Eryibuka Ebihano 16:1-22
16 “Omwisi we Abibu* isyatsuka isiwasi. Ukolere Yehova oMungu waghu y’Epasaka,* kundi Yehova oMungu waghu mwakulusya e Misri oko mwisi we Abibu, omo kiro.
2 Litolere iwaherera Yehova oMungu waghu y’obuhere bw’Epasaka* omo mwanya ogho Yehova akendisyasombola erihiraho erina riwe. Ukendisyalusya obuhere obo omo syombuli syaghu, omo syombene syaghu, n’omo syonde syaghu.
3 Isiwalya obuhere obo n’ekindu kyosi-kyosi ekirimo levire.* Omo biro 7, ukendisyabya ukalya omukati owatemo levire, omukati w’eryaghalwa, kundi walua e Misri omo twanguhe. Omo biro byosi by’engebe yaghu, ubye ukakola ekyo eryibuka ekiro walua e Misri.
4 Omo biro 7, efarine eyo babiripondera-ponderamo elevire* isiyasungika omo kiharo kyaghu, n’enyama yosi-yosi eyo ukendisyaherera omo righolo-gholo ry’ekiro ky’erimbere, isiyahika omo tututu y’ekiro ekikwamire.
5 Siwendisyalighirwa erikola obuhere bw’Epasaka* omo muyi wosi-wosi ogho wanzire, ogho Yehova oMungu waghu akakuha.
6 Ukendisyakolera obuhere obo omo mwanya ogho Yehova oMungu waghu akendisyasombola erihiraho erina riwe. Ukendisyabya ukakola obuhere bw’Epasaka* omw’igholo, eryuba ryabinalenga, omo kiro ekyo waluiramo e Misri.
7 Ukendisyabya ukahuka enyama eyo n’erilirayo omo mwanya ogho Yehova oMungu waghu akendisyasombola. Omo tututu bwabikya, wanganasuba omo mahema waghu.
8 Omo biro 6, ukendisyabya ukalya omukati owatemo levire.* Omo kiro kye 7, hakendisyabya hakabya omuhindano munene busana n’eripipa Yehova oMungu waghu. Isiwakola omubiiri wosi-wosi.
9 “Ukendisyaghanza amayenga 7. Ukendisyatsuka erighanza amayenga 7 ayo eritsuka omughulu ukalabaya omughusu oko ngano yaghu.
10 Neryo ukendisyakolera Yehova oMungu waghu Ekiro Kikulu ky’Amayenga n’erimuherera obuhere obo ukateka omw’anza ryaghu. Ukendisyaleta obuhere erikwamana n’emiyisa eyo Yehova oMungu waghu alyakuha.
11 Ukendisyayisyandira embere sya Yehova oMungu waghu omo mwanya ogho Yehova oMungu waghu akendisyasombola erihiraho erina riwe. Ukendisyayisyandira, iwe, omughala waghu, omwali waghu, omughombe waghu w’obulume, omughombe waghu w’obukali, Omulawi oyuli omo miyi yenyu, omundu oyute Mwisraeli, engubi, n’omukwa-kali, abali eyo ghuli.
12 Isiwibirirawa ngoko wabya mukobe e Misri. Usikaye n’erikwama ebyalayiro bino.
13 “Ukendisyabya wabikuma-kuma ebyalya ebiryalua oko kihumbiro kyaghu, amaghuta awalyalua eyo ukengera, n’edivai eyiryalua omo kikamiro kyaghu, ukendisyakola Ekiro Kikulu ky’Ebibanda* omo biro 7.
14 Uyisyandire omo kiro kikulu kyaghu ekyo, iwe, omughala waghu, omwali waghu, omughombe waghu w’obulume, omughombe waghu w’obukali, Omulawi, omundu oyute Mwisraeli, engubi, n’omukwa-kali, abikere omo miyi yenyu.
15 Omo biro 7, ukendisyakolera Yehova oMungu waghu ekiro kikulu omo mwanya ogho Yehova akendisyasombola, kundi Yehova oMungu waghu akendisyatsumula ebyalya byaghu byosi, n’ebyosi ebyo ukakola, neryo ukendisyatsema kutsibu.
16 “Ngendo isatu oko mwaka, abalume bosi bakendisyabya bakahika embere sya Yehova oMungu waghu omo mwanya ogho akendisyasombola. Bakendisyabya bakahika oko Kiro Kikulu ky’Emikati Eyitemo Levire,* oko Kiro Kikulu ky’Amayenga, n’oko Kiro Kikulu ky’Ebibanda.* Isihabya oyukahika embere sya Yehova ebyala bisa.
17 Obuli mundu akendisyabya akaleta ekihembo erikwamana n’emiyisa eyo Yehova oMungu waghu akamuha.
18 “Ukendisyahira abatsweri n’abakulu omo buli kihanda omo miyi* yosi eyo Yehova oMungu waghu akakuha. Litolere ibabya bakatswera abandu omo ritunganene.
19 Isiwatswera emyatsi yo muhanda kutse eribya n’akasololo kutse eriligha ekyutuliro, kundi ekyutuliro kikaleka n’omundu w’amenge iniatalangira emyatsi yo ndeke, kandi kikaleka n’oyutunganene iniatsuka eribugha kitya-kitya.
20 Ebitunganene, ebitunganene bisa byo litolere iwakwamirira, utoke eribugha ebiro binene n’erimya ekihugho ekyo Yehova oMungu waghu akakuha.
21 “Isiwahera omuti wosi-wosi hakuhi n’ekiherero ekyo ukendisyakokoterya Yehova oMungu waghu busana n’eriramyagho.*
22 “Isiwayimaniraya enduyi nyibuyirire. Ni kindu ekyo Yehova oMungu waghu aponire.
Amaelezo awehikwa
^ Ulebaye Endomeko B15.
^ Kutse “y’Erikiruka.”
^ Kutse “bw’Erikiruka.”
^ Kutse “kihamya.”
^ Kutse “ekihamya.”
^ Kutse “bw’Erikiruka.”
^ Kutse “bw’Erikiruka.”
^ Kutse “kihamya.”
^ Kutse “ky’Ehibalalayi.”
^ Kutse “Kihamya.”
^ Kutse “ky’Ehibalalayi.”
^ Kinywa kwa kinywa, “milango.”
^ Kutse “kusudi abye muti mubuyirire.” Ulebaye Amaana w’ebinywa, Omuti mubuyirire.