Eryibuka Ebihano 15:1-23
15 “Oko mwiso w’obuli myaka 7, ukendisyabya ukalekerania edeni yaghu eyo mulikyenyu alimo.
2 Omughulu mukendisyabya mukalekerania edeni y’omulikyenyu, mukendisyabya mukakola mutya: Obuli mundu oyulyabweka akendisyabya akalekerania edeni eyo mulikyabo alimo. Syatolere erituhya mulikyabo kutse mughala wabo, kundi omulaghe owakabugha ati abandu isibasyatuhaya amadeni busana n’eriha Yehova y’olukengerwa akendisyabya iniabirilaba.
3 Wanganatuhya omundu oyute Mwisraeli, aliwe isiwatuhaya mughala wenyu.
4 Nikwa omundu wosi-wosi omo kati-kati kenyu isyabya mwera, kundi Yehova syendisyabula erikutsumula omo kihugho ekyo Yehova oMungu waghu akakuha mo mwandu.
5 Aliwe bikendisyabya bitya wamabihulikirira ndeke-ndeke omulenge wa Yehova oMungu waghu, n’erisikya emighambo yosi eyi eyo ngakuha munabwire.
6 Kundi Yehova oMungu waghu akendisyakutsumula ngoko abirikulagha. Ukendisyabweka ebihanda binene, aliwe iwe siwendisyabya ukayibweka. Kandi ukendisyatabala ebihanda binene, aliwe ibyo sibyendisyakutabala.
7 “Omughuma w’oko baghala benyu oyo wikere omo mughuma w’oko miyi y’omo kihugho ekyo Yehova oMungu waghu akakuha amabya mwera, isiwakala-kalaya omutima waghu, n’erikingira mughala wenyu omwera y’ebyala.
8 Litolere iwamukingulira ebyala byaghu byo ndeke n’erimubweka ekyosi-kyosi ekyo alaghireko kutse ekyo abulire.
9 Uyiteghaye, amalengekania mabi aya isyabya omo mutima waghu, ‘Omwaka we 7, omwaka w’erilekerania amadeni ali hakuhi.’ Amalengekania ayo iniakendileka ighutawatikya mughala wenyu omwera n’eritendimuha kindu. Amabilakira Yehova busana naghu, aho iwamabibyamo erilolo.
10 Litolere iwahitya n’omutima mughuma butsira erihitya ukayilungumula, kundi erihitya n’omutima mughuma kyo kikendileka Yehova oMungu waghu iniatsumula ebyosi ebyo ukakola, n’omubiiri waghu wosi.
11 Kundi abera bakendisyabya ibane omo kihugho, kyo kikaleka inakubwira niti, ‘Litolere iwakingulira ndeke ebyala byaghu omughala wenyu oyukaghalawa, n’omwera oyuli omo kihugho kyenyu.’
12 “Bamabikughulya omughuma w’oko baghala benyu, omulume kutse omukali Muebrania, neryo iniakukolera omo myaka 6, litolere iwamuleka aghende omo mwaka we 7.
13 Omughulu ukendisyamuleka aghende, isiwamusubulaya byala bisa.
14 Ukendisyamuha butsira buhemu oko syonyama syaghu, oko byalya ebikalua oko kihumbiro kyaghu, oko maghuta awakalua aho ukengera amaghuta, n’oko divai eyikalua omo kikamiro kyaghu. Litolere iwamuha erikwamana n’emiyisa eyo Yehova oMungu waghu abirikuha.
15 Wibuke ngoko wabya mukobe e Misri, kandi ngoko Yehova oMungu waghu akulusaya omo bukobe obo. Ekyo kyo kikaleka inakusaba erikola ekyo munabwire.
16 “Aliwe amabikubwira ati, ‘Sinendilua ewaghu!’ kundi akwanzire, iwe n’ab’omo kihanda kyaghu, kundi abya iniabiritsema erikala naghu,
17 litolere iwimya omughera, iwatobola okutu kwiwe inianimene ahali akadrema k’omulango, neryo aho iniakendibya mukobe waghu omo ngebe yiwe yosi. Ekyo kyo unemwendisyakolera n’omughombe waghu mukali.
18 Omughulu ukaleka omugombe waghu aghende, neryo iniaghenda, isiwalangira ekyo kyo muhanda, kundi omubiiri owalyakukolera omo myaka 6 ni mubiiri ogho omundu oyukalihawa angakukolere kabiri, na Yehova oMungu waghu abirikutsumula omo myatsi yosi.
19 “Obuli kambere k’obulume k’esyonde syaghu, esyombuli syaghu, n’esyombene syaghu, litolere iwayirako mo kabuyirire, kundi ni ka Yehova. Isiwakolesaya akambere k’ende* yaghu omo mubiiri wosi-wosi, kutse isiwatwa oko kambere k’esyombuli syaghu k’obweya.
20 Iwe n’ab’omo kihanda kyaghu mukendisyalyako embere sya Yehova oMungu wenyu obuli mwaka omo mwanya ogho Yehova akendisyasombola.
21 Aliwe akambere kamabibyako bulema, kamabya kakatsukuda, kutse isikalilangira, kutse ikaliko obundi bulema obukalire, siritolere ukahererako Yehova oMungu waghu.
22 Litolere iwalirako omo miyi* yenyu. Omundu oyo w’erire n’oyuterire banganalya kuko, ngoko omundu akalya engabi kutse eswala.
23 Aliwe isiwalya omusasi wako; litolere iwutagho oko kitaka ng’amaghetse.
