Eryibuka Ebihano 2:1-37
2 “Neryo mutwasuba enyuma, twamaya omo mbwarara. Mutwalaba omo nzira eyikaya eyiri Engetse y’Engula, ngoko Yehova anibwira. Mutwabugha biro binene tukatimba oko kitwa kye Seiri.
2 Oko mwiso, Yehova mwanibwira ati:
3 ‘Mwabiribugha biro binene mukatimba oko kitwa eki. Lino mulolere oko luhande lw’endata.
4 Ubwire abandu uti: “Mukendisyalaba hakuhi n’omupaka w’abaghala benyu, abana ba Esau, abikere e Seiri. Bakendibasagha, aliwe mulebaye ndeke.
5 Isimwalwa nabo,* kundi sinendibaha n’ekiharo n’ekighuma ky’oko kihugho kyabo. Sinendibaha nibya n’ahangahika ekisando, kundi nabiriha Esau Ekitwa kye Seiri.
6 Mukendisyabaghulako ebyalya by’erirya n’amaghetse w’erinywa.
7 Kundi Yehova oMungu wenyu abiribatsumula omo byosi ebyo mwabirikola. Abya inianemubateya omughulu mwabya mukalaba omo mbwarara nene eyo. Omo myaka 40 eyo, Yehova oMungu wenyu abya iniane haghuma nenyu, kandi mumwatabula kindu.”’
8 Neryo mutwalaba hakuhi n’abaghala betu, abana ba Esau, abikere e Seiri. Aliwe mututahika hakuhi n’enzira eyikaya e Araba, e Elati, ne Ezioni-Geberi.
“Enyuma sy’aho, mutwabinduka n’erilaba omo nzira y’omo mbwarara ye Moabu.
9 Neryo Yehova mwanibwira ati, ‘Isiwapuma* kutse erilwa na Moabu, kundi sinendikuha n’ekiharo n’ekighuma ky’oko kihugho kiwe. Nabiriha abana ba Loti ekiharo kye Ari mo kyabo.
10 (Kera Abaemimu bo babya bikere omo kiharo ekyo. Ni bandu b’akaghala, abanene, kandi bali-bali ng’Abaanakimu.
11 Kundi Abarefaimu nabo babya basosire Abaanakimu, neryo Abamoabu ibakahula Abarefaimu mo Baemimu.
12 Embere sy’aho, Abahori babya bikere e Seiri, aliwe abana ba Esau mubatibita kubo, bamababughaho, n’eriikala omo kiharo kyabo. N’Abaisraeli ko banemwendikolera batya ekihugho ky’Abahori ekyo Yehova akendisyabaha.)
13 Lino mughende, muyalabe omo Musya* we Zeredi.’ Neryo mutwayalaba omo Musya* we Zeredi.
14 Erilua e Kadeshi-Barnea eriyalaba omo Musya* we Zeredi, mutwabugha emyaka 38, erihika omughulu ekizazi* ky’abalume bosi b’amalwa kyahwaho, ngoko Yehova anabya iniabirilapa busana nabo.
15 Ebyala bya Yehova mubyalwa nabo n’eribabugha omo kambi erihika omughulu abosi bahwaho.
16 “Abandu bosi b’amalwa babere babihola n’erihwa omo bandu be Israeli,
17 Yehova mwanibwira ati,
18 ‘Munabwire ukendilaba hakuhi n’ekiharo kye Moabu, ni bugha ambu e Ari.
19 Ukendibya wabihika hakuhi n’Abaamoni, isiwapumabo* kutse erilwa nabo, kundi sinendikuha n’ekiharo n’ekighuma ky’oko kihugho kyabo, kusangwa nabirihakyo abana ba Loti mo kyabo.
20 Ekiharo ekyo nakyo kyabya kikalangirwamo ekihugho ky’Abarefaimu (Kera Abarefaimu babya bikere eyo. Abaamoni ibakabahula mo Zamzumimu.
21 Babya bandu b’akaghala, abanene, kandi bali-bali ng’Abaanakimu. Aliwe Yehova mwawatikya Abaamoni eribughabo, n’Abaamoni mubatibita kubo n’eriikala omo kiharo kyabo.
