Eryibuka Ebihano 12:1-32
12 “Bino by’ebihano n’ebyalayiro ebyo litolere imwayikasa erikwama biro byosi omo kihugho ekyo Yehova oMungu w’abotata-kulu wenyu akendibaha mo kyenyu.
2 Mukendibya mwabitibita oko bihanda n’erimya ekihugho kyabo, litolere imwatsandya emyanya yosi eyo bandu b’ebihanda ebyo babya bikaramiryamo emiungu yabyo, yangabya oko singyi y’ebitwa kutse oko hitwa hike-hike, kutse omo ndina y’omuti owaboghire.
3 Ukendisyahimbula ebiherero byabo, ukendisyabomola esyonduyi syabo nyibuyirire, ukendisyaterya emiti yabo mibuyirire n’eritimyayo omo muliro, ukendisyabomola esyosanamu sy’emiungu yabo esibatsire, ukendisyalusyaho amena w’emiungu yabo.
4 “Isimwaramaya Yehova oMungu wenyu ngoko abandu b’ebihanda bakaramaya emiungu yabo.
5 Aliwe mukendisyabya mukaramirya Yehova oMungu wenyu omo mwanya ogho akendisyasombola omo biharo by’ebihanda byenyu byosi atoke erihiraho erina riwe n’obwikalo bwiwe.
6 Eyo yo mukendisyabya mukatwala amahere wenyu w’eryokererya, amahere wenyu, ebighuma byenyu by’omw’ikumi, ebihembo byenyu, ebihembo ebyo mukaherera busana n’eriyilagha erikola omwatsi mulebe, ebihembo ebyo mukateka omw’anza, ehimbere hy’esyonde, esyombuli, n’esyombene syenyu.
7 Inywe n’ebihanda byenyu mukendisyabya mukalira eyo, embere sya Yehova oMungu wenyu n’eritsemera ebyosi ebyo mukakola, kundi Yehova oMungu wenyu abiribatsumula.
8 “Isimwabya mukakola ngoko tunemukola hano munabwire, obuli mundu akakola ekyo akalangira mo kyuwene,
9 kundi simulimwingira oho mukendisyaluhukira, kandi simwemwabana omwandu ogho Yehova oMungu wenyu akabaha.
10 Mukendisyabya mwabisoka e Yordani n’eriikala omo kihugho ekyo Yehova oMungu wenyu akabaha mo kyenyu, oko kwenene akendisyabaluhukya. Esyonzighu esibatimbireko sisyendisyasyabakenderya. Mukendisyikala buholo.
11 Ebyosi ebyo namabasaba, mukendisyabya mukatwalabyo omo mwanya ogho Yehova oMungu wenyu akendisyasombola erihiraho erina riwe. Mukendisyabya mukatwalayo amahere wenyu w’eryokererya, amahere wenyu, ebighuma byenyu by’omw’ikumi, ekihembo kyenyu, n’ebihembo byosi ebyo mukateka omughulu mukayilagha erikolera Yehova y’omwatsi mulebe.
12 Mukendisyatsema embere sya Yehova oMungu wenyu, inywe, abana benyu b’obulume, abana benyu b’obukali, abakobe benyu b’obulume n’abobukali, n’Abalawi abali omo miyi* yenyu, kundi ibo mubatahabwa ekiharo kutse omwandu haghuma nenyu.
13 Muyiteghaye, isimwaherera obuhere bwenyu bw’eryokererya omo ghundi mwanya ogho mwanzire.
14 Litolere imwabya mukaherera amahere wenyu w’eryokererya omo mwanya ogho Yehova akendisyasombola omo kighuma ky’oko biharo by’ebihanda byenyu kisa. Eyo yo mukendisyabya mukakolera ebyosi ebyo ngababwira.
15 “Mughulu wosi ogho ukendisyabya ukakwa ameru, ukendisyabya ukakera enyama n’erilirayo omo miyi yenyu yosi erikwamana n’emiyisa eyo Yehova oMungu wenyu akendisyabaha. Omundu oyuterire n’omundu oyo werire abosi banganalyayo, ngoko omundu akalya eswala kutse engabi.
