Eryibuka Ebihano 21:1-23
21 “Omundu amabisungika iniabiriholera omoli omo kihugho ekyo Yehova oMungu waghu akakuha mo kyaghu, neryo imwataminya oyulyamwita nga nindi,
2 litolere abasyakulu n’abatsweri benyu ibayayo n’erilebya nga ni muyi wahi owali hakuhi n’ekinda.
3 Neryo litolere abasyakulu b’omo muyi owali hakuhi n’ekinda ekyo ibimya omo syonde mw’ende nguma eyikine nyilere eyiteyatakolesibwa omo mubiiri, kandi eyiteyatahirwako omuketo.
4 Neryo abasyakulu b’omo muyi oyo ibatwala ende eyo eyikine nyilere omo musya owalimo amaghetse awakasenda, omo musya* ogho batebatalima kutse ogho batebataheramo kindu, neryo ibabunira engoto yayo omo musya oyo.
5 “N’abahereri, Abalawi, bakendisyasa kundi Yehova oMungu waghu abiribasombola batoke erimukolera n’eritsumula omo rina rya Yehova. Bakendisyabya bakakangania ngoko obuli mwatsi w’obutsururu atolere iniasohwa.
6 Neryo abasyakulu bosi b’omo muyi oyo abali hakuhi-kuhi n’ahalyasungika ekinda bakendisyabya bakanabirya ebyala byabo oko nde eyo eyikine nyilere eyo bikya byayo biryabunirawa omo musya,
7 kandi bakendisyabya bakabugha bati, ‘Ebyala byetu sibyetuta omusasi, n’ameso wetu syetalangira oyulyutagho.
8 Yehova, isiwahira olubanza olo oko bandu be Israeli abo wakombola, kandi isiwahira ekosa y’eryuta omusasi w’omundu oyute n’ekosa oko bandu baghu be Israeli.’ Neryo olubanza olo lw’eryuta omusasi silwendisyabya kubo.
9 Omw’ikola utya, ukendilusya omo kati-kati kenyu mw’ekosa y’eryuta omusasi w’omundu oyute n’ekosa, kundi ukendibya iwamabikola ebyuwene omo meso wa Yehova.
10 “Wamabiyalwa n’esyonzighu syaghu, neryo Yehova oMungu waghu iniakuwatikya erisingasyo, neryo iwahekabo mo banyewa,
11 neryo iwalangira omo kati-kati k’abanyewa abo mo mukali mubuya, neryo iwamwanza n’eryanza erimuyiramo mukali waghu,
12 wanganamuleta ewaghu. Neryo litolere iniatwa esyonzwiri siwe, erisugha ebinyala biwe,
13 n’erilusya olukimba lwiwe lw’obunyewa, neryo inyikala omwaghu. Akendisyalira baba wiwe na mama wiwe omo mwisi mughuma. N’enyuma sy’aho, iwanganaghotsera naye. Ukendisyabya mulume wiwe, naye iniabya mukali waghu.
14 Aliwe utitamwanza, litolere iwamuleka iniaya eyo anzire. Isiwamughulaya kutse erimutesa, kundi wabirimuhemula.
15 “Omundu amabya iniawite oko bakali babiri, neryo inianzire omughuma kulenga oghundi, kandi ababiri bosi bamabya ibabirimubutira abana, aliwe akambere ini k’omukali oyutanzirwe,
16 omughulu akendisyaghabira abaghala biwe b’omwandu, siritolere akaha akambere k’omukali oyo anzire k’omwandu owatolere erihabwa akambere k’omukali oyo aponire. Akambere k’omukali oyo atanzire k’akambere kiwe.
17 Litolere iniasikya obumbere bw’akambere k’omukali oyutanzirwe omw’ikaha omwandu w’ebindu biwe byosi ngendo kabiri kulenga abandi bana, kundi akambere ako ko nzuko y’obutoki bwiwe bw’eributa. Omwandu ow’akahabawa akambere ni wako.
18 “Omundu amabya n’omwana oyuli n’erighundu kandi oyutyowa, kandi oyutesikaya baba wiwe na mama wiwe, kandi ababuti biwe ibabirimukunga kangyi-kangyi aliwe iniatowa,
19 baba wiwe na mama wiwe batolere ibamutwala eyiri abasyakulu oko mulango w’omuyi wabo
20 n’eribwira abasyakulu b’omuyi wabo bati, ‘Omwana wetu oyu alimo erighundu, syalyowa, kandi syatusikirye. Akalya binene kandi ni mutamiri.’
21 Neryo litolere abandu bosi b’omo muyi wabo ibamwita omo mabwe. Ekyo kyo ukendisyabya ukakola erilusya omwatsi mubi omo kati-kati kenyu. Abaisraeli bosi bakendisyowa omwatsi oyo, neryo ibasagha.
22 “Omundu amakola erilolo eryangaleka inyitibwa, neryo inyitibwa n’erihanikwa oko muti,
23 siritolere ekinda kiwe ikyaghotsera oko muti. Isiwabula eritakyo ekiro ekyo kisa-kisa, kundi omundu oyukahanikawa oko muti ni kindu ekitakirwe n’oMungu. Siritolere ukatsandya ekihugho ekyo Yehova oMungu waghu akakuha mo mwandu.
Amaelezo awehikwa
^ Kutse “musya owakumamo amaghetse.”
