Eryibuka Ebihano 19:1-21
19 “Omughulu Yehova oMungu waghu akendisyiita abandu b’ebihanda abali omo kihugho ekyo Yehova oMungu waghu akakuha, n’omughulu ukendisyimya ebiharo byabo, n’eriikala omo miyi yabo n’amanyumba wabo,
2 ukendisyasombola emiyi isatu omo miyi y’omo kihugho ekyo Yehova oMungu waghu akakuha mo kyaghu.
3 Ekihugho ekyo Yehova oMungu waghu akendisyabya iniabirikuha mo kyaghu, ukendisyaghabakyo mo biharo bisatu. Ukendisyakokotya esyonzira esikaya omo miyi eyo kusudi oyulita omundu atoke erilaba musyo akatibitira omo muyi mughuma oko miyi eyo.
4 “Kino kyo kikendisyabya kikaleka omwiti iniatibita eyo atoke eribala: Amita mulikyabo omw’itendiyiririra, kandi isi bugha ambu alue iniamuponire.
5 Tubughe tuti omundu iniayasenyera omoli haghuma n’omulikyabo. Neryo akakonda omuti omo mbasa, embasa iyalua omo muhini n’erihutalya omulikyabo neryo iniahola. Oyulyamwita oyo, litolere iniatibitira omo mughuma w’oko miyi eyo atoke eribala.
6 Atitatibitira eyo, oyukatuhulaya omusasi w’oyulyitibawa iniakendimutibitako busana n’erihitana* kutsibu neryo iniayamuhikako n’erimwiita, kundi omuyi ogho angatibitiremo ali hali. Aliwe omundu oyo alue isyatolere erihola kundi si bugha ambu abya iniaponire omulikyabo.
7 Ekyo kyo kikaleka inakubwira niti: ‘Usombole emiyi isatu.’
8 “Yehova oMungu waghu amayira ekiharo kyaghu mo kinene ngoko alapira abotata-kulu waghu, kandi amabisyakuha ekihugho kyosi ekyo alagha eriha abotata-kulu waghu,
9 wamakwama ndeke-ndeke emighambo yosi eyi, eyo ngakuha munabwire omw’anza Yehova oMungu waghu, n’erikwama esyonzira siwe mughulu wosi, aho ighukendisyaongezya eyindi miyi isatu oko miyi isatu eyo y’erimbere.
10 Neryo omusasi w’omundu oyute n’ekosa isyendisyasyutika omo kihugho ekyo Yehova oMungu waghu akakuha mo mwandu. Isiwendisyabyako ekosa y’eriita omundu.
11 “Aliwe, omundu oyo amabya inialue aponire mulikyabo kandi iniabya akamulimbya atoke erimwita, iniamuhutalya* luhanya-hanya neryo iniahola, neryo omundu oyo iniatibitira omo mughuma w’oko miyi eyo.
12 Litolere abasyakulu b’omo muyi wabo ibatuma omundu ayamwende. Neryo babimuleta, abasyakulu ibamuhira omo byala by’oyukatuhulaya omusasi w’oyulyitibawa. Litolere iniahola.
13 Isiwamukwira obulighe.* Litolere iwalusya omo Israeli mw’ekosa y’eryuta omusasi w’omundu oyute n’ekosa, emyatsi yitoke erikughendera ndeke.
14 “Omughulu ukendisyabana omwandu waghu omo kihugho ekyo Yehova oMungu waghu akakuha mo kyaghu, isiwasegheraya omupaka w’omulikyenyu ukalusyagho oho abotata-kulu waghu bahiragho.
15 “Omundu mughuma amabibugha ati oghundi abirikola ekosa kutse erilolo, ekyo kisa sikyangaleka imwabugha muti omundu oyo aliko olubanza. Eriminya omwatsi nga nina w’ekwenene kutse iyehe, litolere ihabya abimiri* babiri kutse abasatu.
16 Omwimiri* oyuli n’omutima mubi amabishitaka omundu ati mwakakola ekosa,
17 abandu babiri abo bakendimana embere sya Yehova, embere sy’abahereri n’embere sy’abatsweri abakendisyabyaho oko mughulu oyo.
18 Abatsweri bakendisyakola omurorotsyo wo ndeke-ndeke. Omundu oyulyashitaka oghundi amabya iniakateba, kandi amabya iniakabugha amabehi oko mughala wabo,
19 litolere iwamukolera ngoko alyasohera mughala wabo. Litolere iwalusya ekindu kibi omo kati-kati kenyu.
20 Abandi ibakendiowa omwatsi oyo neryo ibasagha. Neryo isihendisyasyabya ekindu kibi ng’ekyo omo kati-kati kenyu.
21 Isiwamukwira obulighe.* Ukendisyalihisya engebe* busana n’engebe,* eriso busana n’eriso, erino busana n’erino, ebyala busana n’ebyala, ekisando busana n’ekisando.
Amaelezo awehikwa
^ Kinywa kwa kinywa, “kundi omutima wiwe ahuhire.”
^ Kutse “iniahutalya enafsi yiwe.”
^ Kinywa kwa kinywa, “Eriso ryaghu isiryamukwira obulighe.”
^ Kutse “abatemwe.”
^ Kutse “Omutemwe.”
^ Kinywa kwa kinywa, “Eriso ryaghu isiryakwa obulighe.”
^ Kutse “enafsi.”
^ Kutse “enafsi.”