16 Aliwe isimwalya omusasi. Mubye mukutagho oko kitaka ng’amaghetse.
17 Simwendisyahamulirwa erilira omo miyi yenyu mw’ekighuma ky’omw’ikumi ky’akalyo kenyu, edivai yenyu nyihya-nyihya, amaghuta wenyu, kutse ehimbere hy’esyonde, ehy’esyombuli n’ehy’esyombene syenyu, kutse ekihembo kyosi-kyosi ky’oko bihembo ebyo mukateka busana n’eriyilagha erikola omwatsi mulebe kutse ebihembo ebyo mukateka omw’anza kutse ebindi bihembo.
18 Mukendisyabya mukalira ebyosi ebi by’embere sya Yehova oMungu wenyu omo mwanya ogho Yehova oMungu wenyu akendisyabya akasombola. Mukendisyabya mukalyabyo inywe, abana benyu b’obulume, abana benyu b’obukali, abakobe benyu b’obulume n’ab’obukali, n’Abalawi abali omo miyi yenyu. Mukendisyabya mukayisyandira embere sya Yehova oMungu wenyu busana n’ebyosi ebyo mukakola.
19 Omughulu wosi ogho mukendisyabya omo kihugho kyenyu, muyikase isimwasyapokaya Abalawi.
20 “Omughulu Yehova oMungu waghu akendisyayira ekiharo kyaghu mo kinene, ngoko abirikulagha neryo iwabugha uti, ‘Ameru basi,’ kundi iwanzire erirya enyama, wanganalyayo omughulu wosi-wosi ogho wamanza eriryayo.
21 Omwanya ogho Yehova oMungu waghu akendisyasombola erihiraho erina riwe amabya iniali hali okw’iwe, ukendisyabya ukakera oko syonde syaghu, esyombuli syaghu, n’esyombene syaghu esyo Yehova abirikuha, ngoko nabirikubwira. Ukendisyabya ukalirasyo omo miyi yaghu omughulu wosi-wosi ogho wamakwa ameru.
22 Wanganalyasyo ngoko omundu akalya engabi n’eswala. Omundu oyuterire n’omundu oyo werire banganalyasyo.
23 Aliwe uyisoghe kundu eritendirya omusasi, kundi omusasi wo ngebe. Isiwalya engebe n’enyama.
24 Isiwalya omusasi. Ukendisyabya ukutagho oko kitaka ng’amaghetse.
25 Isiwalyagho kusudi emyatsi yikughendere ndeke iwe n’abana baghu, kundi ukakola ebyuwene omo meso wa Yehova.
26 Omughulu ukendisyabya ukasa omo mwanya ogho Yehova alyasombola, bino bisa byo ukendisyabya ukaheka: Ebindu byaghu bibuyirire n’ebihembo ebyo ukendisyabya ukateka busana n’eriyilagha erikola omwatsi mulebe.
27 Ukendisyabya ukahererayo amahere waghu w’eryokererya, kandi ukendisyabya ukahererayo enyama n’omusasi oko kiherero kya Yehova oMungu waghu. Omusasi w’awandi mahere, akendisyabya akutwa oko kiherero kya Yehova oMungu waghu. Aliwe ukendisyabya ukalya enyama.
28 “Uyikase erikwama ebinywa byosi bino ebyo ngakubwira emyatsi yitoke erikughendera ndeke mughulu wosi iwe n’abana baghu, kundi ukakola ebyuwene n’ebitunganene omo meso wa Yehova oMungu waghu.
29 “Omughulu Yehova akendisyabughaho ebihanda ebyo ukendisyimya ebiharo byabyo, neryo iwikala omo kihugho ky’ebihanda ebyo,
30 uyiteghaye ukasyingira omo kitegho ebihanda ebyo byabilusibwa embere syaghu. Isiwayibulaya oko miungu y’ebihanda ebyo uti, ‘Ebihanda ebi byabya bikaramya biti emiungu yabyo? Naghe ngendikola nga byo.’
31 Isiwaramaya Yehova oMungu waghu omo nzira eyo, kundi ebihanda ebyo bikakolera emiungu yabyo emyatsi eyikita esyonye eyo Yehova aponire. Nibya bakahisaya abana babo b’obulume n’abobukali omo muliro busana n’emiungu yabo.
32 Uyikase erikola ebyosi ebyo namakubwira. Isiwatomeka kubyo kutse erilusya kubyo.
Amaelezo awehikwa
^ Kinywa kwa kinywa, “milango y’emiyi.”
