Eryibuka Ebihano 18:1-22
18 “Abahereri Balawi, ni bugha ambu ekihanda kyosi kya Lawi, sibendisyahabwa ekiharo kutse omwandu haghuma n’Abaisraeli. Bakendisyabya bakalya amahere awakahererawa Yehova omo muliro. Amahere ayo ni mwandu wiwe.
2 Sibendisyahabwa omwandu haghuma n’abaghala babo. Yehova y’omwandu wabo, ngoko anababwira.
3 “Ebyo bahereri bakendisyabya bakimya oko mahere agho bandu bakaleta, bya bino: Omundu oyukaleta obuhere, amaleta enume y’ende, kutse embuli, litolere iniaha omuhereri ekitigho, amatema, n’ekihu.
4 Ukendisyabya ukamuha n’ebyalya byaghu by’erimbere-mbere, edivai yaghu nyihya-nyihya ey’erimbere-mbere, amaghuta waghu w’erimbere-mbere, n’obweya bw’erimbere-mbere obo ukatwa oko syombuli syaghu.
5 Yehova oMungu waghu abirisombola Lawi n’abaghala biwe omo bihanda byaghu byosi batoke erikola omo rina rya Yehova mughulu wosi.
6 “Aliwe Omulawi amabilua omo muyi mughuma w’oko miyi ye Israeli eyo alue ikere, neryo iniasonda* eriya omo ghundi mwanya ogho Yehova abirisombola,*
7 anganakolera eyo omo rina rya Yehova oMungu wiwe ngoko abaghala babo bosi bakakola, ni bugha ambu Abalawi abakakolera Yehova omo mwanya oyo.
8 Omulawi oyo akendihabwa akalyo akalingirirene n’ak’abandi Balawi abo, nomo angabya iniabiribana esyofranga esiryalua oko bindu by’abotata-kulu wiwe ebyo alyaghulaya.
9 “Omughulu ukendisyingira omo kihugho ekyo Yehova oMungu waghu akakuha, isiwigha erikola emyatsi mibi eyikita esyonye, eyo bandu b’ebihanda ebyo bakakola.
10 Omo kati-kati kenyu isimwasungika omundu oyukahisaya mughala wiwe kutse mwali wiwe omo muliro, oyukalaghula, omukumu, oyukasonda eriminya ebikendisyabya, omuloyi,
11 oyukakola emighereko, oyukaya oko bakumu, oyukabugha ati akaminyerera ebikendisyabya, kutse oyukakanaya n’abaholi.
12 Kundi Yehova aponire oyukakola emyatsi eyo. Kandi kundi emyatsi eyikita esyonye eyo yo yikendisyaleka Yehova oMungu waghu iniatibita oko bihanda ebyo bilue embere syaghu.
13 Isiwabya n’ekosa embere sya Yehova oMungu waghu.
14 “Kundi abandu b’omo bihanda ebyo ukendimya ebiharo byabo babya bakahulikirira abakumu n’abalaghuli. Aliwe Yehova oMungu waghu syalyatakuhamulira erikola ekiri ng’ekyo.
15 Yehova oMungu waghu akendisyakuhulukirya omuminyereri oyuli nga ngye. Omuminyeri oyo akendisyalua omo kati-kati k’abaghala benyu. Litolere iwamuhulikirira.
16 Kundi ekyo kyo wasaba Yehova oMungu waghu e Horebu ekiro mwabya muhindene, omughulu wabugha uti, ‘Sinanzire eritasyahulikirira omulenge wa Yehova oMungu waghe n’eritasyalangira omuliro munene oyu ngasyahola.’
17 Neryo Yehova mwanibwira ati, ‘Ebyo balyabugha byuwene.
18 Ngendisyabahulukirya omuminyereri oyuli nga we, omuminyereri oyo akendisyalua omo kati-kati k’abaghala babo. Ngendisyahira ebinywa byaghe omo buno bwiwe, kandi akendisyababwira ebyosi ebyo ngendisyamubwira.
19 Oko kwenene, ngendisyatswera omundu oyutendisyowa ebinywa ebyo muminyereri oyo akendisyabugha omo rina ryaghe.
20 “‘Omuminyereri amabiyilabirirya omw’ibugha omo rina ryaghe mw’ebinywa ebyo nitalyamubwira niti abughe, kutse iniabugha omo rina ry’eyindi miungu, litolere omuminyereri oyo iniahola.
21 Aliwe wanganayibulya uti: “Tukendiminya tuti ngoko Yehova yutalyabugha ebinywa ebyo?”
22 Omuminyereri amabibugha omo rina rya Yehova, neryo ebyo alyabugha ibitabererera, kutse ibitabya ngoko alyabugha, aho Yehova iyutalyabugha ebinywa ebyo. Omuminyereri oyo inialyabugha ebyo omw’iyilabirirya. Isiwamusagha.’
Amaelezo awehikwa
^ Kutse “enafsi yiwe iyasonda.”
^ Ni bugha ambu, omwanya ogho Yehova abirisombola kusudi abandu babye bakamuramiryaho.