Eryibuka Ebihano 13:1-18
-
Eky’erikolera abakayilusaya oko Yehova (1-18)
13 “Omo kati-kati kenyu mwamabibya omuminyereri kutse omundu oyukabugha emyatsi eyikendisyabya erilabira esyonzoli, neryo iniakuha ekiminyikalo kutse omwatsi owakakanganaya ebikendisyabya,
2 neryo ekiminyikalo kutse omwatsi oyo owakakanganaya ebikendisyabya owalyababwira iniabya w’ekwenene omughulu akabugha ati, ‘Tukwame eyindi miungu, emiungu eyo mutaminya, kandi tukolereyo,’
3 isiwahulikirira ebinywa by’omuminyereri oyo kutse omundu oyukalota oyo, kundi Yehova oMungu wenyu yukakulengako atoke eriminya nga munanzire Yehova oMungu wenyu n’omutima wenyu wosi n’enafsi* yenyu yosi.
4 Yehova oMungu wenyu yo litolere imwakwama, iye yo litolere imwasagha, emighambo yiwe yo litolere imwasikya, omulenge wiwe wo litolere imwahulikirira, iye yo litolere imwakolera, kandi iye yo litolere imwamakirira.
5 Aliwe litolere omuminyereri oyo kutse omundu oyukalota oyo initibwa, kundi mwakakuna abandu eritendisikya emighambo ya Yehova oMungu wenyu, oyo wabalusaya omo kihugho kye Misri n’eribakombola omo nyumba y’obukobe. Omundu oyo abya anzire imwaleka erikwama enzira eyo Yehova oMungu wenyu ababwira ati mukwame. Mulusaye ekindu kibi omo kati-kati kenyu.
6 “Omughala wenyu, omughala wa mama waghu, kutse omughala waghu, kutse omwali waghu, kutse omukali waghu oyo wanzire, kutse omwira waghu w’oko mutima* amabisonda erikutebya omo bubiso-biso omw’ibugha ati, ‘Tuyakolere eyindi miungu,’ emiungu eyo utasi kutse eyo abotata-kulu waghu bataminya,
7 emiungu y’abandu abakutimbireko, bangabya hakuhi naghu kutse hali okw’iwe, erilua oko mupaka ono w’ekihugho erihika oko ghundi mupaka w’ekihugho,
8 isiwaligha ebyo akabugha kutse erimuhulikirira, isiwamukwira obulighe kutse erimughanyira kutse erimuteya.
9 Aliwe litolere iwamwita. Ebyala byaghu byo bitolere ibyabya by’erimbere erimutulako mukamwita. Neryo ebyala by’abandi ibyakwama.
10 Litolere iwamughusako amabwe erihika omughulu akendihola, kundi mwakasonda eribalusya oko Yehova oMungu wenyu, oyo wabalusaya omo kihugho kye Misri, omo nyumba y’obukobe.
11 Neryo Abaisraeli bosi bakendisyowa, neryo ibasagha. Sibendisyasyakola omwatsi owatuwene ng’oyu omo kati-kati kenyu.
12 “Mwamabisyowa omo miyi yenyu eyo Yehova oMungu wenyu akabaha mutoke erikalamo abandu bakabugha bati,
13 ‘Abandu batya-batya babiribya omo kati-kati kenyu, kandi banemuteba abakalani b’omo muyi wabo omw’ibabwira bati: “Tuyakolere eyindi miungu,” emiungu eyo mutabya mwasi,’
14 litolere imwalebya omwatsi oyo wo ndeke-ndeke, imwakola omurorotsyo n’eribulirirya ndeke. Kyamalangirika ini kwenene omwatsi oyo owakita esyonye imwakakoleka omo kati-kati kenyu,
15 litolere imwita abandu b’omo muyi oyo omo muyali. Mutoghotaye abandu b’omo muyi oyo omo muyali n’obuli kindu ekiri mugho erihirako n’esyonyama esiri mugho.
16 Mukendisyakuma-kuma ebindu byosi ebyo mulyanyegha omo muyi oyo n’erihirabyo omo mwanya w’abandu bosi w’omo muyi oyo, n’eritimya omuyi oyo. Ebindu byosi ebiryanyeghawa omo muyi oyo bikendisyabya ng’obuhere bw’eryokererya obughonere obo mukaherera Yehova oMungu wenyu. Omuyi oyo akendisyabya bisambukalirya kera na kera. Syendisyasyahimbwa.
17 Isimwimaya ekindu kyosi-kyosi ekiryalusibawa omo bindi bindu busana n’eritsandibwa. Mwamatendimyakyo, Yehova isyendisyahitana, iniakendibaghanyira, n’eribakwira obulighe, n’eribayira mo banene, ngoko alapira abotata-kulu wenyu.
18 Kundi litolere imwahulikirira omulenge wa Yehova oMungu wenyu, omw’isikya emighambo byosi ebyo ngababwira munabwire. Mwamakola mutya, imukendibya imwamakola ekyuwene omo meso wa Yehova oMungu wenyu.
