Eryibuka Ebihano 17:1-20
17 “Isiwaherera Yehova oMungu waghu enume y’ende kutse embuli eyiriko obulema kutse eyiriko akandi kahinira, kundi Yehova oMungu waghu isyenditsemera ekyo.
2 “Tubughe tuti omw’inywe, omo mughuma w’oko miyi eyo Yehova oMungu waghu akakuha imwasungika omulume kutse omukali oyukakola emyatsi eyituwene omo meso wa Yehova oMungu waghu, n’eritendisikya endaghane yiwe,
3 kandi omundu oyo iniahera oko nzira n’eriramya eyindi miungu n’erikukamirayo, kutse iniakukamira eryuba, omughenda, kutse ekindi kindu kyosi-kyosi ekiri elubula, omwatsi ogho nitenatabugha niti imwakola.
4 Bamabikubwira oko mwatsi oyo kutse iwowa kugho, litolere iwakola omurorotsyo wo ndeke-ndeke utoke eriminya omwatsi oyo nga nina w’ekwenene. Kwenene-kwenene omwatsi owakita esyonye oyo amabya imwakanakoleka omo Israeli,
5 litolere iwaleta omulume kutse omukali oyulyakola omwatsi mubi oyo ahali emilango y’omuyi. Omulume kutse omukali oyo atolere initibwa omo mabwe.
6 Oyutolere eritibwa akenditibwa hamabibya abimiri* babiri kutse abasatu abakakanganaya ngoko omwatsi oyo ni w’ekwenene. Syangitibwa hamabibya omwimiri mughuma musa.
7 Abimiri* abo bo bakendibya b’erimbere erimughusako amabwe akitibwa. Enyuma sy’aho, abandu bosi nabo ibamughusako amabwe. Litolere imwalusya omwatsi owatuwene omo kati-kati kenyu.
8 “Omo mughuma w’oko miyi yenyu mwamabibya olubanza olukalire kutsibu erisoha, lwangabya lubanza lw’oyulyuta omusasi, kutse omundu iniabugha ati sibetamukolera ngoko litolere, kutse omundu oyulyakola obutsururu, kutse oghundi mwatsi w’eritendihulikirirana, litolere iwaya omo mwanya ogho Yehova oMungu waghu akandisyasombola.
9 Uyasungane n’abahereri Abalawi n’omutsweri oyukendisyabya akasoha emyatsi oko biro ebyo. Ubabwire olubanza lwaghu, neryo bakendikubwira olubanza lwaghu nga lwamasohwa luti.
10 Litolere iwaligha ebyo balyasoha omo mwanya ogho Yehova akendisyasombola. Uyikase erikwama ebyosi ebyo bakendisyakubwira.
11 Litolere iwakwama emighambo eyo bakendikubwira n’eriligha ebyo balyasoha. Isiwaghana erikwama ebyo balyasoha kutse erikitira oko mali kutse oko malembe.
12 Omundu oyukayilabiriraya omw’itendihulikirira omuhereri oyukakolera Yehova oMungu waghu, kutse omw’itendihulikirira omutsweri, litolere iniahola. Litolere iwalusya omwatsi mubi omo Israeli.
13 Neryo abandu bosi ibakendyowa oko mwatsi oyo, neryo ibasagha. Neryo isibendisyasyayilabirirya n’ahake.
14 “Omughulu ukendingira omo kihugho ekyo Yehova oMungu waghu akakuha, n’erimyakyo mo kyaghu, n’eriikala mukyo, neryo iwayibwira uti, ‘Ngateriyisombolera omwami ngoko ebindi bihanda byosi ebinitimbireko bikanakola.’
15 Byamabibya bitya, litolere iwahiraho omwami oyo Yehova oMungu waghu akendisyasombola. Litolere omwami oyo ukendisyasombola iniabya Mwisraeli nga we. Sighuhamulirwe eriyihiriraho omwami oyute Mwisraeli, oyute mughala wenyu.
16 Aliwe siritolere omwami oyo akayira oko syosabayiri* nene, kutse iniatasyatuma abandu be Misri ati bayamwendere esindi sabayiri, kundi Yehova mwababwira ati, ‘Isimwasyasyasuba e Misri.’
17 Kandi siritolere akabya n’abakali banene, omutima wiwe akasyahera. Kandi siritolere akayira oko feza* nene kutse ehoro nene.
18 Omughulu akendisyikala oko kitumbi ky’obwami bwiwe, litolere iniayihandikira Emighambo eyi omo kitabu.* Akendisyahandika ekopi y’Emighambo eyo bahereri Balawi babikire.
19 “Akendisyabya akahira ekopi eyo yo hakuhi naye, kandi litolere iniabya akasomayo buli kiro omo ngebe yiwe yosi. Ekyo kikendisyamuwatikya eriminya ngoko angasagha Yehova oMungu wiwe, n’erikwama ebinywa byosi ebiri omo Mighambo eyi, n’ebyalayiro ebirimo.
20 Amabikola atya, isyendibyamo omutima w’emiyiheko owakendileka iniaghonera abaghala babo, kandi isyendileka erikwama emighambo, kutse erikitira oko mali kutse oko malembe. Neryo iye n’abana biwe ibakendisyatabala e Israeli omo mughulu muli.
Amaelezo awehikwa
^ Kutse “abatemwe.” Kinywa kwa kinywa, “oko buno bw’abimiri; oko buno bw’abatemwe.”
^ Kutse “Abatemwe.”
^ Kutse “syofarasi, syoshevale.”
^ Ni kindu ky’obughuli ekikalua omo kitaka.
^ Kutse “kitabu ky’erilinga.”