22 Ekyo kyo akolera abaghala ba Esau, abikere e Seiri yo lino, omughulu abughaho Abahori balue embere syabo, batoke erimya ekihugho kyabo n’eriikala omo mwanya wabo erihika na munabwire.
23 Aliwe Abaavimu babya bikere omo milongo y’omo kiharo kye Gaza erihika omughulu Abakaftorimu, abalua e Kaftori, bababughaho n’erikala omo biharo byabo.)
24 “Mutsukelo, muyalabe omo Musya* we Arnoni. Ngendibawatikya erisinga Sihoni, Omuamori, omwami we Heshboni. Mwimaye ekitaka kiwe, kibye kyenyu, kandi mulwe naye.
25 Eritsuka munabwire, ngendihira obuba omo bandu bosi abali eyikwa w’elubula abakendyowa engulu yenyu. Bakendihangya-hangya n’erititimana* busana nenyu.’
26 “Neryo twabere itune omo mbwarara ye Kedemoshi, munatuma abandu oko Sihoni, omwami we Heshboni, bayamubwire ngoko twanzire eribya omo buholo naye. Munabugha niti bamubwire bati,
27 ‘Leka ngalabe omo kihugho kyaghu. Enzira nyisa-nyisa yo ngendikwama. Sinendikitira oko mali, kutse oko malembe.
28 Akalyo n’amaghetse ebyo ukendinighulya bisa byo ngendirya n’erinywa. Kino kisa kyo ngakusaba: Uleke nilabe omo kiharo kyaghu
29 ngoko abana ba Esau, abikere e Seiri, n’Abamoabu abikere e Ari, mubanileka nilabe omo biharo byabo erihika omughulu nasoka olusi lwe Yordani n’eryingira omo kihugho ekyo Yehova oMungu wetu akatuha.’
30 Aliwe Sihoni, omwami we Heshboni, mwatatulighira erilaba omo kiharo kiwe, kundi Yehova oMungu wenyu mwaleka iniabyamo erighundu, kandi mwaleka omutima wiwe iniakala, kusudi tumusinge ngoko twabirimusinga.
31 “Neryo Yehova mwanibwira ati, ‘Nabiribawatikya erisinga Sihoni n’erimya ekihugho kiwe. Mwimaye ekihugho kiwe mo kyenyu.’
32 Sihoni abere asa n’abandu biwe bosi akasyalwa netu e Yahazi,
33 Yehova oMungu wetu mwatuwatikya erimusinga. Neryo mutwamusinga iye, abaghala biwe, n’abandu biwe bosi.
34 Oko mughulu oyo, mutwahamba emiyi yiwe yosi, twamatsandya obuli muyi, twamita abalume, abakali, n’abana. Muhatabya n’omundu n’omughuma oyo twabalaya.
35 Esyonyama sisa syo twanaheka, n’ebindu by’omo miyi eyo twahamba.
36 Eritsuka e Aroeri, eyiri oko musike-sike w’Omusya* we Arnoni, (erihirako n’omuyi owali omo musya), eriyahika e Gileadi, sihali omuyi ogho twatahikamo. Yehova oMungu wetu mwatuwatikya erisinga emiyi yosi eyo.
37 Aliwe mumutahika hakuhi n’ekihugho ky’Abaamoni kutse hakuhi n’omusike w’Omusya* we Yaboki, kutse hakuhi n’emiyi y’omo kiharo ky’ebitwa, kutse hakuhi n’ekindi kiharo kyosi-kyosi ekyo Yehova oMungu wetu abugha ati isitwahikamo.
Amaelezo awehikwa
^ Kutse “Isimwakarabo; Isimwapumabo.”
^ Kutse “Isiwakara.”
^ Kutse “musya owakumamo amaghetse.”
^ Kutse “musya owakumamo amaghetse.”
^ Kutse “musya owakumamo amaghetse.”
^ Kutse “olulengo.”
^ Kutse “isiwakarabo.”
^ Kutse “musya owakumamo amaghetse.”
^ Kutse “bakendyowa obulumi ng’obw’oyukabuta.”
^ Kutse “w’omusya owakumamo amaghetse.”
^ Kutse “w’omusya owakumamo amaghetse.”
