Eryibuka Ebihano 22:1-30
-
Eky’erikola eriwatikya enyama y’omulikyenyu (1-4)
-
Omulume eryambala esyongyimba sy’omukali, n’omukali eryambala esyongyimba sy’omulume (5)
-
Erikolera esyonyama syo ndeke (6, 7)
-
Eritimbya oko lutwe k’oluhimbo lukuhi (8)
-
Eritswangalikania ebindu omo nzira eyitatolere (9-11)
-
Erihira oko lukimba kw’amapambo w’esyouzi esilukire (12)
-
Emighambo eyilebirye amakosa omo myatsi y’engyingo (13-30)
22 “Wamabilangira enume y’ende kutse embuli y’omughala wenyu iyabirihera, isiwabya nga sighulangireyo. Litolere iwasubuliryayo omughala wenyu.
2 Aliwe omughala wenyu oyo amabya isyikere hakuhi naghu kutse isiwasi omwinyeyo nga nindi, litolere iwatwala enyama eyo y’ewaghu. Ikendibya iyineyo erihika omughulu omwinyeyo akendisyarondyayo. Neryo abihika, iwamusubuliryayo.
3 Ekyo kyo ukendisyabya ukakola omughulu wamabana epunda, olukimba kutse ekindu kyosi-kyosi ekyo mughala wenyu alyaheraya. Isiwabya nga sighutsomene.
4 “Wamalangira epunda kutse enume y’ende y’omughala wenyu iyabiriyiwako omo ndaki, isiwabya nga sighulangireyo. Litolere iwamuwatikya erihanganiayo.
5 “Siritolere omukali akambala olukimba lw’omulume, n’omulume naye syatolere eryambala olukimba lw’omukali. Kundi Yehova oMungu waghu aponire oyukakola atya.
6 “Wamabisunga oluto lw’akanyunyu lw’oko nzira imune ehyana kutse amayaya wako, lwangabya omo muti kutse oko kitaka, na mama w’ebyana ebyo inianabundamire kubyo kutse oko mayaya, isiwaheka mama n’ebyana biwe.
7 Uleke mama wabyo aghende, aliwe wanganaheka ebyana. Ukole utya emyatsi yitoke erikughendera ndeke kandi utoke eribyaho mughulu muli.
8 “Wamahimba enyumba, litolere iwatimbya oko lutwe k’oluhimbo lukuhi, ekihanda kyaghu kikasyabyako olubanza lw’omusasi kundi omundu mwakatogha oko nyumba yaghu.
9 “Isiwahera omo ririma ryaghu ry’emizabibu mw’emihanda ibiri y’esyombuto. Wamakola utya, ebyosi ebyo wahera ebikendyera n’emizabibu eyo ukendyoha isibyendibya byaghu, aliwe ibikendibya by’ahabuyirire.
10 “Isiwalima omo nume y’ende n’omo punda esiboherwe haghuma.
11 “Isiwambala olukimba olukokotibwe omo bweya bw’embuli n’ekitani.
12 “Litolere imwahira oko syongonde* ini sy’olukimba olo mukambala kw’amapambo w’esyouzi.
13 “Omulume amabitahya omukali, neryo iniaghotsera naye aliwe enyuma sy’aho iniamupona,*
14 neryo iniabugha ati omukali oyo syuwene n’erimutsandirya erina omw’ibugha ati, ‘Munatahya omukali ono, aliwe omughulu niryaghotsera naye munditasunga ekikakanganaya ngoko alue mubikira.’
15 Baba na mama w’omumbesa oyo bakendisyaletera abasyakulu abali oko mulango w’omuyi ekindu ekikakanganaya ngoko omumbesa wabo abya mubikira.
16 Baba w’omumbesa oyo akendisyabwira abasyakula ati, ‘Mungaha mwali waghe y’omulume oyu abye mukali wiwe, aliwe abirimupona
17 kandi anemubugha ati mwali waghe abya iniabiritsanda. Abere akabugha ati: “Sinditasunga ekikakanganaya ngoko mwali waghu alue mubikira.” Ekikakanganaya ngoko mwali waghe alue mubikira kya kino.’ Neryo bakendisyasanzula olukimba olo embere sy’abasyakulu b’omuyi.
18 Abasyakulu b’omuyi bakendisyimya omulume oyo n’erimuha amalipizi.
19 Bakendisyamulihisya esyoshekeli* 100 sy’efeza* n’erihasyo baba w’omumbesa oyo, kundi omulume oyo mwakalegha omubikira we Israeli. Akendisyabya tu mukali wiwe. Syahamulirwe erilekana naye omo ngebe yiwe yosi.
20 “Aliwe ebyo mulume oyo alyabugha byamabya ini kwenene, kandi isihali ekikakanganaya ngoko omumbesa oyo alue mubikira,
21 bakendisyatwala omumbesa oyo oko mulango w’enyumba ya baba wiwe, neryo litolere abalume b’omo muyi wabo ibamwita omo mabwe, kundi mwakakola omwatsi owakit’isoni omo Israeli omw’ikolera obumbalaka* omo nyumba ya baba wiwe. Ekyo kyo ukendisyabya ukakola erilusya omwatsi mubi omo kati-kati kenyu.
22 “Bamahamba omulume akaghotsera n’omukali wabene, litolere ababiri bosi ibahola, omulume oyulyaghotsera n’omukali, n’omukali oyo. Ekyo kyo ukendisyabya ukakola erilusya omwatsi mubi omo Israeli.
23 “Omubikira amabya iniawite omulume oyo wabiribugha ati akendimutahya, neryo oghundi mulume iniamweya omo muyi n’erighotsera naye,
24 litolere imwaleta ababiri bosi oko mulango w’omuyi oyo n’eriitabo omo mabwe. Omukali akenditibwa kundi syetalakira omo muyi, n’omulume akenditibwa kundi mwakahemula omukali w’omulikyabo. Ekyo kyo ukendisyabya ukakola erilusya omwatsi mubi omo kati-kati kenyu.
25 “Aliwe omulume amahindana emoli y’omumbesa oyuwite omulume oyo wabiribugha ati akendimutahya, omulume oyo amabya inialyaghotsera naye kinyanganga, omulume oyo iniakenditibwa iyuwene.
26 Isimwayira omumbesa oyo yo kindu, omumbesa syetakola erilolo eryangaleka initibwa. Kiri ng’omughulu omundu akalwa n’omulikyabo, neryo iniamwiita.
27 Kundi mwakeghaya omumbesa oyo y’emoli, n’omumbesa oyo mwakalaka, aliwe sihetabya oyukasyamuwatikaya.
28 “Omulume amahindana n’omumbesa mubikira oyute n’omulume oyo wabiribugha ati akendimutahya, neryo omulume oyo iniaghotsera naye kinyanganga, neryo ibabahamba,
29 litolere omulume oyo iniaha baba w’omumbesa oyo esyoshekeli 50 sy’efeza.* Neryo omumbesa oyo akendibya mukali w’omulume oyo, syendisyalighirwa erilekana naye omo ngebe yiwe yosi, kundi abirimuhemula.
30 “Omulume syatolere akimya omukali wa baba wiwe, akasyahemula baba wiwe.*
Amaelezo awehikwa
^ Kutse “esyosonda; coins.”
^ Kutse “iniamughana.”
^ Eshekeli nguma ini grame 11,4. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “oburaghane.”
^ Ni kindu ky’obughuli ekikalua omo kitaka.
^ Kinywa kwa kinywa, “akasyasukula olukimba lwa baba wiwe.”