Eryibuka Ebihano 14:1-29
14 “Muli bana ba Yehova oMungu wenyu. Isimwayisaka kutse eritwa ebikoheryo* byenyu busana n’omundu oyulyahola.
2 Kundi muli bandu babuyirire ba Yehova oMungu wenyu, kandi Yehova abiribasombola mo bandu biwe, ekindu kiwe-kiwe,* omo kati-kati k’abandu bosi abali oko kihugho.
3 “Isimwalya ekindu kyosi-kyosi ekikita esyonye.
4 Esyonyama esyo mwangalya sya hino: Enume y’ende, embuli, embene,
5 engabi, eswala, ekongoni, embene y’omoli, esaswi, embuli y’omoli, n’embuli y’omo bitwa.
6 Mwanganalya enyama yosi-yosi eyiriko ekighera ekighabire kabiri, kandi eyikaghumula.*
7 Aliwe isimwalya esyonyama hino esikaghumula* kutse esiwite ekighera ekighabire kabiri: Engamia, esungura, n’ewibari. Kundi sikaghumula aliwe sisiwite ebighera ebighabire kabiri. Esyonyama esyo si sy’erire okw’inywe.
8 Isimwabya mukalya n’engulube, kundi yiwite ekighera ekighabire kabiri aliwe siyirighumula.* Engulube si y’erire okw’inywe. Isimwabya mukalya enyama y’engulube, kutse eritula oko kinda kyayo.
9 “Oko bihangyikwa byosi ebiri omo maghetse, bino byo mwangalya: Mwanganalya ekyosi-kyosi ekiwite ebikibi n’ebikora.
10 Aliwe isimwalya ekihangyikwa kyosi-kyosi ekiteko ebikibi, n’ebikora. Si ky’erire okw’inywe.
11 “Mwanganalya enyunyu yosi-yosi ey’erire.
12 Aliwe isimwalya esyonyunyu hino: Erisamba, enguranga, ekipungu ekikinire,
13 ekikoli ky’erangyi y’omusasi, ekikoli ky’ekirima, obuli muhanda w’ebihungu,
14 obuli muhanda w’ebikororo,
15 embuni, ekibukulu, obuli muhanda w’ehisara,
16 ekibukulu kike, ekibukulu ekiwite amatwi mali-mali, ekibata ky’omo maghetse,
17 eamwali, ekipungu, ekisohi,
18 ekirobi, obuli muhanda w’ebimongo, ehudi-hudi, n’ekilima-lima.
19 Ebihangyikwa byosi-byosi ebiriko ebipupa ebikaghenda mo bikuto-bikuto* nabyo si by’erire okw’inywe, isimwabya mukalyabyo.
20 Obuli kihangyikwa eky’erire ekikaghuluka mwanganalyakyo.
21 “Isimwalya enyama eyiryasungawa iyabirihola, mwanganahayo oyute Mwisraeli oyo wikere omo kati-kati kenyu. Iye anganalyayo, kutse mwanganaghulyayo omundu oyute Mwisraeli. Kundi muli bandu babuyirire ba Yehova oMungu wenyu.
“Isimwahuka ekyana ky’embene omo maziwa wa mama wakyo.
22 “Obuli mwaka, isiwasyabya ukabula eriteka ekighuma ky’omw’ikumi ky’ebyalya byosi ebiryera omo ririma ryaghu.
23 Ekighuma ky’omw’ikumi ky’akalyo kaghu, ky’edivai yaghu nyihya-nyihya, ky’amaghuta waghu, ehimbere hy’esyonde syaghu, esyombuli syaghu, n’esyombene syaghu, ukendisyabya ukalirabyo embere sya Yehova oMungu waghu omo mwanya ogho akendisyasombola erihiraho erina riwe, utoke erigha erisagha Yehova oMungu waghu mughulu wosi.
24 “Aliwe olughendo lwamabya luli kutsibu, neryo iwatatoka eritwala ekighuma ky’omw’ikumi omo mwanya ogho Yehova oMungu waghu akendisyasombola erihiraho erina riwe, kundi omwanya oyo ali hali (kusangwa Yehova oMungu waghu akendisyakutsumula),
25 wanganaghulyabyo, ibakuha kubyo kw’esyofranga. Wabibya nasyo, iwaghenda omo mwanya ogho Yehova oMungu waghu akendisyasombola.
26 Wanganaghula oko syofranga esyo kw’ekindu kyosi-kyosi ekyo wanzire. Wanganaghula kusyo kw’esyonde, esyombuli, esyombene, edivai, n’obundi bwabu obukatamiraya, n’ekindi kindu kyosi-kyosi ekyo wanzire, neryo ukendisyalira ebindu ebyo by’aho embere sya Yehova oMungu waghu, n’eriyisyandira, iwe n’ab’omo nyumba yaghu.
27 Kandi isiwapokaya Abalawi abali omo miyi yenyu, kundi ibo mubatetahabwa ekiharo kutse omwandu haghuma naghu.
28 “Oko mwiso w’obuli mwaka w’akasatu, ukendisyabya ukalusya ekighuma kyosi ky’omw’ikumi ky’ebyalya ebyo ulyeraya oko mwaka oyo n’erihirakyo omo miyi yenyu.
29 Neryo Omulawi, oyo watahabawa ekiharo kutse omwandu haghuma naghu, omundu oyute Mwisraeli, engubi, n’abakwa-kali, abali omo miyi yenyu, bakendisyasa, ibalya, n’eryughuta. Ubye ukakola utya, Yehova atoke erikutsumula omo byosi ebyo ukakola.
Amaelezo awehikwa
^ Kutse “eritwa obweya b’oko mbumo.” Kinywa kwa kinywa, “Isimwahira oluhala omo kati-kati k’ameso wenyu.”
^ Kutse “ky’obughuli.”
^ Kutse “eyikalya n’erisubulya.”
^ Kutse “esikalya n’erisubulya.”
^ Kutse “siyirisubulaya yabirya.”
^ Kutse “Ehihuka.”
