyakyo ni kihugho ky’ebitwa n’eribanda. Kikamera amaghetse w’embula y’elubula.
12 Ni kihugho ekyo Yehova oMungu wenyu akasugha. Ameso wa Yehova oMungu wenyu akabya inianemusamalirakyo, omwaka akatsuka n’erihika omughulu akendisyahwa.
13 “Kandi mwamabikwama ndeke-ndeke emighambo yaghe eyo ngabaha munabwire, mwamanza Yehova oMungu wenyu, n’erimukolera n’omutima wenyu wosi n’enafsi* yenyu yosi,
14 ingendisyabya ngaleta embula omo kihugho kyenyu oko mughulu owatolere, embula y’erimbere n’embula y’omwiso. Mukendisyabya mukaghesa engano yenyu, eribana edivai nyihya-nyihya, n’amaghuta.
15 Ngendisyabya ngalasya ebiti omo malima wenyu, esyonyama syenyu sitoke eribana akalyo. Nenyu mukendisyabya mukalya n’eryughuta.
16 Muyiteghaye emitima yenyu yikasyatebibwa, neryo imwaramya eyindi miungu n’erikukamirayo.
17 Mwamabikola mutya, Yehova iniakendibahitanako kutsibu n’erikinga olubula embula yikasyawa, neryo ekitaka isikyendisyabya kikerako akalyo, nenyu imukendilw’imwahwaho omo kihugho ekyuwene ekyo Yehova akabaha.
18 “Litolere imwingirya ebinywa byaghe bino omo mutima wenyu n’omo nafsi* yenyu. Litolere ibyabya ng’ekibukyo ekibohere oko byala byaghu, kandi ng’akaliki ako ukambala oko mbumo.*
19 Mukangirirayebyo abana benyu. Mubye mukababwirabyo omughulu mwikere omo manyumba wenyu, omughulu mukalendera omo nzira, omughulu mukaghotsera, n’omughulu mukabuka.
20 Muhandikebyo oko hidrema hy’emilango y’amanyumba wenyu, n’oko milango y’emiyi yenyu,
21 kusudi inywe n’abana benu mutoke eribugha biro binene omo kihugho ekyo Yehova alapa eriha abotata-kulu wenyu, omo biro byosi ebyo olubula lukendisyabya ilune endata oko kihugho.
22 “Mwamabisikya ndeke-ndeke emighambo eyi eyo ngabaha n’erikwamayo, ni bugha ambu, mwamabyanza Yehova oMungu wenyu, mwamabikwama esyonzira siwe syosi, n’erimumakirira,
23 Yehova iniakendilusya ebihanda byosi ebi by’embere syenyu, kandi imukendimya ebiharo by’ebihanda binene-binene kandi ebirimo abandu banene kubalenga.
24 Obuli kiharo ekyo mukendisyabya mukahikamo kikendisyabya kikabya kyenyu. Eritsuka omo mbwarara eriyahika e Lebanoni, eritsuka oko Lusi, ni bugha ambu Olusi lwe Efrati, eriyahika oko ngetse* y’oko luhande lw’eyo ryuba rikalengera, ekyosi ekyo kikendisyabya kitaka kyenyu.
25 Sihendisyabya oyukayihanda okw’inywe. Yehova oMungu wenyu akendisyaleka abandu b’omo kihugho ekyo mukalabamo ibatitimana n’eribasagha, ngoko abiribalagha.
26 “Mulangire, munabwire ngahira embere syenyu emiyisa n’eritakirwa.
27 Mukendisyabana emiyisa mwamabikwama emighambo ya Yehova oMungu wenyu, eyo ngababwira munabwire.
28 Kandi mukendisyatakirwa mwamatendikwama emighambo ya Yehova oMungu wenyu, mwamalua omo nzira eyo ngababwira munabwire niti mukwame, kandi mwamakwama emiungu eyo mwabya isimwasi.
29 “Omughulu Yehova oMungu wenyu akendisyabingirya omo kihugho ekyo mukayimaya, mukendisyabugha ebinywa by’eritsumula oko Kitwa kye Gerizimu, n’ebinywa by’eritakira oko Kitwa kye Ebali.
30 Ebitwa ebyo biri oko lundi luhande lwe Yordani, eyo ryuba rikalengera, omo kihugho ky’Abakanana abikere e Araba, ekihugho ekiri oko lundi luhande lwe Gilgali, hakuhi n’emiti minene-minene ye More.
31 Mukasoka e Yordani n’erimya ekihugho ekyo Yehova oMungu wenyu akabaha. Mukendibya mwabihambakyo n’eriikala mukyo,
32 litolere imwayikasa erisikya ebihano n’ebyalayiro byosi ebyo ngabaha munabwire.
Amaelezo awehikwa
^ Kutse “esyofarasi; esyoshevale.”
^ Kutse “erihika na munabwire.”
^ Ni bugha ambu, erikolesya ekisando erilyata oko kiringo ekikalusaya amaghetse, eritakula kutse erikingula omughende.
^ Ulebaye Amaana w’ebinywa.
^ Ulebaye Amaana w’ebinywa.
^ Kinywa kwa kinywa, “omo kati-kati k’ameso waghu.”
^ Ni bugha ambu, Engetse Nene, Engetse ye Mediterania.
